上了岸就別提海裡的事 3：前文提要，Dada完成第二日「工作」，年三十上咗Nelson屋企食團年飯，年初一再去拜年，Dada感受到自己一直缺乏嘅家庭溫暖同節日熱鬧氣氛，當然，仲有額外二千幾蚊利是，嚟到「工作」最後一日，Dada要陪Nelson去阿媽嗰邊拜年，亦即係婆婆屋企。
年初二Nelson揸車嚟接我，既然屋企都上過，咁上佢架車應該冇乜問題。
我：「你婆婆住邊？」
Nelson：「要同你個friend報平安呀？你答佢中環雅賓利大廈。」
我：「唔係，佢見我年三十同初一上你屋企都安全，冇再叫我報平安喇。」
我唔知雅賓利大廈喺邊，聽都未聽過，不過有大廈兩個字，估計係普通舊樓啦！去到先知道～～～哦，原來係半山，個名咁似油尖旺啲大廈嘅。
Nelson父母同埋阿哥家姐等人已經到咗，我去到又係逐一同咁多位打招呼，佢婆婆嗰邊又有十幾封利是，正！今次發達喇！
呢度有工人，全世界埋位等開飯，冇諗過所有人嘅焦點都喺我身上。
佢舅母：「Dada住邊呀？」
我：「深水埗。」
佢舅母：「深水埗好雜㗎喎！又污糟又多人，行親去邊都會滴水，條街又臭。」
我：「還好啦還好啦。」
佢婆婆：「你爸爸媽媽做咩工作呀？」
我：「我爸爸好早唔喺度喇，媽媽喺酒樓做傳菜。」唔知點解，我答完已經知瀨嘢，但冇理由要作埋我阿爸仲在生做經理，我阿媽做行政總監㗎嘛！
佢婆婆：「你媽媽份工幾錢個月呀？」
我：「唔知呀，冇問佢。」
佢舅母：「講起酒樓，噚日我哋去飲茶，班知客、侍應、部長，仲有傳菜啲阿嬸，個個好似烚熟狗頭咁想逗利是，我咪玩下佢哋囉！成疊利是放喺枱面，引晒佢哋過嚟講恭喜發財，不過係都唔派，由得佢哋企喺度，企到無癮自然行開。」咁仆街仲好意思拎出嚟講。
我留意到，除咗Nelson一家之外，婆婆同埋佢嗰邊啲親戚都笑得好大聲。
未嚟得切畀反應，佢舅父又問：「咁你邊間U畢業呀？」
我：「我冇讀過大學。」好想問句，係咪要讀過大學先可以坐喺度食飯？
佢舅父：「吓！即係讀到咩程度？」
我：「我中五畢業。」
佢另一個舅母又搭嘴：「咁你返咩工？」
我：「普通文職。」
佢另一個舅父：「咁人工有冇二萬呀？」
我：「普通文職冇呀。」
佢舅父：「咁你一陣食完飯要打下卡威威喎，出面露台望到半個中環，呢度好多名人住㗎！維他奶創辦人羅桂祥個孫仔啦，另外唐英年都有單位喺度。」冇人想知囉！
佢舅母：「你做普通文職應該冇咩朋友住半山啦，一陣周圍影下相啦！」
我開始有少少忍唔住：「半山好住咩？條路又斜。」
佢舅父：「斜有咩所謂，住呢度啲人都唔使用腳行。」
有句說話喺口唇邊想講～～～DLLM住呢度啲人全部跛㗎？坐輪椅所以唔使行呀！但係呢個時候，Nelson忽然喺枱底伸手輕按我手背，應該係畀signal我唔好駁嘴，Ok！收得你錢，冇理由少少嘢忍唔到。
我：「咁又係，你哋通常都揸車出入，方便好多。」
佢舅父仲未完：「我好少揸車㗎喎！我有司機。」
得喇叻喇。
食完飯，佢婆婆淨係叫我幫手執枱：「你幫Nana執啲嘢入廚房吖。」Nana係佢個唔知印傭定賓妹，我唔識分。
佢舅母：「一個Dada，一個Nana，個名都似，你哋應該可以做朋友。」
得喇叻喇。
Nelson阿爸主動幫手，同我一齊拎咗啲碗入廚房，隔咗陣佢婆婆入埋嚟，趕咗Nelson阿爸出去：「男人出去啦！呢啲嘢梗係女人做。」
Nelson阿爸無奈地返出去之後，婆婆似乎等到機會入正題：「Dada，我個孫仔好純㗎，好易畀人呃，佢以前個女朋友教書嘅，不過我都唔鍾意。」
即係點？你講到呢度突然停咗，想我點接落去？
我：「哦，係呀？」
婆婆：「我一眼就覺得你同我個孫唔夾，氣質都唔同，你唔好介意我咁講，我老人家傳統啲，唔好怪老人家，始終呢啲嘢都要竹門對竹門。」
坦白講，我反而嬲Nelson班舅父舅母講點樣玩酒樓侍應多啲，可能我阿媽之前真係做呢行，而婆婆講嘅竹門對竹門，我冇咩所謂，因為心底裡知道Nelson根本唔係我真男友，話之你肛門對肛門啦！
一萬蚊一餐飯，嚟到最後一日，忍下啦！反正以後都唔使見到Nelson媽媽呢邊啲親戚。
呢餐飯真係可以用「捱」嚟形容，終於散場走得，我舒咗一口氣。落到樓，Nelson媽媽同我講唔好意思，佢冇講太多，只係講咗句：「你唔好介意，佢哋好多嘢講。」
Nelson家姐都話：「係咁㗎佢哋，把口唔收，我第一次同老公上嚟食飯，情景都差唔多。」姐夫點頭表示認同。
Nelson阿哥：「不過我哋唔係咁，放心。」
我：「唔緊要，好小事。」
Nelson一直拖住我隻手，向我報以微笑。
Nelson阿爸：「Dada好乖呀，又冇發脾氣，換轉係我，即刻走人喇。」
Nelson全家幾乎同一時間講咗句：「慳啲啦你！」
我哋全部人笑得好開心，將頭先食飯嘅不快同沉默一掃而空。
Nelson阿爸：「我月底又要去醫院呀，到時Dada同Nelson陪我去好唔好呀？」
我想答好，但突然記起～～～合約完咗喎，要睇老細點計。
Nelson搶答：「好呀，到時我哋陪你。」
我冇將詫異表情流露，只係內心盤算係咪又收一萬蚊？定係撳住搶加個double？
Nelson姐夫嘅七人車一次過車晒其他人，Nelson就車我一個返屋企。得返我同佢兩個嗰陣，我開口問：「去醫院單嘢係點？」
Nelson：「我想問下，你願唔願意做我女朋友？」
我：「做緊囉，一係醫院嗰次收平你，跟平時出街plan啦！」
Nelson：「唔係……不過我想講清楚先，唔係想慳出街錢，我真心想你做我女朋友，我指……我哋真係拍拖，你會唔會拒絕我？」
我冇諗過，太突然，咁樣算唔算示愛？
投稿讀者：Dada
上了岸就別提海裡的事 1 👉 https://hkofficedaily.com/?p=15429
上了岸就別提海裡的事 2 👉 https://hkofficedaily.com/?p=15439