上星期我同一個client嘅對話，對方係高妹，身高178，做model綽綽有餘，但係女仔太高，真係好難搵到男朋友。
我：「請問你揀另一半有冇特定要求？例如學歷同收入。」
Helena：「真係冇，學歷唔重要，我自己都唔係大學畢業，有穩定職業得喇，人工少過我冇問題，大家財政獨立。」
我：「你肯定冇其他？例如……身高。」
Helena：「哈哈，我以為唔使講，我著平底鞋多，你哋多唔多男會員有180或以上？」
我：「都多，但係要求男仔有180或以上嘅女仔就更多。」
Helena：「你哋個個女會員都好高？」
我：「唔係。」
Helena：「唉。」
我：「唉。」
大家相視一笑，明晒。
Helena：「我身邊啲女仔friend，150嘅想搵個180，160嘅又想搵個180，我見慣喇，但係佢哋有冇諗過自己嘅高度都想要180，我哋啲高妹點算呀？其實同我平排就得喇，我唔使個男仔再高過我幾寸。」
莫講話Helena有「直接利害關係」所以感慨，就算係我作為一個旁觀者，有時都會好無奈，因為有啲女會員好離地，Helena講得冇錯，150嘅女女要求搵180仔仔，160嘅女女又係搵緊180仔仔，你叫170以上嘅女仔情何以堪呢？如果按比例，170以上嘅女仔起碼要搵190甚至200，有時鬼佬都未必有呢個身高，唔通下下去NBA搵咩。
Helena：「我知好多女仔鍾意咩身高萌，我都明白男朋友高大係好睇兼有安全感，不過相差20至30cm都要180，點解呀？可唔可以畀條生路我哋呢啲高妹呀？」
咁講啦，女仔鍾意高佬係佢哋自由，最後高佬揀唔揀個相差20至30cm嘅女朋友呢，就係佢哋個人取向喇，我都接觸過180+嘅男會員，有啲真係鍾意細細粒，有啲就好反感，我聽過有人咁講：「唔好啦！有冇諗過我哋想搵個差唔多高度嘅女朋友，行出街會襯啲呀？我唔想打茄輪都要佢擔凳呀！」
所以Helena唔使氣餒，其實有高佬淨係鍾意高妹㗎，總會有欣賞你嘅180+仔仔出現。