最窮嘅日子，偏偏畀我喺公司遇到一個心儀嘅女同事，當時佢係新人，大家同一個部門，所以呢個女仔工作上遇到難題好鍾意請教我，相處得耐，愈嚟愈熟，慢慢地產生好感。
阿民：「真係敢拍拖咩？我都有鍾意嘅人，但係唔敢諗，唔通叫佢同我一齊捱麵包？」
我：「所以個女同事幾次主動約我食飯，我都係忍痛拒絕。」
雖然係咁，不過大家朝夕相對，感覺愈嚟愈強烈，我好想接近佢，又好想遠離佢。
呢個女仔好鍾意笑，好純，冇機心，戇居居好容易畀人屈佢做呢樣做嗰樣，可能日子已經夠晒攰，我比較鍾意同簡單嘅人相處。女仔面皮始終薄啲，我推咗幾次食飯之後，佢亦冇再主動提出喇，雙方嘅距離就止步於同事關係。
過咗一排佢辭職轉工，我聽到之後好失落，諗咗幾晚，又數下自己啲錢夠唔夠請佢食餐好啲嘅飯，卒之輪到我主動約佢，呢次唔係約食lunch，係食dinner，我預咗個女仔會推，點知佢又一口答應。
呢個女仔未出現之前，我嘅生活係冇盼望，只係一個做三份工嘅奴隸，一出糧就幫屋企還債，每次諗起自己偷食人哋剩低嘅餸被發現嗰幕，就自然有一陣鼻酸嘅感覺，冇一晚係瞓得安心，直至同呢位女同事愈嚟愈close，我發覺以上嘅感覺冇以前咁強烈，但我唔知點解會咁，好似人生終於有一件事係值得笑。
Dinner嘅地點係佢決定，我知道係茶餐廳之後有啲唔好意思，因為本身準備咗少少錢食好啲，但佢話呢間茶記好食，其實我覺得一般般，不過真係好平，因為地點喺公共屋邨裡面，呢度根本就係做街坊生意，我諗佢係唔想我破費。
食完陪佢散步返屋企，好衰都要講一句，知道佢住公屋之後，我個心冇咁慌，唔係自己窮就想人哋冇得住私樓，而係感覺上彼此距離冇拉得咁遠（雖然有一刻諗過，公屋一樣大把隱形富豪）。
嗰晚之後我哋又出咗一兩次街，然後就正式一齊。
阿民：「其實你仲可以拍拖，應該都唔係好窮啫。」
我：「當時屋企嘅債務雖然未完，但開始見到盡頭，而最關鍵係我將屋企嘅情況向女朋友講晒，我有諗過佢真係嫌棄都冇辦法，其實我都冇嘢輸吖，當發咗場夢囉，好彩佢冇。」
拍拖一定要使好多錢？我唔知人哋點拍，至少我當年同女朋友就唔係，我哋冇睇戲，冇去咩主題公園，冇去高級餐廳，出街最常去嘅地方係－－－－－Ikea，好多人話Ikea好煩，大得嚟又迫你跟住條路線行晒先出得返去，不過對我哋嚟講反而係好事，有冷氣嘆加上行極唔完，仲可以坐喺佢哋嘅梳化傾計。
每次行Ikea都係冇幫襯，但我哋會一路睇住啲模擬廚房、浴室、飯廳，幻想將來間屋要點，我拎起一個木架，話第日屋企要買呢啲，佢拎起個玻璃樽，話以後要買呢個裝散銀，好無聊係咪？我哋當時就係用幻想，喺冇用任何錢之下勾畫未來。
阿民：「最後點呀？」
我：「佢而家係我老婆。」
還完錢嘅第一件事就係向佢求婚，頗為慶幸雙方家庭背景未算懸殊，老婆嘅爸爸媽媽並唔介意我哋婚後租樓住，公一份婆一份去生活。我仲記得彼此家人出嚟見面傾婚事嗰日，我阿媽特登去買咗條新嘅裙，雖然係普通貨色好平，但唔怕老實講，我咁大個仔都係第一次見阿媽著裙（可能細個有不過唔記得，我哋冇乜舊相），阿爸就著咗套N年前嘅西裝，款式老土，衣不稱身，吊腳嘅，不過佢哋咁樣做都係重視嘅表現，第一次見襯家，而呢次仲要係傾婚事。
從嗰日開始，因為貧窮而造成嘅自卑感就消失咗，因為有太多人愛自己同埋關心自己，我想努力工作去回報佢哋。
我嘅故事同阿民嘅處境可能唔一樣，佢嘅擔子比我當年更重，加上阿民礙於自己係我下屬，似乎未打算透露太多，我亦唔想迫佢講，唔係每個人都習慣將私事毫無保留分享，問心嗰句吖，當年我都係同女朋友（即係而家個老婆）先會講咁多心底話，如果我對住個上司，或者係其他男同事，真係未必會講到咁deep，而家捱完就梗係輕鬆啦。
我喺呢條後樓梯講咗咁多嘢，只係希望可以鼓勵阿民，想話畀佢知終有一日可以擺脫困局。
其實我平均一個星期會帶一次飯，其餘幾日就係同同事食，我而家會習慣拎埋阿民嗰份，而原因並唔係施捨或者可憐，我會同佢講：「老婆又試新嘢，你畀啲意見。」因為我唔想佢有hard feeling，一星期一次已經好夠，太多就會over，唔想佢個心唔舒服。
其餘嘅日子，我唔知阿民仲有冇喺後樓梯捱麵包，畀返啲私人空間佢係必須嘅，唯一慶幸係阿民終於肯同大家一齊食lunch，雖然唔多，佢一個月先會出席一兩次，不過咁樣已經好好㗎喇，耐唔耐成班人傾下計食餐飯，內心就冇咁鬱悶。
可能係捱過窮，我有一個唔係咁好嘅習慣，就係食乜都好，一定係食到乾乾淨淨，誇張啲講，連一粒蔥都唔會留，而且食得好快，名符其實係狼吞虎嚥，有次個同事講笑咁話我：「大佬，你好似好耐冇食過飽飯咁喎。」呢餐飯咁啱阿民都在場。
我：「你哋未捱過窮唔明㗎喇。」
相信阿民聽到會心領神會。
抱歉，故事冇咩起伏，仲幾平淡下，我想有人明白，又怕有人明白。無論明唔明白都好，希望大家嘅生活愉快，唔使大富大貴，至少三餐無憂。
（完）
–
《那段貧窮日子》1 冇錢食lunch 好耐冇買衫
https://hkofficedaily.com/?p=16853
《那段貧窮日子》2 做侍應偷食客人食剩嘅餸
https://hkofficedaily.com/?p=16893