MK妹contract完結走咗，公司生意仲好過之前：「初初想叫你轉佢做長工，因為我覺得佢腳頭好，點知你咁狠心唔續約。」
Barry：「公司好，我唔好呢！佢好貪玩，勁鍾意飲酒，試過幾次佢話同朋友出去飲嘢，然後音訊全無，第二日着返同一套衫返工。」
Paul：「唔通畀帽你戴？」
Barry：「佢默認咗啦！其實都知㗎喇，有次我join佢班friend飲嘢，佢同啲仔玩到過晒火，完全當我冇到，你話呢啲係咪代溝呢？我同佢相差7年啫！」
我：「雖然你都係33，不過佢太細個喇，7年喎，唔好話代溝，活力都有段距離，咪再溝小妹妹喇，你老喇！」
以為Barry經一事長一智，點知隨住公司愈做愈大，請多咗幾個女同事之後，條友仔嘅魔性又再重現。
Barry：「覺唔覺得Olivia好正？」
我：「轉咗口味喎，唔再鍾意MK類型。」
Paul：「條友仔肯定見過鬼怕黑啦！」
Barry：「上星期我買咗條手鍊畀佢，點知Olivia拒收，佢話自己唔鍾意戴手鍊，咁我話不如買Apple Watch啦，佢又話唔要，話睇時間慣咗用電話。」
我：「銀彈政策唔係個個女仔都適合，死咗條心啦！」
Barry：「冇可能，Olivia唔受誘惑，係因為佢未試過收好貴嘅禮物，未試過食一餐好貴嘅飯，冇得比較之下先會不為所動。」
當時我唔知Barry講乜，不過後來我明白喇，有一晚佢約到Olivia出去食飯，兩條友去Omakase，人均3000蚊一個餐，埋單6千幾。
Barry：「佢好開心呀，話睇過好多Youtuber食，但係千幾二千蚊已經覺得好貴，因為佢食開爭鮮，所以人生第一次食Omakase覺得好正，冇諗過可以食得咁豪。」
唔夠幾日，Barry又帶咗Olivia去食Teppanyaki，唔止燒和牛，仲有燒龍蝦同鮑魚。
Barry：「好食還好食吖，見啲鮑魚喺鐵板度熱到扭下扭下，我都覺得殘忍，點知Olivia個衰妹仲笑住影IG story，因為叫咗好多清酒，埋單仲貴過上次Omakase。」
冇幾耐，Barry又帶Olivia去一間好出名嘅五星級酒店食tea，又係嗰啲老土嘅層架，配以食完會有糖尿病嘅鳩cake，仲有幾嚿唔知咩事切到好細，但味道同便利店出品相差冇幾嘅三文治。
Barry：「而家啲酒店好意思灑少少金箔上去就賣二千幾蚊個tea set，食完我都唔知食咗啲乜，不過Olivia好開心呀，影咗100張相都有，仲話啲friend覺得我對佢好好。」
餐餐都窮奢極侈，我都冧啦！而當時我哋三兄弟因為搵到錢，其實已經分別置業，事關我同Paul都準備緊同女友結婚，Paul年中結，我就年尾結，不過我哋三個之中就得Barry一個買車，佢要威吖嘛，我都想買㗎，可惜畀另一半制止。
Barry：「有靚車坐都要制止？Olivia不知幾鍾意坐我車，佢話終於唔使迫巴士迫地鐵。」
我：「咪住先，我有冇聽漏啲嘢？你哋開始咗嗱？」
Paul：「你聽唔出㗎咩？佢上次話食二千幾蚊金箔扮嘢鳩cake，Olivia啲friend讚佢好好，已經係暗示拍緊拖啦！」
Barry：「其實再早啲，燒鮑魚嗰晚已經開始，大家飲咗好多清酒，冇再咁拘謹。」
飲酒食鮑魚，呢個進程都合理嘅，只係來得快又去得快，公司成班同事出席完阿Paul婚禮之後，Barry竟然同Olivia分咗手。
我：「點呀情聖，Olivia轉唔轉permanent？定係又約滿唔續呀？我唔敢決定呀！」
Barry：「分咗手啦！佢話唔想再見到我，如無意外，Olivia應該會自己辭職。」
原來Olivia同Barry拍拖唔夠半年已經表示想結婚，理由係自己已經27歲，希望30歲之前可以有小朋友。
Paul：「其實女人去到呢個年紀想結婚好合理嘅，如果你哋真係夾，咪考慮下囉！唔好拖住人吖嘛！」
Barry：「仲好講，出席完你個婚禮，Olivia更加恨嫁，你知唔知佢夾硬拉咗我上佢屋企食飯見家長，嗰晚我第一次見佢老豆老母咋，佢老豆已經問我哋打算幾時結婚，好大壓力呀！」
