「你估呢個世界淨係得李克勤識去奧脫福影婚紗相呀？我同老婆都係喺奧脫福影㗎！仲見到加利尼維利喺球場外面做訪問，不過條友好寸，我話你知吖，啲球星通常愈屎波愈寸，好波嗰啲臭馬對球迷先至最好，伊巴謙莫域嗰啲，你行埋去話影相一定同你影！」
呢番說話係我老細講嘅，雖然我唔知加利仔做過乜嘢令佢覺得好寸，但並冇影響老細一直以嚟對曼聯嘅鍾愛，佢啱啱就向全公司宣布，今個禮拜如果曼聯贏到曼城捧走足總盃，佢就會每個同事派$5,000當bonus，外加星期一唔使返公司，放有薪假一日。
有女同事幫佢計過數，呢間公司唔計老細總共有37個員工，37 x $5,000 ＝ $185,000，嘩！成20萬都嚟緊，好闊佬喎！
女同事：「場波幾時踢呀？電視係咪有得睇呀？不如曼聯贏咗你哋send個message出嚟啦，費事我星期一返咗工先知office冇人。」
仲有個師奶級同事好認真咁問：「係咪派現金先？唔好入戶口喎，房署要入息審查，一陣多咗錢要交倍半租金好麻煩㗎！」
老細聽完之後就承諾一定畀cash，仲講到明曼聯如果贏波，同事下星期一可以放有薪假，喺屋企唔使做嘢唔使覆email，而佢就會趁星期一去銀行拎現金，星期二朝早即場分錢，就算係新入職未過試用期嗰位同事都有份。
其實老細咁鍾意紅魔鬼曼聯係有段故，聽講佢超過10年前仲係打工嗰陣，試過有一次冇錢還卡數，畀一間S字頭嘅銀行打嚟追，職員同佢講再唔找就會cut卡，有機會丟去畀收數部門跟進，仲話咁樣會影響信貸評級之類。
老細話佢當時手上嘅錢真係唔夠，所以就用晒全副身家買咗場熱刺對曼聯，究竟當時點樣買？賠率有幾多？實質欠幾多卡數？呢啲佢就冇透露，淨係知佢買嘅曼聯好快落後畀熱刺0:3，絕望嘅佢直頭放棄唔睇，寧願把握時間周圍打電話問人借錢還卡數。
根據佢所講，借錢嘅過程當然有食檸檬，亦有人願意出手相助，估唔到短短一場波嘅時間就感受晒人情冷暖，而當佢成功借到需要嘅銀碼之後，竟然發覺曼聯反勝熱刺5：3，落後3球，最終反cup5球！
當時話借錢畀佢嘅朋友，個別一兩個已經轉咗數，老細即時將啲錢過返畀人，未轉數嗰啲，佢亦打電話去講唔使，總之曼聯贏波幫佢解決咗燃眉之急，自此老細就成為咗最忠實嘅紅魔鬼fans。
後來佢嘅財務狀況愈嚟愈好，學人搞生意做老細，由幾個人嘅startup發展到而家勉強稱之為中小企，又同老婆學李克勤夫婦走去奧脫福影婚紗相，咁講真，每個人鍾意一個明星或者一支球隊，開頭都係有啲原因嘅，老細呢個就同賭博有關，其實唔值得學習。
正當大家聽到有$5,000 bonus同埋一日有薪假而興奮嘅時候，有個男同事就好冷淡咁同我哋講：「㗰氣啦！曼聯贏唔到㗎！你覺得老細會大嗱嗱拎十幾萬出嚟派畀我哋咩？對手係曼城呀！星期一記得準時返工添呀！」
我覺得唔係睇開足球嘅人，的確會認為曼聯係勁啲，因為個名響啲，起碼師奶同事仲講得出碧咸，女同事亦講得出C朗（雖然一個退咗休一個離咗隊），反而佢哋講唔出任何一個曼城球員，當然啦，睇波嘅人就會知道呢幾年嘅曼城真係好勁，特別係今季。
師奶同事：「咁即係點呀？講下㗎咋？冇錢派㗎？」
男同事：「唔係冇，不過機會好微囉，馬會開盤，曼城贏得1.4倍，買100蚊賠40，曼聯就5倍幾，買100賠500幾，咁你話邊個贏面大喇？莊家點會死錯人呀？今季曼城贏過曼聯6：3，皇家馬德里聽過未呀？勁嘢嚟啦！之前又係畀曼城炒完，老細話派$5,000只係想大家一齊關注場波，佢點會唔知派錢同放假嘅機會好微吖！」
師奶同事：「超！搵笨嘅，唔怪得佢咁闊佬啦！」
又唔好咁講，學阿叔當年話齋，波係圓嘅，而且曼聯今季都有贏過曼城一次㗎！呢場又當冇發生過？何況足總盃呢啲盃賽決賽係一場過，一陣唔覺意90分鐘迫和，加時又再和，射12碼我又覺得曼聯機會大啲喎！作為食花生嘅員工，我都會捧曼聯嘅，反正自己唔係曼城fans，曼聯贏咗又有bonus，咪即管睇下星期一有冇假放囉！(完）
星期六中午12:00會有新一集YouTube，上集你哋睇咗未㗎？
