對住嗰位奸猾又賴皮嘅生意partner，阿詩冇辦法幫我追足80萬，但係佢仍然同我追咗$573,000返嚟，點解係$573,000咁零汀？我都唔知呀，聽返阿詩講，嗰條友最後係投晒降，話自己而家最盡係拎到咁多，尾數就分期每個月$10,000，直至還完為止。
預咗石沉大海嘅80萬最終收到3分2，對於我嚟講已經係bonus，就算條友唔講口齒冇準時分期畀埋淨低嘅我，其實某程度上都係賺咗，只係阿詩講明唔會手軟：「梗係唔得啦！我幫你跟到足，如果中間甩咗冇入數記得同我講呀，對呢種人唔好心軟，佢哋欺善怕惡㗎，有錢一定還畀最煩最惡嘅人先，你咁好人就一定排最後，甚至走數。」
阿詩最初痴線到唔肯收我$3,000報酬，原因係個生意partner未清晒全數，我叫佢唔好咁癲，分期要等幾年先還完，做咗嘢一定要收，好在裝修師父單嘢已經有佢account number，最後我夾硬過數畀阿詩。
不過我呢種咁心軟嘅人，債仔又點會得一個吖，另外有幾個朋友都爭我錢，一萬幾千嗰啲我就算，所以淨係畀咗另外兩個job阿詩幫手追，可惜其中一個真係人間蒸發，另一個阿詩就幫我追足6萬返嚟，仲要係一炮過清。
識得阿詩嘅第一個月，我就出咗$9,000人工畀佢，阿詩話好開心。
其實我冇特登舖排，不過第二個月又咁啱畀咗3隻job阿詩，3件事都好無聊，但我又真係搞唔掂，第一單係新屋嘅書房竟然窗台滲水，我自己有call過管理處，佢哋派人上嚟睇完就話唔負責，要我出去搵人整。
阿詩：「嘩，你咁貴買層樓返嚟有咁多問題嘅，住咗一個月咋喎，不過你個管理處仲賴皮過生意partner，嘈咗佢好耐先至肯負責，所以我老公之前仲話想買樓喎，我咪鬧鬼佢囉，知唔知有間公屋幾幸福呀！」
我覺得阿詩個老公娶到佢幸福啲。
另一單係同個朋友買咗基金，因為到期拎返，我又唔想再幫佢買，但係一直攞唔返啲錢。
我：「佢死都唔畀我簽名拎錢，係咁叫我再投資落另一個基金度，上兩次出嚟食飯已經係咁，而家佢又約我。」
阿詩：「邊有得咁㗎！係你嘅錢就一定要畀返你㗎啦！佢冇權hold住你啲錢㗎喎，投資完又投資，沒完沒了咁，你再應承只會一世都拎唔返嚿錢，因為今次再買，下次到期佢又sell另一隻，你退休都未攞到呀！」
結果，我帶埋阿詩去同個朋友經紀食飯，即場就搞掂。
每次聽阿詩同人嗌交講數嘅時候，我都會有一種好尷尬嘅感覺，自然做唔出，但係佢做每樣嘢都係為我呢個金主出發，總係幫我爭取公道同埋最大嘅利益，終於我忍唔住問咗佢一句：「你有冇興趣嚟我公司做？」
阿詩：「全職？」
我：「係呀，全職。」
阿詩：「點得呀，我中學畢業咋，英文我唔掂㗎！」
我：「做我私人助理咪得囉，唔使識英文喎，不過呢，全職就唔可以$3,000一隻job咁計喇，出月薪，如果你真係有興趣，話我知你想要幾錢人工先肯做吖！」
阿詩話想返去同老公商量下先，好在佢第二日仲記得打返嚟回覆我。
阿詩：「同老公傾咗喇，佢話ok，如果我想要$12,000人工得唔得呀？」
我：「What？$12,000？我呢度就算冇經驗，啱啱畢業嘅新人都唔止$12,000喎！」
阿詩：「點同呢，我英文好差㗎，你公司肯定個個都係大學生啦！」
平時嘈交好似無所不能嘅阿詩，原來深心處都有自卑嘅位，佢識得幫我爭取最大嘅利益，但就唔識得幫自己爭取最好嘅人工。
我：「兩倍啦！$24,000好唔好？做我私人助理。」
阿詩：「$24,000？唔得唔得，做人要均真啲，我英文都唔識多個。」
我：「我想問你上一份工係幾錢人工？」
阿詩：「上一份工？好耐之前喇喎！唔……我記得都係$12,000，不過有雙糧。」
我哋兩個拗咗好耐，佢都係唔肯收$24,000人工，我又點會贏得到佢吖，阿詩最後妥協出$15,000糧，仲好開心咁講：「好好㗎喇，生意我又唔識去傾，都係幫你執頭執尾，你畀太多我都唔好意思啦！」
雖然阿詩唔識幫我傾生意，但係佢據理力爭嘅性格，已經幫我喺日常生活同埋工作裡面省卻好多麻煩，有啲嘢唔係用錢去衡量，一間公司裡面有唔同嘅人，當中有唔同嘅職責，Sales傾咗張單返嚟，都要其他部門配合到先可以成事。
雖然我係一個做生意嘅女人，不過大事精明，小事就好怕麻煩，有人會睇準我呢啲弱點去搵著數，有阿詩喺度幫我把關係安心好多，佢而家喺我公司做得好開心呀，我亦都鼓勵佢去進修英文，雖然未行動，但好高興佢有呢個心。
我開頭都擔心阿詩嚟到未必會同其仔同事夾到，點知情況剛剛相反，好多人都同阿詩friend，早幾日就有個Admin同事同我講：「阿詩真係勁好人，我前男友分手之後爭我錢唔還，阿詩話幫我追，真係追到喎，好犀利！」
我：「你前男友爭你幾錢？」
Admin同事：「5,000囉！所以我今日請阿詩食飯。」
我：「我之前又係搵阿詩幫手追數，我畀$3,000一個job佢㗎，你追$5,000咁少，阿詩一定冇收你錢啦，咁你記得請佢食餐好喇！」
Admin：「$3,000？Job？咩意思呀？」
我：「冇，你唔明㗎喇，咁你打算請阿詩食咩？」
Admin：「我想請佢飲茶，不過佢係都要食焗豬扒飯。」
我：「大快活呀？」
Admin：「係呀！」
🤣🤣🤣阿詩真係呢……