一早返嚟，同事已經發晒火，可能受咗好多冤枉氣，竟然鬧返個客轉頭：「小姐，你噚晚8點幾email畀我，叫我今朝10點半send最少5份CV畀你，冇可能㗎！我都有私人生活，放咗工唔係老馮幫你做嘢，唔係下下都要迎合你口味，滿足你喜好，你叫我做嘢絕對冇問題，但要畀合理同埋充足嘅時間，唔係做客就代表大晒。」
有啲嘢無需爭議，office hour以外都想你即時為佢服務，死罪！畀嗰少少錢當自己係大爺，提出唔合理嘅要求，死罪中嘅死罪！有人肯拋棄自己嘅生活同底線，走去奉承呢啲西客係佢哋嘅選擇，但唔代表全世界要圍住你轉，我同事小得好，小得有道理。
只係經驗話畀我知，通常啲西人西客就算點樣理虧，佢哋都唔會覺得自己有問題，西人邊有同理心㗎啫，有同理心就唔會咁西啦！
果然不出所料，西客真係唔忿氣，搵咗個更大粒嘅人寫咗封英文email嚟投訴，同事叫埋我一齊睇，睇完第一段已經冇心機，廢話連篇，虛偽公式，不過我同事仲想回返個email再爆對方一鑊，我叫佢唔使嘥精神嘥手力，因為就算幾有理據都好，人無恥便無敵，對方始終會將仆街嘅行為合理化，你幾時見過西人西客會認自己有錯？有問題嘅永遠係其他人，佢哋一定係啱晒㗎啦！
遇到職場PK，口舌之爭冇用，敬而遠之就夠㗎喇！最後同事將個大粒佬嘅投訴信一9 click去垃圾桶，冇眼屎乾淨盲。
思想唔係同一高度，冇必要去互相說服。