早排我收到封匿名電郵，寄件者係用gmail send嚟我公司email，內容係講我一位下屬Jeff喺舊公司嘅「惡行」，包括喺office亂搞男女關係、大大聲講粗口、遲到早退、同同事發生過唔止一次肢體衝突等等。
唔使問阿貴，呢封匿名電郵肯定係佢舊同事send嚟，因為當中都描述得好細緻，篇文成千字咁長，你哋唔係同一個office共事又點會咁清楚，不過係咩事咁大仇口要玩「報寸」？Jeff都嚟咗我公司一年有多啦，而家先嚟爆料？
Jeff得罪咗舊公司嘅人就梗㗎喇，其實我自己上一份工都做到好無癮，特別係同舊老細嘅矛盾好深，不過我冇選擇正面開戰，畢竟香港行頭窄，凡事留一線，他日好相見，我選擇咗用最直接嘅方式表達不滿，就係辭職。
當時舊老細都有挽留，不過我行得呢步肯定係有啲嘢冇得改冇得救，與其係咁不如大家撇脫啲，因為我真係想走，唔係跳草裙舞。舊老細收到我封辭職信之後，第一時間叫我入房傾，我用咗幾分鐘就解決佢。
其實舊老細心中有數知咩事，佢第一句已經問：「係咪因為OT太多呀？大家可以斟斟喎，有冇咩方法一人讓一步？」
舊公司嘅OT文化迫走咗唔少員工，特別係新入職同埋比較年輕嗰班人，我都唔知呢種文化係點樣養成，全公司8點仲係燈火通明，老細唔走，其他人都唔敢走，邊個準時放工就有面色睇，一定會秋後算帳，總之心理壓力好大。
面對老細嘅明知故問，我輕描淡寫咁答佢：「其實我唔反對OT，但比較認同有效率嘅工作方式。」
明就明，唔明就黎明，正所謂哀莫大於心死，講得太詳細又唔會點化你，你明又唔會改，咁講嚟做乜？好嚟好去，大家有個落台階咪算囉！我鍾意開盡turbo喺office hour搞掂啲嘢然後準時收工，你就唔理員工office hour做幾多，最緊要肯留得夜啲，認為咁樣先叫做肯付出，8點全公司啲人未走，畫面先至夠靚。
跟住老細就好直接問我：「咁你搵到工未吖？嚟緊去邊度做？」
我係絕對唔會畀佢知自己即將去邊，將來佢收到風係將來嘅事，起碼呢一刻唔畀機會佢搞破壞。
我：「想休息下先，呢半年身體好差，約咗個body check，另外應承咗陪老婆旅行，返嚟先再打算。」
嗱！工呢，我就搵咗㗎喇，但你想我開名係邊間公司就冇可能，body check同旅行我亦都會去嘅。
舊老細：「係咪嫌人工低吖，可以傾下喎！」
我：「最主要我係想畀自己去唔同嘅地方鍛鍊下。」
舊老細：「係咪對公司有咩不滿呀？唔怕講喎！」
我：「邊有一個地方係完美㗎，就算我將來轉去另一間公司，嗰度都一定會有其他問題㗎啦！」
佢唔會喺我嘅說話裡面捉到任何錯處，我知道舊老細覺得啲答案行貨，但我用最體面嘅方式表達，你亦唔使旨意雞蛋裡挑骨頭再搵嘢爭辯，加上我講明自己已經plan好晒，你夾硬要留，我都要搵醫院再約時間body check，又要搵老婆重新計劃旅行，我如果話返去問問先，其實都係隔多日再同你講冇辦法啫！
臨尾補多句：「不過我真係好多謝公司畀咗咁多機會我，無論第日繼續喺呢行定係轉行，公司嘅栽培都幫咗我好多。」假係假咗啲，最緊要你聽完舒服唔好搞咁多嘢啦！
講完自己上一份工點樣逃離魔掌，又講返我下屬Jeff先，收到匿名信之後我冇理會，因為嗰啲指控真係比較薄弱，office亂搞男女關係？其實我老婆都係我之前公司同事，咁我算唔算喺office亂搞男女關係先？
大大聲講粗口？我日日都講粗口㗎喎，即係好似咸酸菜炒牛歡喜咁，定律嚟㗎嘛，唔通講粗口係細細聲好溫柔好似同條女談心咁呀？諗起都恐怖同打冷震啦！何況咁大個人出嚟做嘢仲捉人講粗口？你估公司係學校咩？
至於同同事發生過唔止一次肢體衝突，咁我都要知成件事嘅來龍去脈先得㗎，或者你哋有個舊同事走去彈Jeff嘅何B仔呢，如果有人彈我何B仔，我唔止肢體衝突，我直頭會打柒死個同事啦！你講啲唔講啲好難判斷喎！
冇理封匿名電郵之後，隔咗兩個星期我就收到電話，佢打去公司直接搵我：「你好，你係Steve？」
我：「係，邊位？」
「我係Jeff以前嘅上司，請問你收唔收到我send畀你嘅email？」
我：「原來係你send嚟，有咩幫到你？」
「我想提醒你，Jeff呢個人養唔熟，你留佢喺度做嘢要三思，Jeff試過做假數，呃公司啲佣金，呢個人誠信非常有問題，作為同行，我覺得有義務要講畀你聽，炒咗佢啦！其實我都識你哋老細，如果你公司繼續用呢個人，我唔排除直接搵你老細傾。」
嘩！呢條友都幾大官威，同行咋喎，你指揮我炒個下屬？我當時連佢叫咩名都未知，你話係Jeff前上司？咁不如你話係Jeff老豆啦！再者，可能我對於匿名電郵呢種手法冇咩好感，所以有一定嘅戒心。
我：「首先多謝你提醒，我會了解清楚先。」
因為當時我都忙緊其他嘢，諗住處理完先搵Jeff傾傾，但係趕唔切喇，約莫過咗15分鐘左右，老細叫我嗌埋Jeff入房，基本上我已經意識到頭先條友已經直接搵咗我老細。
我打內線畀阿Jeff，好快咁講咗佢前上司打嚟投訴，而家驚動咗老細，叫佢一陣入房要有心理準備，Jeff即刻「吓」咗一聲，都正常嘅，換轉係我都會「吓」啦！
入到房，老細望住我同Jeff講：「乜咁大鑊呀？做假數單嘢可唔可以講嚟聽聽，你以前個阿頭打畀我，你哋好大仇口喎！」(未完待續）