發現另一半對自己不忠嘅情節，通常係朋友通風報信、第三者主動攤牌、喺街撞到，又或者搵到蛛絲馬跡例如避孕套長頭髮WhatsApp對話之類，而我就比較特別啲。
單刀直入，喺交友App認識前男友，佢做Audit，拍拖初期見得比較多，後來就兩星期一次，再後期甚至一兩個月一次，亦唔會晚晚傾電話，因為前男友聲稱自己做Big 4，每日除咗勁OT之外，一個禮拜仲要返足7日，大時大節都唔一定有假放。
我曾經好傻咁問佢：「一星期返足7日，咁樣唔係犯咗勞工法例咩？正常人都要休息啦！」
前男友口頭禪係：「喺Big 4做Audit係咁㗎啦！」
聖誕、情人節、中秋節呢類男女拍拖會一齊慶祝嘅日子，前男友都聲稱要OT，我話唔緊要可以等佢收工，但佢會話唔使，原因係唔知做到幾點，之前幾年嘅聖誕佢都係連續三日消失，平安夜開始，再到聖誕同Boxing Day一直唔見人，間中send句WhatsApp嚟，跟住不了了之，總之大時大節必定失聯。
我當然有懷疑啦，但可以點呢？大家後期一兩個月先見一次，有時幾日都唔通電話，check佢嘢冇可能，搵私家偵探太誇張，連直接對話都冇機會，而且無論講乜都好，佢永遠用呢句嚟擋：「喺Big 4做Audit係咁㗎啦！」
咁都維持到4年，我真係失敗，由於大家好少見面，我冇機會帶佢認識我嘅朋友，前男友當然都冇介紹佢嘅家人同事朋友比我識，我哋嘅common friend 係零。
今年6月，我意外發現呢個男人原來結咗婚，過程我絕對冇預計過，只可以講句世界真係太細，或者呢啲就係所謂嘅天網恢恢疏而不漏。
一個best friend結婚，搵咗我做伴娘，我哋行完尖東百利再去咗旺角太子嘅金都，因為以上都係嗰種婚禮一站式商場，睇完過大禮用品再睇花球，然後又睇咗啲租婚紗嘅舖頭，最後搵朝拍晚播服務，我同best friend坐低咗，個老闆show咗啲sample，我竟然見到自己男友。
唔肯定舖頭搵新人嘅Big Day相片去sell其他客，究竟需唔需要得到當事人同意，但呢啲我都冇深究，只係知眼前見到呢個新郎哥100%係我男友。
Best friend因為未見過我男友所以冇反應，加上老闆坐咗喺度，當時雖然好難過，但除咗目瞪口呆都唔知可以做啲乜，再睇多幾張出門斟茶嘅相，背景有貼住新郎新娘個英文名，連個名都一樣，絕對唔會有錯啦！
向我best friend鬆咗幾下踭跟住離開舖頭，best friend以為我覺得啲作品唔好或者價錢太貴，但我話唔係，原因係見到自己男友原來同另一個女人結咗婚，冇諗過我會喺金都搵到男友大時大節例牌失聯嘅答案，當時成個人跌咗落深淵，畫面實在太震撼，原來我先係第三者，另一半仲要係人夫，真係接受唔到。
打電話去問，冇聽，其實預咗，因為平時打畀佢10次有9次唔聽，直接WhatsApp佢講：「原來你結咗婚？你真係一個仆街！」
佢淨係覆我：「？」
我再reply：「唔好扮嘢啦！」
佢繼續扮傻回覆：「痴線。」
跟住我講咗句：「你老婆係咪Sophia？」其實我係見到朝拍晚播間舖頭嘅相先知佢老婆個名。
見到呢句之後佢大驚，即刻打嚟直接對話，我知佢唔係緊張我，只係詫異點解知道佢老婆個名，擔心我會搞事。
佢問我點知，我冇答，佢叫我唔好搞事，我都冇答應，淨係講咗句：「你好自為之。」
從來冇聽過佢咁誠懇求我：「對唔住，我唔係有心，其實我同老婆已經冇晒感情，可唔可以出嚟見面傾下。」
又係同老婆冇晒感情呢啲對白同埋情節，我直接cut線，然後佢連續打咗幾次嚟都唔聽。其實我根本搞唔出啲咩，同佢一齊4年太攰喇，時間已經浪費咗追唔返，唯有安慰自己終於睇清楚呢個仆街嘅真面目。
「Big 4做Audit係咁㗎啦！」諗起佢以前成日用呢個藉口失聯，真係覺得自己好蠢，佢成日唔搵我同埋唔覆msg，原來係陪緊一個比我更重要嘅人。
愛錯一個人，絕對比單身更難受，所以今年聖誕我反而開心咗，如果有機會喺生命中搵到對的人，我希望下次可以好好相愛，如果一直搵唔到，我都會好好愛自己，希望每個人都一樣，有愛情就全心對待，冇愛情都要一個人活得精彩。