大家有冇試過返新工，發現上手同事留低啲奇怪嘢？當然唔係講緊杯、原子筆、計數機啦，呢啲都唔夠特別，我係喺櫃桶搵到「攻略本」，裡面詳列咗其他同事嘅人物性格，仲有能力值，兼夾有晒圖表，好似打機咁。
我估你而家諗緊嘅嘢，同我當時發現呢份攻略本嘅反應一樣，就係點會有人做咁戇居嘅事，將同事啲衰嘢寫晒出嚟，仲要個個都知係上一手做，所以我初頭都覺得係一個開玩笑嘅行為，不過攻略本第二版已經寫咗段字。
「Hello新同事，雖然我唔知你係邊個，大家亦冇機會見面，但我希望呢本筆記會幫到你，你可以選擇報寸話畀人知，冇所謂，我已經離咗職兼離開咗香港，你交呢本嘢出去只會係你嘅損失，PS：你最終一定會感激我！」
其實一睇已經知道手字係女仔，而且佢入面啲chart畫得好細緻好有心機，根本就係玩遊戲裡面嗰啲能力值圖表，我真係唔捨得同人講然後睇住本嘢被沒收，更何況返工嘅第一日完全冇人理我，直頭當我透明，氣氛非常唔對路，故此我對呢本攻略就更加好奇。
第一日返工仲有一個場面令我印象難忘，深深體會到同事之間相處勁唔友善，因為喺寂靜嘅office裡面，我個阿頭突然開聲問其中一位同事：「星期四你請假呀？」
同事：「老豆做通波仔手術，陪佢入院。」
阿頭：「但係星期四有個meeting好重要。」
同事：「你冇老豆㗎？」
個同事反問阿頭係咪冇老豆嘅時候，絕對冇扯火或者大聲，更加冇笑，語氣平淡但係好倔。
我梗係聽到呆咗啦，所以本能反應望一望個同事，再擰轉頭望一望個阿頭，更奇怪係我發現其他人好似當聽唔到，其實點會聽唔到呀？個office成間自修室咁靜，大家聽到以上對話竟然可以一啲反應都冇？
個阿頭冇再接落去，佢哋之間嘅對話亦就咁完結咗，氣氛勁奇怪，我肯定唔係friend嗰種互寸囉！
而其實攻略本第三頁已經分析咗阿頭嘅性格同埋能力值，睇完明白晒，亦更肯定上手留低呢本筆記有料到。
根據攻略本嘅描述，阿頭嘅總能力值得50，仲有一欄文字總結好以summary咁，當中係咁寫：「騰雞，冇料，將啲嘢畀晒人做，自己就去領功，淨係識擦老細鞋，膽小如鼠，你一定要識得say no，否則會畀佢食住。」
愈睇呢本攻略愈吸引，然後我嗱嗱聲睇埋同組其他人嘅能力值同評語：
Cindy：能力值90，工作能力同效率超強，但係鍾意自己做自己嘢，佢唔會害人，但亦唔會幫你，唔好煩到佢就得。
睇埋頭先問阿頭係咪冇老豆嗰位同事Jackson：能力值75，唔會做多唔會做少，係有料嘅，不過出名串，同埋好重怨氣，講嘢冷冰冰同埋不留情面，少惹為妙。
諗返頭先Jackson同阿頭嘅對話，似乎幾貼切喎！再繼續睇落去先。
Olivia：能力值10，可有可無，每個月都話辭職，連續講咗幾年，但直至而家仲喺度做，所以辭職同轉工只係佢嘅口頭蟬，你結婚生仔退休再拎埋強積金，佢仍然會做緊，除非公司執笠。
呢份攻略說穿了都係講緊同事壞話，係咪好奇怪我可以喺office大模斯樣咁睇呢？因為我個位喺角落頭之餘，亦都冇人理我，冇同事同我傾計，冇人教我做嘢，佢哋亦都冇同我食welcome lunch，去到lunch hour就四散，有人自己叮飯唔出聲戴起airpod一路煲劇一路食，有人自己行出去食，完全冇人問我食唔食晏，睇得出成個部門嘅同事關係都麻麻。
我呢張枱啲塵成尺厚，櫃桶除咗有呢本攻略，仲有好多file、文件、寫過其他嘢嘅紙，完全冇人掂冇人執，或者呢個就係冇人發現攻略本嘅原因。
因為阿頭第一日都係叫我睇文件，冇任何工作指派畀我，所以我好快就睇晒呢本攻略，當中仲提埋隔籬department嘅人，節錄幾個好好笑嘅出嚟。
