「新同事呀？代Eunice？」一個出咗名八卦嘅同事，喺Pantry斟水時遇見我同阿Yen，其實喺一間公司做得耐，你自然會識分邊啲人純粹打招呼，邊啲人真係關心你，邊啲人係存心chok料。
阿Yen怕怕醜醜自我介紹之後，個八卦同事仲未肯放過佢：「之前喺邊間公司做呀？」
我代答：「阿Yen之前唔係做呢行，新人嚟㗎。」
八卦同事：「哦，外國返嚟？邊度畢業？我理工，唔係香港嗰間喎，係麻省理工，MIT，哈哈哈！」
哈乜嘢啫？其實佢用呢種方式強調自己係麻省理工畢業已經唔係第一次，當初我入嚟做已經聽過，究竟係覺得好幽默定係好威呢？
咁啱得咁橋，阿Yen隔咗幾日就遞辭職信，我問過兩件事有冇關連，阿Yen話冇，又話原本返咗幾日工已經想resign，最終捱到兩個星期後嘅今日先開口。
小職員辭職好少會驚動老細，但係阿Yen有啲唔同，唯有向皇上啟奏備一備案，老細聽完之後直接打內線叫阿Yen入房，我想出返去先，不過老細叫我留低幫口。
阿Yen一入房就不斷say sorry，佢解釋係自己做唔掂，始終目前嘅工作同以往好唔同：「而家公司請緊Business Analyst同埋IT Support Analyst，我完全未接觸過，連CV都唔識揀，想像唔到之後可以點樣in人，我冇信心呀！」
老細：「再堅持多一陣啦，你嚟咗兩個星期之嘛，如果三個月內你仲認為自己唔得，仲係對自己冇信心，我畀你一日通知就可以走，不過記住，有啲嘢你唔一定要有信心先至做，但你要做，先至會有信心。」
呢番說話唔止鞭策阿Yen，仲鞭策埋我，因為我都有好多嘢唔敢做同埋冇信心，但係你唔開始，又點會變得有信心呢？
入職頭兩個星期，阿Yen不時流露苦惱同焦慮嘅表情，我估佢每日返工都好多掙扎，但自從聽咗老細嘅勉勵格言，情況明顯有所改善。
之後嘅第三第四個星期，仲有第二個月同第三個月，阿Yen一樣會被工作難倒，一樣會因為唔夠信心而顯得小心翼翼，不過就變得好堅持，遇到唔明嘅嘢會不恥下問，我仲見到佢係咁上網查字典同埋google，好有決心克服所有嘅難題。
除此之外，阿Yen亦有報名讀書，join咗個夜間兼讀制嘅人力資源文憑課程，後來佢對勞工法例仲熟過我，另外又進修英文。
點解我咁清楚？因為我教佢攞持續進修基金囉，點解唔善用呢啲資源呢？
有次我叫阿Yen唔好咁搏，唔使因為「麻省理工」嗰種同事而迫自己讀呢樣讀嗰樣，量力而為就得喇。
阿Yen：「嗰件事？我忘記咗喇，反而老細嗰次話唔一定要有信心先至做，但你要做，先至會有信心，係呢句激勵咗我，記唔記得曾經同你講過，我一直想轉做文職但冇人請，其實係因為以前做Sales好攰，唔係體力上攰，係個心好攰，Area Manager捽數捽得好犀利，加上公司行私佣，同事間難免會有啲心病同鬥爭，月復月都係咁，我問過自己好多次，到30歲仲捱到？40呢？50嘅時候又點？就算升咗做Area，咪一樣要畀公司捽數，然後再做醜人向舖頭班Sales施壓。」
我：「有個朋友都係做Sales，經歷同你差唔多，不過搏還搏，記住唔好咁辛苦，見你日頭返工夜晚讀書，留返啲時間畀自己吖嘛！」
阿Yen：「如果而家唔抽時間去改善自己嘅生活，將來就會用更多嘅時間去應付自己唔想過嘅生活，我計過數，寧願而家辛苦，第日慢慢hea返夠本。」
呢隻女係咪好識諗呢？
其實每個人轉工或者轉行都有一段迷惘期，需要好長時間適應，當中一定會有放棄嘅念頭，但更重要係搵一個堅持落去嘅理由。
而家阿Yen應付interview已經冇乜問題，英文雖然未勁過「麻省理工」，不過一般對答同埋Email嘅用字grammar都好ok，最起碼有信心講同埋寫，唔會怯場。
有樣嘢不得不讚，講盡責同埋上心，阿Yen更勝公司裡面一啲所謂名牌大學畢業嘅人，一個人得定係唔得，好定係壞，唔係靠一張沙紙去定奪，只係現實世界要用證書做入場券，冇呢張入場券，就連展現自己實力嘅機會都冇，所以阿Yen好感激老細當日嘅知遇之恩，而老細最初又係想報恩，你兩個打和啦！
不過我應該係Boss之報恩嘅最大贏家，因為阿Yen真係好幫得手，佢scan CV都幾準，近年公司離職率低咗，阿Yen功不可沒。
「如果而家唔抽時間去改善自己嘅生活，將來就會用更多嘅時間去應付自己唔想過嘅生活。」我都計過數，阿Yen改善咗我嘅生活，有佢喺度，我冇以前咁忙。