由於我女友嘅爸爸急病走咗，當時距離婚期少過3個月，老人家話紅白相沖過度期係100日，雖然後生仔女唔迷信，不過長輩出到聲，我哋亦決定延期，只係冇諗過Barry竟然喺無預兆下爬頭，講到咁你都估到啦，其實佢都唔想嘅。
Barry：「我下個月結婚，想搵你哋做伴郎同兄弟。」
我：「真㗎？恭喜晒喎！又話唔想同Olivia結婚嘅，而家又咁突然。」
Paul：「我仲以為你哋分咗手，原來未斷㗎？唔通Olivia有咗？」
Barry：「係就係有咗，不過唔係Olivia，係Hannah呀！」
我同Paul驚訝到講不出聲，但係都要解釋下先，Hannah係我哋公司另一位女同事……
Paul：「有冇興趣解釋下來龍去脈？我接受唔到，你同Hannah幾時開始㗎？你係咪當公司係夜總會？」
Barry：「嚴格嚟講我哋冇開始過，呀，不過知道有BB之後，而家開始咗喇，兩個星期前開始，我都要少少時間消化先可以同你哋講。」
我：「係咪幾個月前公司個gathering？當時請晒全部同事去食飯飲嘢，我記得你啱啱同Olivia分手，Hannah嗰排又好唔開心，聽講佢又係同條仔分手，我哋成班人走嗰陣你仲同Hannah喺度飲悶酒，唔係嗰次啩！」
Barry：「係嗰次喇。」
Paul：「即係你幾個月前某一晚同Hannah酒後亂性，最近知道有咗，所以奉子成婚？」
Barry：「雖然我唔想結婚，不過而家講緊嘅係小生命，大人點樣都好，唔應該搞到個小朋友，可能係個天要懲罰我啦！呢鑊真係閻王要你三更死，誰敢留人到五更。」
你話幾諷刺，嗰頭Olivia迫婚所以分手，呢頭就搞大Hannah個肚而閃婚，更諷刺嘅係，Hannah並非Barry鍾意嘅類型，直接啲講就係瘦底，綽號「零波麗」。
人生、命運、宿命……
其實啱啱發生呢件事嘅時候，我覺得Barry係有少少抑鬱，為咗開解佢，我講咗一個故事畀佢聽，關於我阿爸阿媽。
我：「話說我阿媽早幾晚屙夜尿，起身發覺阿爸自己走咗出廳，當時阿爸拎住支啤酒，好憂鬱咁望出窗外睇風景，然後阿媽就覺得好奇怪問咩事。」
Barry：「你阿爸有外遇？」
我：「聽埋先，阿爸當時問阿媽記唔記得以前拍拖嘅開心日子？阿媽話記得，跟住阿爸又問佢記唔記得當年點解會結婚？阿媽都話記得。」
Barry：「世伯伯母又係奉子成婚？」
我：「唔係，佢哋讀緊書已經拍拖，有一日阿爸上咗阿媽屋企搞嘢，點知中途我阿公無端端殺返屋企撞破佢哋嘅好事，聽講入廚房攞咗把菜刀，講明一係報警，一係要我阿爸娶阿媽，當時佢哋都未夠秤，我阿爸擔心衰十一，所以答應一畢業就結婚。」
Barry：「雖然個case有少少唔同，不過我想約你阿爸飲酒，係喎，咁你阿爸半夜飲悶酒係咩事？而家先嚟後悔？」
我：「佢對住阿媽講，如果當年佢選擇坐監，而家都應該坐完兩轉，可以返出嚟呼吸自由空氣。」
唔知大家get唔get到我阿爸嘅唏噓，但係Barry就笑到收唔到聲，係囉，就嚟結婚喇，雖然係奉子成婚，不過都開心啲啦，而家叫你食屎咩！唔係喎，Barry之前真係講過，結婚同食屎，佢揀食屎㗎喎！
做人有時真係錯有錯著，你唔識揀唔肯揀，個天會幫你揀。
事實證明我阿爸冇娶錯阿媽，佢哋感情好好，可以共患難，亦可以共富貴，原來Hannah都可以，佢兩個拍拖嘅次序雖然調亂咗，但結婚前總算公開情侶關係，正正式式喺埋一齊，有次Barry帶Hannah去之前嗰間Teppanyaki燒龍蝦燒鮑魚，埋單又係幾千蚊，結果畀Hannah鬧足幾日。
Barry：「賺到錢食好啲有咩問題呀？佢話唔係賺唔賺到錢嘅問題，係抵唔抵嘅問題，仲話有錢唔一定要咁用，喂呀，唔好咁冇情趣啦，我想放鬆下呀！」
我：「將來你會明白Hannah呢種女人先至係寶，呢種老婆先可以令你真正放鬆。」
好明顯，初初Barry係唔明，特別係佢同Hannah個婚禮播起Canon in D嘅時候，我見Barry喊到豬頭瀝咁，作為伴郎嘅我喺旁邊問咗一句：「有冇咁感動呀？新娘都未喊，你喊得咁淒涼？」
由於Hannah都喺度，Barry唔方便作答，但係做咗咁多年兄弟，佢望咗我一眼啫，一切已經盡在不言中，得！唔使講嘢！
呀Paul老婆都有份出席婚禮，佢喺台下同阿Paul講：「好後悔我哋結婚冇用Canon in D進埸，見到你老友Barry喊到咁，我都覺得好感動呀！」
緣份天注定，做咗人爸爸嘅Barry定性咗好多，完全絕跡夜場，一放工即刻返屋企慰妻，有仔萬事足。
我同阿Paul會定期關心Barry嘅精神狀況，最近一次我問佢：「呢排個仔點呀？Hannah呢？而家適應晒啦，成家立室之後係咪好開心呢？」
Barry：「開心，梗係開心啦，而家我鍾意洗碗就洗碗，鍾意洗廁所就洗廁所，鍾意收埋部PS就收埋部PS，鍾意戒酒就戒酒，幾開心呀！人生幾咁圓滿呀！唔講喇，趕住晾衫，老婆睥住我，聽日返office再傾啦！」
開心咪好囉！我哋公司都冇再請contract喇，全部轉晒permanent，三兄弟都結晒婚，多一事不如少一事啦！
（完）
《Canon in D》1 三兄弟請女唔請仔
https://hkofficedaily.com/?p=19070
《Canon in D》2 對結婚存在陰影
https://hkofficedaily.com/?p=19079
《Canon in D》3 音樂響起 新郎眼淚流下
https://hkofficedaily.com/?p=19087