見家長當晚，Barry再同Olivia強調唔想結婚住，因為覺得自己未定性未玩夠，Olivia就顯得好嬲同埋好失望，仲話如果唔係以結婚做大前提，不如唔好再一齊。
其實Olivia應該一半認真，一半就想Barry氹，但係兩個人及後不斷因為結婚問題嘈交，所以愈搞愈唔開心，繼而冷戰，分手，再面阻阻，Barry嘅估計亦都冇錯，Olivia自己走嚟遞辭職信。
咁抗拒結婚，除咗係未玩夠，仲有一個好大嘅原因，我同阿Paul都知少少，只係當年唔敢問。
Barry：「你哋記唔記得當年我大佬結唔成婚？」
Paul：「記得，你嗰陣叫我幫手搵Canon in D嘅音樂，話阿哥擺酒嗰晚想播，畀完隻碟你第二日就話阿哥結唔成婚，我都唔敢問發生咩事。」
我：「其實我都唔敢問，嗰陣知你全家都好煩。」
Barry阿哥自己搞生意，打算結婚嗰年原來有啲挫折，佢阿哥間公司蝕咗好多錢，因為好心煩，佢兩兄弟有一晚去飲嘢傾偈，Barry阿哥少少醉，一上的士已經瞓着，落車之後Barry叫醒佢，佢阿哥第一時間好緊張咁睇電話，total有10幾個missed call，話口未完電話又到，係「未來阿嫂」打嚟興師問罪，唔係關心佢阿哥去咗邊，而係睇中咗一張幾萬蚊嘅按摩椅，用佢阿哥張卡上網買緊，需要銀行send嚟嘅sms code去完成交易。
生意唔好已經為錢煩，當時又醉醉地不在狀態，Barry阿哥就提議返上樓洗個面再講，但「未來阿嫂」唔肯，一路喺電話度糾纏，結果兩條友就隔空鬧交。返到屋企，阿哥電話又響，今次係「未來外母」打嚟，一輪咀係咁問Barry阿哥點解要鬧佢個女，又話之前買樓已經講咗要間700幾尺，最後揀咗間500幾尺好委屈佢個女，而家買張按摩椅都拖拖拉拉好小家。
Barry：「我阿哥唔知係醉咗定係太大壓力想有人分擔下，佢全程開speaker，亦全程處於捱打狀態畀未來外母鬧，啲說話同語氣仲好難聽，我都替佢難過，又唔可以插嘴，然後阿哥嬲得滯，成部電話掟落地下。」
我：「跟住點呀？」
Barry：「跟住我咪話呢部iPhone嚟㗎，好貴㗎！唔係Nokia呀！」
Paul：「我哋係問你阿哥跟住點呀！」
Barry：「跟住咪冇結婚囉，阿哥第二朝起身，打去取消酒席、打去話唔要啲結婚相、叫阿媽拎啲龍鳳鈪去溶，總之退得返嘅嘢退晒，退唔返就cancel，同我阿爸講咗句唔結婚就一條友買機票去歐洲旅行，其實我知阿哥抑壓咗好耐，生意出問題固然心煩啦，佢女朋友嗰邊仲好多要求，禮金要6位數，酒席分錢嗰啲嘢都嘈過幾次，我阿爸阿媽一早好反感，又叫我阿哥買層唔需要咁大嘅樓，又要換過部新車，本來一切都係唯命是從，但可能太多壓力同一時間嚟啦，我見阿哥嘅情緒真係爆晒煲。」
雖然嗰次悔婚事件唔係發生喺Barry身上，不過對佢嘅陰影就好大，Barry曾經話過，如果用把槍指住佢，要喺食屎同結婚之中揀一樣，佢會揀食屎。
Barry：「點解唔可以一世拍拖啫，婚姻係一張紙之嘛！」
Paul：「麻煩你唔好喺我老婆面前講呢句。」
我：「係喎，我年尾結婚都想用Canon in D隻音樂，隻碟而家喺邊個度？可唔可以過落手指畀我？」
Canon in D本來係Barry阿哥打算喺婚禮上面用，可惜最後用唔著，Paul個老婆就冇揀呢首音樂，仲以為我可以喺自己個婚禮度播啦，點知世事無絕對，率先用Canon in D進場嘅竟然係Barry……
（未完待續）
《Canon in D》1 三兄弟請女唔請仔
https://hkofficedaily.com/?p=19070
《Canon in D》2 對結婚存在陰影
https://hkofficedaily.com/?p=19079
《Canon in D》3 音樂響起 新郎眼淚流下
https://hkofficedaily.com/?p=19087