會計部Christina：能力值30，搵佢claim錢慘過去乞。
Sales Team阿Rick：能力值10，五個字講晒，仆街陷家鏟。
其實份攻略又唔係一面倒踩同事，當中有幾個都係讚不絕口，例如有個Product Development嘅同事阿Dave，攻略就畀咗佢嘅能力值有100滿分，仲話如果有咩麻煩可以搵Dave幫手，形容佢係好好先生。
而喺攻略尾三嗰頁就有一段感言，裡面提到喺呢間公司做唔會有得升，因為上面一定會撳住你，加人工就預咗只會每年$500，只有更少，唔會多過呢個數，提示更包括有好多同事會輪流跣你，最重要嗰一句就係「早走早着」。
坦白講最初我睇到呢本攻略嘅時候係抱觀望態度，你點知上一手唔係惡作劇呀？同埋你走得一定有原因，而且人夾人緣，企喺唔同立場就會對唔同嘅同事有唔同嘅感覺，個人觀點又唔能夠作準嘅，所以攻略本只係參考，信自己對眼會比較好。
緊接落嗰幾日，我開始發現呢本攻略真係唔夠中肯，因為我眼見同埋所感受到嘅狀況，比起裡面嘅描述更差……
我：「唔好意思我想問下，個system點解入晒資料都next唔到嘅？係咪有咩漏咗？」
Cindy：「唔知，唔好問我！」
然後我問阿頭：「唔好意思我想問下，個system點解入晒資料都next……」
阿頭：「你問其他人啦，我好忙。」
跟住我問Jackson：「唔好意思我想問下，個system……」
Jackson：「唔好問我，電腦呢啲嘢你搵IT！」
其實咁樣嘅工作環境同埋同事，我每一日返工都有好強烈嘅hard feeling，我唔怕份工難做，難可以學，但好唔鍾意呢種職場冷暴力，大家怨氣好重，大家都當彼此係敵人，除咗份糧，冇嘢值得你留低，後來有單嘢要接觸Sales Team嗰個阿Rick，我發現用「仆街陷家鏟」5個字形容佢已經好有口德。
就喺呢個時候，之前去見嘅另一份工忽然出offer畀我，我諗都唔諗就即刻答應，同日resign，阿頭冇留我，亦都冇同事問過我一句。
臨放工去人事部交低返張職員證，HR仲要畀說話我聽：「妖！又要請人！煩唔煩呀！」
我仍然好好禮貌咁答佢：「唔好意思，麻煩到你。」
「你知就好啦！兩個禮拜就辭職，你個部門真係特別多事，上一手就做3日，再上一個就返得一個星期，冇個做得長，都唔知你哋想點，我大把嘢做㗎，淨係服侍你哋咩！」
聽完HR嘅說話，我意識到嗰本攻略唔係上一手留低，因為做得3日咁少應該寫唔出，再上一個返得一個星期都應該唔係攻略本主人，因為你要接觸到會計部Christina同埋好好先生阿Dave，仲要有咁深刻體會，肯定唔止返得咁少時間，講真我都仲未有機會搵Christina去claim錢。
最初我有諗過帶走埋本攻略，因為怕上一手同事咁好心反而會惹麻煩，但最後知道攻略本應該係唔知對上第幾手同事留低，咁我就放心喇，與其拎咗去，不如擺返喺櫃桶個原位，畀將來返工嘅人有一個參考。
我反而喺度諗，HR口中對上嗰兩位同事咁快就走，係咪因為睇過呢本攻略呢？如果之後畀阿頭或者其他同事搵到，又會有咩後果呢？不過點都好，呢啲都唔關我事喇，好在有其他offer咋！(完）
呢個故事令我諗起Tina個連載
《那夜，Tina投放一枚震撼彈》上集
上司威脅唔畀Reference Letter 女同事臨走送大禮全office變天
https://hkofficedaily.com/?p=16677
《那夜，Tina投放一枚震撼彈》下集
我見到每人頭頂嘅價錢牌 前面四行同事睇緊求職網
https://hkofficedaily.com/?p=16701