女追男隔層紗呢句說話其實唔多準確，因為你都要睇下係咩女，就好似我公司個肥妹Cherrie咁，佢鍾意咗個男同事Trevor好耐，喺office已經係公開嘅秘密，人前人後都聽到Cherrie讚Trevor點好點靚仔，次次講親都流晒口水咁。
Cherrie除咗毫不介意周圍表達自己對Tervor嘅傾慕之外，平時仲好主動走嚟獻殷勤，整愛心飯盒又試過，特登拎壺湯返嚟又試過，過時過節仲會送下禮物，全部都係得Trevor獨家擁有，真係做到出晒面㗎喇。
Cherrie喺office有一句名句：「Trevor靚仔過姜濤啦！我叫過佢去全民造星㗎，佢冇理我之嘛！」
Trevor唔係樣衰，但又唔會靚仔過姜濤囉唔該，所以我哋成班男同事都會執住呢樣嘢嚟講笑，而其實Trevor自己都好介意，因為你下下話佢靚仔過姜濤，其他人就會當笑話咁聽，最重要係Trevor根本唔鍾意Cherrie，佢甚至覺得有個肥妹好似迷偶像咁鍾意自己，係一件好瘀好瘀嘅事，佢覺得好冇面。
Trevor：「你唔好再周圍同人講我靚仔過姜濤得唔得呀？同埋唔好再煲湯畀我啦，我唔飲湯㗎！」平時Trevor就係咁嘅語氣對Cherrie㗎喇。
無論Trevor幾晦氣都好，Cherrie依然點趕都唔走，呢種係咪叫自虐呢？每次見到Cherrie獻殷勤，而Trevor又咁抗拒同埋一臉厭惡嘅時候，我就會諗起容祖兒首歌～～～喜歡你讓我下沉，喜歡你讓我哭，能持續獲得糟蹋亦滿足，喜歡你待我薄情，喜歡你為人冷酷……
我：「點解你唔試下接受Cherrie呢？佢對你真係好好喎！」
Trevor：「個個對你好就要接受呀？咁咪好唔得閒？我真係唔鍾意佢吖嘛！」
我：「其實你有冇同人講清楚㗎？雖然你係男仔，不過都似係收緊女兵喎！」
Trevor：「女咩兵呀？我講過啦，有一排佢晚晚send msg嚟，晚晚打嚟，我已經唔覆唔聽，卒之有一次我同朋友睇緊戲，忍受唔到個電話勁震，完咗場我破天荒打返畀佢，講到明淨係想大家保持同事關係。」
我：「你睇下靚仔過姜濤有幾多煩惱吖，我就未試過畀女仔追喇，不如你諗諗佢啦！你頭先拒絕要佢個愛心飯盒嘅時候，我見到Cherrie好傷心呀！」
Trevor：「唔好再提姜濤啦！都唔好再提咩愛心飯盒！你覺得Cherrie咁好，不如你諗諗佢吖！」
我：「咁Cherrie又唔係我杯茶，我鍾意女仔瘦啲。」
Trevor：「唔係肥同瘦嘅問題呀！好多肥妹都係潛力股，好多肥妹都好甜美，但我真係唔鍾意Cherrie吖嘛，其實調返轉個性別去討論，如果有個男同事對個女同事死纏爛打，講明唔鍾意都晚晚send msg騷擾，大家就會覺得呢個男同事係痴漢、猥瑣、煩膠，咁點解有個女仔咁樣做，啲人又會覺得個女仔好慘吖？我畀佢騷擾都好慘㗎！佢講乜春嘢靚仔過姜濤，又乜春嘢參加全民造星呀？人人喺背後笑我，你估我唔知呀？不過呢啲說話唔係出自我口㗎，我從來冇話自己靚仔過姜濤囉！」
Trevor愈講愈激動，佢講嘅嘢我都明，只不過大家係男仔，梗係會攞呢啲抵死嘢嚟開玩笑啦！同埋我知道Trevor係鍾意另一位女同事Sophia，但由於Cherrie經常高調咁喺其他人面前讚Trevor，又整飯又煲湯咁樣，所以搞到Sophia有種錯覺，覺得Cherrie係同Trevor有非一般關係，唔止Sophia㗎，公司仲有其他同事問過我，知唔知Trevor同Cherrie究竟係咪拍拖。
聽完Trevor講，再諗清楚啲，我都發覺呢條肥妹係有啲機心，好似想透過一啲行為或者說話去斷Trevor喺公司嘅後路，等佢同其他女同事冇發展空間。
有一次Cherrie行埋嚟我個位，因為Trevor坐我隔籬，我以為條肥妹又嚟溝仔，所以抬起頭就講咗句：「Trevor出咗去做嘢喎！你晏啲先搵佢啦！」
