「係呢，你叫咩名呀？」「見邊個position呀，我見呢間公司有幾個位都請緊人。」「咁你住邊呀？」「平時有咩嗜好呀？我鍾意行山，不如下次一齊行吖，有幾條路線好啱女仔打卡㗎！」「你呢隻香水好香喎，介唔介意講係咩牌子？」「我覺得你染頭髮可能會仲好睇喎！」
我係公司嘅receptionist，當時返緊工，唔係落咗酒吧飲嘢，所以聽到以上對話都忍唔住要望下發生咩事，原來係一位男求職者不斷騷擾緊另一位女求職者，你都得㗎喇，等緊見工仲有心情溝女？有冇猴擒成咁呀？
其實疫情之下個個都戴晒口罩，你憑咩咁肯定對方係靚女呢？我觀察咗一陣，原來個男仔係睇中人哋條腿，我喺reception望到佢係咁望個女仔隻腳，仲要好明顯下，唔肯定個女仔知唔知，因為男方不斷講嘢嘅時候，女方擺明唔想答所以避免有眼神交流。
個女求職者並冇著得特別性感，只係一般formal嘅外套加短裙，我公司啲女同事個個都係咁上下，如果咁樣已經色心起，第時請咗你咪日日流鼻血，行落中環做痴漢都有份喎！而最搞笑嘅係，佢哋等interview期間，有同事行出行入去廁所都留意到個男仔溝女，因為嗰堆問題真係太突兀喇，我個枱頭電話隨即有內線打嚟。」
「喂，出面嗰一男一女咩事呀？上嚟sell嘢定係見工？」有個阿姐級同事打出嚟問我。
我：「見工㗎，佢兩個都唔識 ，係個男嘅不斷撩個女仔之嘛！」
「如果你覺得個女仔feel uncomfortable，一係叫個女仔入去裡面等啦！」
我：「我諗要喇，因為個男仔主動坐近咗佢，隱約聽到佢想抄牌攞電話。」
先生，你都真係幾猖狂，瘋狂望人條腿仲想拎電話做朋友？我即刻行埋去叫個女仔入裡面間房等，睇得出個女仔有種解脫嘅感覺，梗係啦，喺街喺酒吧畀人搭訕可以不理，而家去緊人哋公司見工，環境咁侷促要對住個痴漢，走咗去又唔係，發爛渣又唔係，都咪話唔尷尬。
說時遲那時快，HR亦剛好出嚟叫個女仔入去interview，以為可以還我清靜啦！點知我坐坐下條仔行埋嚟reception：「Hello，呢度返工都幾好喎，樓下有好多嘢食，有平有貴。」
我：「你坐返埋去等啦，唔好阻住我做嘢。」死開啦！真係請你先講啦！
佢好無癮咁行開，過咗20分鐘左右，之前個女仔見完出嚟，呢位男求職者即時眼甘甘望住，睇到佢係由下至上掃射人哋條腿，仲指一指個手提電話，我get到係仲未交換number，你係咪short㗎！好在佢冇機會，因為個女仔扮睇唔到，而HR又同一時間叫佢入去in，恭喜你呀女，終於脫苦海喇！
到個男仔in完出嚟，我問個HR會唔會請，因為諗起都覺得恐慌，HR話請個女仔，唔會請個男仔，除咗頭先有其他同事話佢知撩女仔單嘢之外，個男仔interview嘅表現亦都好差，講嘅嘢虛無飄渺，最後係咁易問佢仲有冇咩問題，個男仔竟然問：「公司會唔會唔畀同事拍拖？」
我：「問呢啲？」
「係呀，我都係第一次遇到求職者問呢啲。」
我：「好在你頭先及時叫個女仔入去in咋，個男仔問緊佢拎電話。」
「我知呀，出嚟之前阿姐話咗我知，Interview都咁，請咗仲得掂嘅！」
咪係囉！女可以慢慢溝，搵到份工先啦，有邊個唔鍾意睇美腿？我係女人，見到人哋對腳靚都會望多幾眼，但要分場合吖嘛！佢望到人哋絲襪都穿咁滯，呢條友真係危險人物。