噚日去咗朋友屋企食飯，人哋阿媽同我講：「煮咗好多餸喎，裝多個飯盒畀你拎返去食啦，下次嚟食飯先還返個飯盒畀我咪得囉！」
「唔使啦Auntie，我好少喺屋企食飯，一係就叫外賣，一個人好求其㗎咋，最緊要快。」
Auntie：「你啲後生真係吖，阿賢又係咁（即係我個朋友），佢老細幾年冇加佢人工喇，仲死都唔肯帶飯盒返工，成日洗埋啲無謂錢。」
「幾年冇加人工？佢份糧唔加都夠晒多啦，唔使擔心……」就嚟講完之際望到阿賢喺Auntie身後向我打眼色，雖然唔知咩事，但我估計差啲講錯嘢。
之後阿賢同我解釋，原來若干年前佢阿媽講咗句：「表姐好叻呀，佢老細好睇得起佢，人工加到2萬蚊一個月，你學下表姐咁勤力啦！」
須知道親戚朋友同你阿媽講嘅嘢就好似CCTVB新聞一樣，永遠都係報喜不報憂，而你所得到嘅資訊，都只不過係佢哋設計好要畀你知嘅嘢，我屋企呢邊都係咁，最經典試過一次，阿媽同我講咗樣好誇張嘅嘢：「表哥話喎，結婚前絕對唔會送禮物畀女朋友，你睇佢女朋友幾聽話！」
我一直以嚟都交足戲，最多私底下瘋狂恥笑，因為我表妹已經踢爆咗表哥原來唔止送禮物畀女朋友，仲要係送LV手袋，而重點係，表妹曾經喺街撞過表哥當時嘅女朋友，條女孭住表哥送嘅LV同另一個男人手拖手，一腳踏兩船。Anyway，後來表哥都同呢位女朋友分咗手喇，我從來都冇將真相話畀阿媽知，驚佢接受唔到。
愈扯愈遠，講返正題先。阿賢當年聽到佢阿媽話表姐賺2萬蚊一個月好叻之後，衝口而出講咗句：「2萬有咩咁叻呀？我一早過咗啦！」
根據阿賢描述，講完之後佢阿媽好開心，再知道佢賺緊27000一個月，直情覺得係屋企嘅光榮。自此之後，家用大幅度調整至5位數，另外阿賢個老豆叫佢幫手清條財仔數，仲有幾張卡數，阿賢仲有個做健身教練但長期搵唔到食嘅阿哥，每個月到時到候都會問佢借幾千蚊。
阿賢話：「我人生未試過有一段日子係咁大壓力同埋咁窮，完全儲唔到錢，有幾個月直情係負數。」
我：「早排幫你執過一次CV，人工過咗4字喇喎。」
阿賢：「唔好畀我屋企人知呀，頭先食飯阿爸同阿哥都喺度。」
阿賢近年一直話老細凍薪，加都係加得幾百，私底下會塞多啲錢畀阿媽，扮自己有bonus，又會送下小禮物，但就死口唔會講而家賺幾多，因為佢知道阿爸同阿哥立心不良。你哋會唔會同屋企人講自己賺幾多錢一個月？
印象中阿媽冇問過我確實幾錢人工，反而阿爸就唔會理我幾錢人工，由細到大都係咁苛索金錢，所以佢知唔知都冇分別，如果知就會問得再狠啲🤷🏻♂️