約咗足足3個月先有期畀我上去繼續脫毛療程，臨尾個職員仲係咁sell我join其他plan，但係呢個世界有種人天生耳仔軟，我就係其中一個，完全抵受唔住疲勞轟炸，對方由房sell到出門口，我已經拎埋張信用卡出嚟諗住畀錢。
「等等，人哋都話諗諗先啦，我第一次上嚟都覺得好有問題，做一part脫毛，全程係咁踩我呢樣嗰樣，你哋唔係仲用緊打擊人自信心呢招呀？我唔做喇，你退返錢畀我，同埋呢位小姐你哋唔好再迫佢，我去消委會告你哋。」
有個女人唔知喺邊度殺出嚟同我擋駕，美容中心啲人當然都唔係善類啦，其實我喺旁邊都好尷尬，我真係好驚鬧交嘅場面，偏偏個女人完全唔怕，而且全程不落下風，最後連美容中心職員都怕咗佢，竟然肯退款！！！
我就冇退款，但倖免於難唔需要join其他plan，最後我同個女人一齊搭電梯走，佢係咁話我：「點解你唔退埋啫？頭先佢哋都驚到腳軟啦！你join個脫毛療程嗰陣佢哋就乜都得，之後又咁難約，仲好意思sell其他嘢，你唔嬲㗎咩？」
我：「嬲㗎！咁可以點啫，我份人好易心軟，今次冇畀佢喺房sell到已經好叻㗎喇，好在頭先出到去想碌卡先撞到你，食飯未吖？我請你食飯吖，頭先冇join個plan都慳咗萬幾蚊，如果冇約人就賞面食餐飯啦！」
「請又唔使，AA啦，反正我老公今晚要OT，本身都打算自己去大快活食焗豬扒飯。」
我：「唔得，畀我請你啦，想食焗豬扒飯係咪？我帶你去太平館食啦，過兩條街之嘛！」
去到太平館，呢個女人食咗兩啖就話：「喂，咁貴，但係好似太快活好食啲喎！」
我：「點會呀，係咪你食慣咗太快活嗰隻味咋？係呢，我到而家都未知你叫咩名，我叫Elaine！」
「我冇英文名呀，我叫阿詩。」
正當我想繼續同阿詩傾計嘅時候，電話忽然響起，係我表弟打嚟，個衰仔喺度討價還價，因為我啱啱買咗層樓，最近搞緊裝修，不過裝修師父同班工人拖慢嚟做，有啲位又明顯手工好差，我一個女人仔都唔敢同成班男人嘈，打算叫表弟幫手，佢竟然問我拎$3,000車馬費……
因為聽到我傾電話嘅內容，阿詩就問我同邊個傾緊？
我：「我表弟囉，呢個衰仔成日游手好閒，不過佢份人係咁，硬係唔定性，嗌佢幫我去同班裝修師父講有咩要執漏，仲要我畀$3,000車馬費，呢個衰仔真係唔熟唔食，我由細到大都太錫佢喇。」
阿詩：「男人邊到識講數㗎，我老公都係㗎，外表兇神惡煞，其實成日畀人搵笨，人哋講幾句就okok，$3,000你畀你表弟都未必做到嘢啦！」
我：「咁不如我畀$3,000你幫我嘈班師父啦！」
阿詩：「係咪先，包你滿意，頭先聽你講班師父就拖慢嚟做吖嘛，我幫你嘈到佢哋準時交貨，每個位都要執晒漏先可以完工。」
我：「我講笑㗎咋，點敢叫你幫我去做呢啲咁惡頂嘅嘢呀？你都要返工，$3,000係我表弟呢啲無業遊民先肯收，點請得郁你。」
阿詩：「我咪無業遊民囉！」
我：「你搵緊嘢做？」
阿詩：「其實結咗婚之後老公就唔畀我做嘢嘅，但係佢早排轉咗個上司，日日針對佢，我知老公做得好辛苦，成日勸佢轉工又唔肯，所以我一早想搵兼職㗎喇，減輕下佢負擔吖嘛！」
我：「喂，咁你肯做，我放心好多呀，頭先見你同班美容中心職員激戰，我睇到心都離埋，從未見過呢啲Sales最後會肯退款，咁啦，裝修師父真係拖咗好耐，好難搞㗎，我畀$5,000你吖，叫埋表弟陪你去，有個男人好啲！」
阿詩：「唔使，有個男人仲麻煩，我一個搞得掂啦！同埋講咗$3,000就$3,000，我份人好均真，雖然大家啱啱識，不過都算係朋友吖！」
我：「但係班裝修工人粗口爛舌好難搞㗎，你一個女人……」
阿詩：「如果要講粗口，我粗口過佢哋都得呀！唔使驚啦，放心交畀我，搞掂你先畀錢我都唔遲。」
我真心覺得阿詩似足嗰種女中豪傑，甚至係有種收咗山嘅黑社會大家姐感覺，不過最勁嘅係，班裝修工人最終真係畀佢搞掂，個師父仲打嚟同我講：「嘩，未見過有女人好似你個friend咁麻煩，我都唔想再同佢講，唉！你第日有工程唔好搵我，我唔想再見到呢個女人。」
唔知阿詩係點樣搞掂件事，總之就目標達成，然後我講笑咁話一早識得佢就好，因為之前有個生意partner爭我錢，一直賴皮唔肯還。
阿詩：「我幫你搞掂！」
我：「講笑咋，好難追㗎，嗰條友係正宗軟皮蛇，難搞過裝修師父。」
阿詩：「認真喎，咩講笑呀，照舊，事成之後$3,000囉！」
我：「你傻㗎咩，佢爭我80幾萬，追到點可以畀$3,000你咁少！」
阿詩：「講咗$3,000就$3,000啦，佢爭你幾多係另一回事。」
如是者，阿詩好似做咗我私人助理咁，真係專門幫我搞掂啲私事，每筆服務費$3,000，你估下佢追唔追到呢80幾萬？（未完待續）