Cherrie：「唔係呀，我有嘢想搵你。」我心諗仆街喇，你條肥妹唔係移情別戀，退而求其次想搞我啩！
我：「搵我？有咩幫到你？」
Cherrie：「其實Trevor係咪有女朋友啫？聖誕我想約佢呀，你知唔知佢平安夜有冇約人？」
嘩！咁大咬想約Trevor平安夜出街呀？平安夜，失身夜，你條肥妹都係立心不良㗎喇，不過人哋啲嘢我又唔方便理太多。
我：「點知啫，你同佢仲熟過我啦，聽講你晚晚打畀Trevor喎，你自己問佢啦！」
Cherrie：「我就係夜晚打畀佢都唔聽，明明見佢WhatsApp係online，send msg又已讀不回，我咪喺度諗Trevor其實係咪有女朋友囉！」
我：「講句公道說話，唔一定有女先可以已讀不回嘅，可能佢真係唔想覆呢，始終同事還同事，放咗工唔想聯絡係好正常，有時老細夜晚send msg嚟我都唔覆啦！」
一場同事，我都幫Trevor講到好白啦！幫到你盡喇兄弟！隔咗唔夠半個鐘，出咗街做嘢嘅Trevor無啦啦打嚟搵我：「頭先Cherrie係咪行埋個位搵你？仲問我有冇女朋友呀？」
我：「係呀，佢問你有冇女？平安夜有冇約人？我咩都話唔知㗎喇！」
Trevor：「我想講真係忍無可忍，頭先出咗絕招，肯定Cherrie唔會再纏住我。」
我：「咩絕招？你用粗口問候佢祖宗十八代呀？」
Trevor：「勁過講粗口，我話平安夜唔得閒，要出去做兼職，因為欠落成身街數，仲問Cherrie有冇30萬借住嚟還信用卡，佢聽完之後呆咗，問我做咩欠咁多錢。」
我：「咁你點答？」
Trevor：「我話自己賭波賭馬咩都啱，全部都係賭債，跟住冇再解釋，再問多佢一次可唔可以借30萬畀我。」
其實呢招都幾絕㗎！試問有邊個女人想自己條仔周身債，更何況Trevor平時都唔接受Cherrie，講到尾大家只係同事，而家一開口就借30萬喎，聽到都走啦！
我：「大前提係Cherrie要信，佢會唔會覺得你搵藉口耍佢咋！」
接近放工嘅時候，Trevor終於做完嘢返到office，佢滿心歡喜咁同我講：「都話呢招work㗎啦！問佢借完30萬之後冇晒動靜，早知係咁就一早扮欠債啦！不過而家都唔遲，最好Cherrie以後唔好煩我，聖誕我想試下約Sophia出街呀！」
我：「你哋呢啲痴男怨女真係煩，Cherrie鍾意你，想約你聖誕出街，你就鍾意Sophia，想約Sophia聖誕出去，呢度食唔好呢度屙啦！」
Trevor：「你唔好講到三角關係咁樣好喎，我從未鍾意過Cherrie，一開始已經講得好清楚。」
一講Cherrie，Cherrie就到，條肥妹見Trevor返咗office又行埋嚟，劈頭第一句好震撼……
Cherrie：「你畀你account number我吖！」
Trevor碌大隻眼，然後望一望我，你望我把撚咩，你個焦點望返肥妹啦！
Trevor望返Cherrie：「畀account number你？你借錢畀我呀？」
Cherrie：「我唔借畀你邊個幫你呀？記得要即刻還卡數呀！你咩銀行㗎？」
Trevor：「Er……一陣再講，有啲嘢忙。」
Cherrie真係好聽話，Trevor講一句就借錢，講多句就彈開。
等肥妹走咗，我好認真咁同Trevor講：「其實呢，如果我問老母借30萬還卡數，我100%肯定老母唔會借，Cherrie二話不說就問你拎account number過數，不如你真係諗諗佢啦！」
Trevor：「30萬都借？早知借多啲啦！唔怕，我仲有招超必，講完之後肯定佢唔敢再煩我！」
孤陋寡聞嘅我首先google下咩係超必，原來係絕招中嘅絕招：「咩超必呢？」
Trevor講咗佢嘅計劃，真係好變態喎……（未完待續）