投稿讀者：Tanya
想分享一件非常非常非常谷氣嘅事。
因為之前間公司啲同事好自私同埋冷漠，而且好多嘢都立立亂，個人覺得唔太適合，結果我做咗4個月就辭職，幸運地係搵到工先走，但係當我返咗新工一個月後，舊公司突然打畀我，原來負責處理出糧嗰位同事忘記stop我個auto pay，即係我離職後一個月，月尾最後一日仍然收到舊公司自動轉賬出糧畀我。
我完全唔知有呢件事發生，當時我喺新公司即刻check online banking，又真係見到舊公司好似平時咁自動轉賬落我戶口，一早講咗佢哋做嘢好混亂㗎啦！
其實咁樣出錯糧，我第一個反應係諗：「會唔會影響到報稅？」再加上我住公屋，你咁樣隨時搞到資產審查時超出上限，到時一個唔覺意跳咗bar，可能要交倍半租金，諗起都覺得麻煩同埋困擾，ok，算！唔錯都錯咗，唯有問佢哋拎返個公司戶口號碼，但求快快脆脆即刻online過返畀舊公司，唔想再同佢哋有任何瓜葛。
點估到舊公司自己做錯嘢在先，竟然要求我拎現金返去畀佢哋，其實online過數即刻就搞掂啦，點解錯不在我，佢哋要有咁嘅要求？
我話要返工冇可能拎到cash過去，而家間公司喺觀塘，舊公司喺灣仔，就算放工都唔會過去，何況佢哋係命令我喺office hour返去畀錢，食屎啦！即係我要請半日假？
「你搞清楚未呀？而家係你哋做錯嘢，出錯糧畀我喎！點解講到我欠你哋錢？我已經同意畀返你哋啦！仲要迫我請假上嚟畀返錢你？」
「老細唔想搞亂公司戶口條數，我唔理你請假又好點都好，總之一定要拎返cash上嚟！」
「拎就一定唔會拎㗎喇，你claim返車錢畀我都唔會拎上嚟，一係轉數快，一係我開支票寄嚟，係咁多。」
「如果你唔拎返cash上嚟，我哋會報警。」
「隨便你，總之唔係我錯。」
我已經打咗去勞工處問，職員話呢件事唔關勞工法例問題，最好我同舊公司自己傾返，如果舊公司要追討，亦唔應該搵勞工處，正確做法係循小額錢債追討，假設我拎cash上去又怕舊公司收完唔認數，我可以自行草擬一張收據，上舊公司交低錢嘅時候叫對方簽名或者吸返公司印作實。
…..
其實我唔想知舊公司要用咩途徑追我，因為我喺呢件事上面冇錯，要我online過數甚至蝕郵票錢寄支票都冇問題，問題係佢哋冇stop我份糧嘅自動轉賬，點解我要請假去還人工？即使我而家失業，我都唔會特登搭車去灣仔畀錢佢哋。
我覺得香港呢個地方對打工仔嘅支援真係好少，既然勞工處冇明文規定我要點樣退返份糧畀舊公司，我決定直接寄返支票過去，收就收，唔收就算，之後有咩事我都有支票嘅copy，我冇做錯，亦唔會因為佢哋聲大夾惡而就範。
出錯糧畀已離職員工，再勒令我要第二日office hour拎返上去，否則會報警，咁無賴嘅公司你見過未？