有冇聽過一啲好牽強嘅分手理由呀？話自己有癌症誇唔誇張？
我朋友Cherry幾年前出去飲嘢識咗個男仔，大家好快已經撻著並演變成情侶關係，不過Cherry都隱約feel到個男仔好貪玩，拍咗拖都成日出去蒲，有時仲成晚搵唔到人。
Cherry拍拍下已經知個男仔咩料，所以未算太投入，久而久之亦見少咗，有時一個月都係出嚟一兩次咁大把。
直至有一次，足足一個星期失去聯絡，電話唔聽唔覆，msg已讀不回，Cherry覺得咁樣落去唔係辦法，不過希望有頭有尾，正正式式講分手啦！
誰不知個男仔快一步，而個原因係：「唔好意思，我有cancer，得返半年命，我哋不如分手啦！」
當時Cherry唔係想挽留，只係身邊有人患癌，聽到之後始終會唔開心，加上佢又唔想咁衰女，對方有事就即刻走咗去，所以就提出陪個男仔睇醫生同埋照顧佢，希望同佢「行埋人生最後一段路」。
你有情，人哋未必有義，個男仔轉頭就block晒Cherry嘅電話同WhatsApp，最慘係佢哋之間冇共同朋友，因為當日真係酒吧飲嘢認識，條仔就咁走埋嚟搭訕，大家平時唔係去街就係爆房，又冇見過家長（可想而知佢兩個感情真係唔深），Cherry無計可施，又冇任何途徑可以聯絡，結果焗住放棄。
一年後，Cherry喺諾士佛臺飲嘢撞返呢個Ex，個男仔同緊另一條女飲嘢，兩人對望咗一眼，Cherry話鬧佢都嫌廢事，轉個頭呢個男仔已經埋單走咗。
噚晚Cherry同朋友出街又撞到呢個男人，對方拖住個大咗肚嘅女人，相信係佢老婆，佢話當時好想走埋去問一句：「請問你搵邊個神醫抗癌呀？由得返半年命變到咁長命，仲做埋爸爸。」不過Cherry冇咁做，佢話算啦，大家感情又唔係深，當時自己隔籬又有同事，所以就直行直過。
之後Cherry收到個msg，原來係個男仔send過嚟：「Sorry，之前想分手驚你唔肯，講咗個大話，你可唔可以原諒我呀？不如畀我請你食飯吖。」
Cherry回佢：「你唔係block咗我咩？食飯？唔使喇，其實分手唔使作到咁大喎，因住講多變真。」然後輪到Cherry block返佢。
我覺得Cherry算好有品，可能當年根本冇投入過啦，但係分手可以有100個理由㗎啫，唔使咒自己有癌症吖師兄。