我公司個茶水姐姐叫藍姨，做咗好多年，人人都鍾意佢，但係早排藍姨新抱生咗BB，所以佢向人事部遞信呈辭，原因係想全職湊孫，HR 出盡九牛二虎之力挽留，最終都成功，不過藍姨要求放假兩個月幫屋企先，老細欣然答應。
茶水姐姐位置懸空兩個月，出招聘廣告再in人都蚊瞓，搵headhunt就更加唔抵，結果HR吹雞周圍叫人介紹替工，有個叫Cissy嘅同事無啦啦衝出嚟問：「我阿媽之前做過pantry lady，今晚返去問下佢先，幾錢人工呀？淨係做兩個月？」
HR梗係開心啦，連隨講晒啲資料畀Cissy聽，佢阿媽第二日已經嚟interview，隔咗一星期後就正式返呢份茶水姐姐替工。
有經驗即係有經驗，Cissy阿媽真心唔差，同埋你知道新入職會比較有幹勁，個人認為某啲細節仲做得好過藍姨，唔知仲以為伯母想「謀朝篡位」轉做長工🙈
Cissy阿媽仲非常熱情同埋健談，不過呢樣嘢真係水能載舟亦能覆舟……對Cissy嚟講，至於對其他同事而言就可謂娛樂性豐富。
我哋一層樓大約有40人，公司有兩層即係80人，幾乎每個人都聽過伯母講一句：「麻煩你睇住我個女呀，佩霖佢好大頭蝦，多多關照。」
所有人都會回應一句：「邊個係佩霖？」因為同事唔知道Cissy中文名，而家就梗係個個都知啦！伯母仲熱情到買西餅返公司巡迴請晒咁多個department嘅人食，睇嚟係想幫個女打好關係，咁就真係做多咗喇。
聽過Cissy喺pantry同阿媽有少少爭執，內容大致係叫佢唔好再周圍「騷擾」同事，唔好再叫人多多關照，唔好再請人食西餅，可惜伯母一意孤行，仲狠狠鬧返Cissy唔識人情世故，慘！不過仲有更慘嘅事發生。
伯母喺公司裡面幫Cissy物色男朋友，周圍問啲男同事拍拖未？結婚未？（當然伯母都有揀選過先問）然後就起勢咁sell個女，同時又爆個女好多大鑊，例如話Cissy之前帶過一個男友返屋企好唔掂，猛咁話個女冇眼光，連我都畀伯母「推銷」過，有時啲嘢真係佢唔覺得尷尬，尷尬嘅就係我哋，婉拒咗幾次之後，每次行入pantry只要得伯母同我兩個，佢老人家都會不厭其煩咁sell多次。
Cissy除咗同我哋不斷道歉之外，仲係咁呻後悔，你話我衰都好啦，呢單嘢唔抵可憐喎，點會叫阿媽去自己公司返工㗎？男女朋友做同事已經係大忌，同阿媽做同事直頭係大忌中嘅大忌，等同孭個計時炸彈返工，邊有人做呢種傻事㗎？
我：「好佩服你當時有呢份勇氣，簡直係勇士！做咩咁睇唔開呀？因為伯母好需要工作想搵多啲錢？不如你份家用畀多啲仲好啦！」
Cissy：「唔係，我哋屋企冇經濟壓力，但係阿媽成日話好悶，又話唔做嘢長時間留喺屋企會短命啲，咁佢以前真係做過茶水阿姐，見係臨時工兩個月咪等佢過下日辰囉！」
我：「坦白講，叫阿媽入嚟公司做真係花式自殺嘅最高境界。」
Cissy：「關係仲差咗好多，而家日日同佢鬧交，藍姨仲有一個月就返嚟，希望時間快啲過啦，今次真係冇晒面，介紹佢嚟返工，搞到我想辭工。」
說時遲那時快，喺我同Cissy傾偈嘅時候，佢阿媽同埋HR一齊行過嚟，首先出聲嘅係Cissy阿媽：「你哋兩個感情好好喎，今晚上嚟我哋屋企食飯吖，我煲湯呀，海底椰烏雞，好正㗎！」
我：「唔使客氣喇伯母，我哋傾公事咋！」任何一個罅隙都要sell🤦🏻♂️
HR：「我走埋嚟就係講公事，藍姨話想放多一個月，不過我聽佢口吻都係想全職湊孫，Cissy你媽媽好好呀！佢話唔介意做到藍姨返嚟，如果有需要轉做長工都冇問題。」
Cissy：「唔好啦！」
伯母：「衰女，唔使理佢，佢成日講笑㗎，長工我ok呀，如果我上一手真係唔返嚟，你隨時同我講吖！」
我向住Cissy講：「我真係恭喜你呀！我返埋位做嘢先！」🤣
睇嚟Cissy都係時候搵工，再唔係嘗試拎藍姨個contact，私人出個bonus求藍姨盡快返工，否則我只能夠重複呢句：我真係恭喜你呀！