其實失業呢一年多啲嘅時間，我都做咗好多以前冇時間做嘅嘢，例如修補屋企裂咗嘅牆身，批灰搞咗啲發霉嘅地方，解決咗廚房水喉嘅滲漏問題，再換埋個壞咗好耐嘅房門鎖，原來我一直以嚟掛住返工，忽略咗屋企咁多問題。
我仲有陪老婆去行山，想當年為咗追佢，都有投其所好陪過佢幾次，後來因為全力喺事業上打拚，唔好話行山，連普通如跑步呢類運動都冇做過，失業期間同老婆由最小學級嘅嘉頓山行到龍脊、鶴咀、破邊洲、魔鬼山，我先發現原來香港有咁多好風景。
重新搵返生活，但始終未能重新踏入職場，interview已經少，仲要畀人寸畀人質疑，老實講自信都跌到最低點，所以後來再有一份工去見嘅時候，雖然嗰間只係中小企，但我真係冇乜把握。
Interview一如以往見HR，但係見見下有個男人走咗入嚟，原來係老細，但其實呢個老細都係40幾歲，雖然呢樣係後來先知，不過當時睇樣都知道佢後生過我。
個老細一直都係旁聽，冇出聲，最後HR問我有冇啲咩問題想問返佢哋，我冇嘢問，反而係有嘢想講。
我：「其實我大致都清楚，因為上嚟之前都有做功課，了解過貴公司係做啲乜，好多謝你哋畀個機會我上嚟interview，你見我都失業咗超過一年，坦白講之前見咗幾份工，對方都係嫌我50歲年紀大，但我想講年紀唔會影響工作能力，好希望有機會收到你哋嘅好消息，好希望有機會入嚟呢間公司做嘢。」
嗰個全程冇講嘢嘅老細忽然開腔，不過佢第一句說話就已經係粗口：「屌！」
嚇親，當其時我真係嚇親，唔使屌下話？
老細繼續講：「50歲之嘛！有幾大呀？又唔係七老八十，買勞保同醫保都冇問題啦，有咩問題啫？我都40幾，同你差唔得幾遠。」
我仍然係嚇親，原來佢屌嗰下，係想話50歲唔係咩大問題。
我：「點同呀，你係老闆吖嘛，之前我去見工，都有唔少人質疑我老，質疑我點解成年都搵唔到嘢做，問我係冇搵定係冇人請。」
老細：「你要畀啲自信，實話實說就得，唔理解你嘅公司唔請你仲好啦，而家環境差，個個打工仔都知道，又或者對方係想問下你呢段時間嘅經歷，想睇下你對工作仲有冇熱誠。」
雖然我好肯定之前唔請我嗰兩個HR並非出於關心，不過眼前呢位老細嘅解說，多少都可以令我釋懷。
老細又繼續講：「而家香港咁嘅情況，如果仲質疑你空窗期太長，個HR肯定活喺溫室𥚃面，市場認知度好低，所以你照直講就得㗎喇，正常嘅公司一定會接受你嘅解釋，最緊要你自己見工唔好怯場，加油呀！」
佢最後嗰句「加油」，其實我暖在心頭，但同時又寒一寒，因為個語氣就好似：「我哋就唔請你㗎喇，你再出去搵工就加油啦！」
隔咗一日，原來我嘅猜測係錯嘅，呢位老細講嘢所留低嘅引子真係好易令人誤會，就好似佢「屌」嗰下咁樣，我以為佢係睇唔起我50歲，但實情係想講50歲根本冇問題，而佢最後一句「加油」，亦都冇咩特別意思，因為個HR打咗嚟叫我返工，失業超過一年，我終於搵到工喇！
一來係感激知遇之恩，二來係作為新公司最年長嘅員工，我絕對唔可以成為大家眼中最討厭嗰種老屎忽，所以我比任何人都更努力，亦盡力去揣摩工作，唔想為其他同事帶嚟麻煩。
以前我係負責宣傳同埋臨場嘅嘢，而家呢間公司因為規模相對上細，所以我連銷售嘅部分都要做埋，係吃力，不過enjoy，難得有機會，我就好似個新人一樣，每日都吸收緊好多新事物。
其實每個人都會老，所以老唔係問題，最緊要老而不廢，有啲人老咗仍然受到尊重，有啲人老咗反而愈嚟愈乞人憎，分別就在於此。
今次失業，令我深深體會到幾件事，首先唔好因為喺本身嘅公司或者行業撈咗好耐就覺得自己好叻，離開咗熟悉嘅環境同埋崗位，出到去其實甚麼都不是。
其次係有咩想做，有咩地方想去，記得活在當下，踏出呢一步啦！我以前做嘢成日忽略屋企人，好多年冇同佢哋去旅行，以為失業會得閒啲，但就算唔係疫情影響，冇工作嘅情況下要我去旅行都去得唔安樂，又擔心冇錢，又擔心搵工行唔開，所以要等「有時間」係永遠都等唔到，關鍵在於平時喺工作同生活上取得平衡，唔好等到失意患難時先察覺身邊嘅人有幾重要。
最後係中年甚至老年先走嚟失業，唔使對前景同人生絕望，有手有腳肯做絕對唔會餓死，問清楚自己係搵唔到，定係唔肯放下身段，伯樂同埋識得用你嘅公司未必會時時出現，咪做住其他嘢等機會囉！
如果有人而家失緊業，搵工搵到好灰心，希望會諗起我呢個50歲，用咗超過一年時間搵正職嘅人，既然我都得，你又點會唔得？