有冇一首歌長期喺你個playlist㗎？返老人院嗰幾個月，我成日會聽張敬軒嘅《青春常駐》，每次聽到「那段年月有多好 ，怎麼以後碰不到，那些已白髮的，就如在無聲的控訴……」，我都會有啲眼濕濕。
我哋有啲院友患有老人痴呆，其中一個伯伯好得意，佢周不時問我：「搞掂未？」
我：「咩搞掂未？」
伯伯：「開會呀，何生等緊我哋，快啲啦，你叫咗阿權揸架車嚟未呀？」
其實我都唔知邊個係何生同阿權🤣
伯伯仲會試圖離開老人院，我問佢去邊，佢話趕住搭飛機去美國傾生意，有時都會飛新加坡同埋澳洲，主要係睇佢心情啦！
有次佢屋企人要求同伯伯視像通訊（因為受疫情影響，老人院唔開放畀家人探訪，但大家可以視像），我同伯伯家人傾咗幾句，分享下伯伯嘅日常趣事，佢個仔笑笑口解釋畀我聽：「係呀，我爸爸以前好叻㗎，佢喺公司做到好高級，真係成日要開會，周不時飛去外國傾生意。」
佢另一個女就話：「如果爸爸淨係記得佢開心同埋威水嘅日子，咁都幾好吖。」
伯伯聽到之後似懂非懂，好似清醒咗幾秒：「梗係啦，你爸爸我以前管好多人㗎，都唔知幫公司搵到幾多大生意，冇用喇，而家冇用喇，人老咗冇用喇。」
5分鐘後，伯伯又話自己聽日早機，所以要早啲瞓。
有同事話，一個人後生如果要諗好多嘢，份工要成日用腦，將來患老人痴呆嘅機會係大過啲唔使點用腦嘅人，我半信半疑，乜唔係應該相反咩？愈係用腦，先至冇咁易退化吖嘛，否則點會叫老人家打多啲麻雀喎！不過算啦，反正我冇再深究。
有啲公公婆婆同屋企人感情好好，睇到呢度你可能會問，感情好又點會要老人家入院舍呀？答案好簡單，因為每個家庭嘅環境同條件都唔一樣囉。
個仔結婚，花盡一生積蓄都只係可以喺香港買層納米樓，生完小朋友都冇多一間房，根本安置唔到老人家，又或者全家人都要長時間出去工作，獨留老人家在家中，冇人可以抽身照顧，到時可能仲危險。
唔方便講我呢間院舍係咩性質，但可以話畀你知，入嚟住大約萬幾蚊，私人房就多幾千，點解花得萬幾蚊又唔搵私家看護呢？因為私家看護要自己畀晒，住老人院就有資助，相對上經濟冇咁重負擔。我又聽過人問：「差幾千好心畀個老人家住單人房啦！」唉，唔係個個家庭出多幾千蚊都咁從容㗎嘛，家家有本難念的經。
我哋院舍都有愛情故事㗎！有個伯伯中咗風，佢老婆其實好健康，行得走得，十分之正常，精靈過好多出面嘅老人家，佢絕對有自理能力，但係為咗陪伴老公，呢位婆婆自己申請入嚟住，我成日見到佢拖住伯伯隻手，有時摸摸伯伯個頭。
我同過呢位婆婆傾計，佢仲拎咗啲後生嘅相畀我睇，原來呢對公公婆婆以前係靚仔靚女，由於後生要顧住搵食，兩個人從來未試過搭飛機旅行，後來伯伯退休，本來話要同婆婆去台灣，但過咗冇幾耐，伯伯喺屋企跌親，除咗有部分嘢唔記得晒，仲連照顧自己嘅能力都冇埋。
婆婆話自己邊度都唔想再去，好驚伯伯突然有一日會離開：「佢唔慣冇我喺身邊，我想成日陪住佢。」
我都唔知應該講乜好，望住中風嘅伯伯，如果我話唔使擔心，你哋一定會長命百歲，其實會唔會係另一種折磨呢？
然後過多一陣，婆婆又轉口風：「應該係我唔可以冇咗佢喺身邊至真，我想每日都見到佢，摸到佢，但又想自己行先一步，如果得返我一個，仲難受。」
要數我喺呢間院舍最唔捨得嘅人，一定係呢位婆婆，我有時唔敢諗佢老公如果真係走咗，婆婆可唔可以承受到嗰種痛。
不過率先進入倒數階段嘅人係我，院舍發生咗一件事之後，我知道自己已經冇辦法再做落去。
《青春常駐 1》
https://hkofficedaily.com/?p=16073