真係冇諗過做Admin竟然要負責向供應商”R” 禮物同埋”R” sponsor，因為公司嚟緊會搞個聖誕加新年嘅party，到時會有大抽獎環節，不過你搞還搞，點解要員工出面周圍問人攞著數呢？想抽獎咪自掏腰包買禮物囉！
「年年都係咁㗎，你今年係新人已經唔使點”R” ，之前我哋仲慘呀，有個供應商我3年冇同佢訂過嘢，老細都落order叫我打去問人，冇㗎，係咁同人講唔好意思囉！」我個Admin同事好似安慰緊我，但佢同時都安慰緊自己。
我：「不過呢份”R” sponsor嘅list真係……好似呢個辦公室文儀用品供應商咁吖，今年我淨係同佢訂過一次文具，睇返record係$638，換言之我淨係畀過$638嘅生意對方，都唔知佢淨賺幾多，而家仲要”R” 禮物？」
Admin同事：「$638咁多？都話我要”R” 嗰啲供應商係直情幾年冇做過生意，我覺得唔係”R” ，根本係乞，連對方都寸我，問我公司點解咁窮仲要搞抽獎，又唔自己買禮物，要打嚟搵佢呢啲小商戶乞，我覺得好瘀。」
厚住面皮打畀啲供應商，打咗20間，得2間肯sponsor，有一間贊助盒裝茶包，另一間就贊助單行簿同原子筆……其實就算畀我哋”R” 到又點呢？聖誕新年party用呢啲嘢嚟抽獎？人唔笑狗都吠啦！
仲有一間都講得好白，佢知道我”R” sponsor之後咁樣講：「嘩！你又真係好意思打嚟問㗎喎，知唔知你公司同我哋訂過啲咩呀？5個垃圾筒，你自己check返record呢5個垃圾筒幾多錢？仲要係3月嘅事，而家幾多月？12月喇，你哋訂過啲咩呀？」
另一間仲寸，佢聽到我打嚟幫公司”R” sponsor ”R” 禮物之後，第一個反應係咁：「幾風趣喎你哋！ 今朝食淨半件三文治，畀你公司抽獎好唔好？腿蛋治嚟㗎！你包返保鮮紙擺入雪櫃，聖誕節叮一叮可能仲食得。」
我冇出聲，不過唔係嬲佢，我係嬲自己公司，但係對方見到我唔出聲都補充多句：「唔係話想寸你呀小妹妹，叫你老細豪一千幾百出嚟，買啲惠康劵，百佳劵，50蚊100蚊都有㗎，呢度都抽到好多個獎啦，同事收到又開心，你打嚟問sponsor我都唔知送咩畀你哋。」
我：「其實點解老細要我哋Admin走去”R” 禮物呢？我真係覺得好冇面，問自己朋友借錢都冇咁失禮。」
Admin同事：「因為以前好景嘅時候，我哋公司都同啲供應商訂幾多嘢，曾經有一年”R”到個供應商送部playstation畀我哋抽獎，嗰陣時應該都係第一第二代，同埋以前老細成日周圍飛，長期幫襯一間旅行社，對方試過送長隆車飛加酒店套票，而家冇啦，呢兩年幾都冇飛過，好現實嘅，你冇生意畀人，人哋生意又唔好，點會送畀你吖，有親咩！」
我社會經驗唔多，之前做嗰間公司都有搞聖誕聯歡會之類，嗰陣嘅玩法係同事之間互相送禮物，budget係$500以內，大家買完就拎返公司互抽，我仲記得自己抽中過無線耳機，其他人嘅禮物有酒、office健康坐墊、維他命丸、電話殼……等等。
嗰陣我覺得幾好玩，同事如果唔鍾意份禮物，仲可以私下交換，公司就出錢叫啲好食嘅到會返嚟，不如咁樣搞仲好啦！唔止打成一片，感覺上仲冇咁cheap，而家叫供應商送嘢做抽獎禮物，暫時望落去最大嗰份係A4紙……
Admin同事仲同我講，畀供應商寸之餘，仲會畀同事寸，因為有一年供應商送咗批零食畀我哋抽獎，初時冇為意，party當日有同事抽到，發現原來已經過咗期：「過咗期3個月，結果要親手丟咗佢，真係搵嘢嚟做。」
其實都唔怪得人嘅，冇幫襯仲要叫人哋送禮物嚟抽獎，對方唔講粗口都算好有修養㗎喇！其實搞party搞到咁樣衰好似乞咁，不如唔好搞啦，求其叫啲外賣到會返嚟食下咪算囉，再唔係畀員工大時大節提早半日收工，班同事仲開心啦！
我Admin個阿姐後來喺個位大嗌：「Wow！我”R”到禮物喇，有兩大箱咁多，應該夠抽獎。」
我：「咁犀利？咩嚟㗎？」
Admin阿姐：「有一箱口罩，仲有一箱蓮花清瘟膠嚢。」
嘩！多謝晒喎，阿姐今次真係立大功，我相信老細見到有成箱蓮花清瘟膠嚢用嚟抽獎肯定好開心，諗諗下收到A4紙都唔係咁差，起碼可以拎返屋企畫畫，即管睇下到時邊個同事有幸抽中蓮花清瘟膠嚢，希望唔係我啦！