交換禮物火都嚟 水杯相架未算廢

好歹做咗幾廿年人,試問有咩禮物未收過?水杯、相架、一支原子筆、一支珍寶珠、得隻左腳嘅拖鞋,仲有兩日後過期嘅餅乾都收過,點諗到今年公司交換聖誕禮物可以低處未算低。

為咗防止大家送埋啲唔等洗嘅嘢,公司一早講咗聖誕party交換禮物嘅budget唔可以少於$500,老細會每人資助上限$300,即係如果你買嘅禮物係啱啱好五嚿水,自己只需要拎$200出嚟,我認為算合理,同時走咗去買一支價值$530嘅香水。

公司有40幾人,再抽籤睇下同事可以得到邊個份禮物,收咗唔啱水心亦可以私下同人交換,但我抽中嗰份完全冇人肯換,因為係一個淘寶買返嚟嘅山寨LV銀包,其實我公司做廣告,而且專門負責luxury brand投放喺紙媒嘅平面AD,買呢件假貨嘅人究竟有冇尊重下自己嘅專業呀?

五嚿水budget當然冇奢望收一個真嘅名牌銀包啦,咁你送其他嘢咪得囉,$500可以有好多選擇㗎啫,你去誠品買幾本書都得㗎,點解要送山寨LV銀包呢?係咪仲期待我會用?拎件假貨出去見公司班luxury brand嘅客?

我:「唔好意思,假㗎喎!邊個送㗎?」

有個女同事衝出嚟答:「我買㗎!高仿嚟㗎!淘寶都幾快,聖誕前寄得切,仲有埋個布袋同盒,係咪好真呀?」

我:「咩叫高仿?假嘢就係假嘢!」

「唔係喎,你睇下先啦,好細緻㗎!我覺得可以粗用喎!」

其他人應該都見到我塊面黑晒,咁係吖嘛!你話我mean又好乜都好,從來冇要求公司交換聖誕禮物收名牌,但你做得呢份工,買件假貨返嚟唔單止侮辱同事,仲侮辱咗你自己。

水杯起碼可以飲水,相架起碼可以擺相,原子筆可以寫字,珍寶珠可以食,得隻左腳嘅拖鞋我都可以拎去打小人打小強,原來呢啲禮物都未算廢,收到個冒牌銀包真係火都嚟埋。

後來有啲同事叫我唔好咁嬲,咁我話不如大家用自己嗰份同我交換啦,結果一個二個耍手擰頭,咁咪係囉!有邊個想收到啲山寨A貨㗎?捐出去志願回收機構都有失身份啦!

本來想就咁丟喺公司個垃圾桶,後來諗諗吓都係出街丟遠啲算數,換轉係你收到個假LV會有咩感受吖!份禮物下限係$500,老細又資助$300,大把嘢可以買,支持香港本土嘅手作品牌仲有意義啦,再唔係用呢嚿錢買晒六合彩電腦飛畀我都冇咁嬲。

下年公司再玩聖誕交換禮物唔該講明唔准買假貨,唔好講咩高仿呢啲詞語啦,呢度係香港呀,假嘢就係假嘢,不過最緊要都係唔好再抽中呢位同事嘅禮品。

error: