過咗唔夠兩個星期，Grace好開心咁打嚟同我講：「同公司協議咗即時離職呀，唔會賠剩低嗰兩個月人工畀我，但我都唔需要賠畀佢哋，因為唔想糾纏落去，所以我同意咗，寧願將啲時間用嚟搵新工，今日做Exit Interview嗰陣仲一次過畀埋reference letter，唔使煩，多謝你呀！」
Grace嗰間公司本身規模大，係一隻美國品牌，總部喺Milwaukee，香港呢邊屬於sourcing office嘅角色，咁既然佢哋個廁所成日有人出出入入，最近亦經常有求職者上去見工，所以我上次同佢傾完之後有個大膽嘅諗法，就係以求職者嘅身份，send匿名電郵向佢嘅總公司反映。
個人認為Grace嘅上司咁樣做，某程度上係得到香港呢邊嘅高層默許，你諗下，唔通班膠層唔去大小二便咩，見到Grace被安排坐廁所門口都冇出聲，咁就足以證明佢哋根本係一夥人，如果唔係隻眼開隻眼閉，佢上司又邊敢明目張膽作出職場欺凌吖。
反正喺香港呢邊講咩都嘥氣，我決定唔好打草驚蛇，求其開個email account，話自己係求職者，喺香港office見工時發現有個員工被罰坐廁所門口，仲要棟住個紙牌備註係「已辭職」，所以搞到我嘅觀感同印象好差，準備去Glassdoor留低評價，無論見工嘅feedback如何，都唔會考慮受聘於貴公司。
**Glassdoor都係美國公司，容許公眾留低公司嘅評價，總部喺California，當地人一定聽過。
我扮求職者send匿名信呢件事，事前徵求咗Grace同意，由於角色設定方面只係上去interview，所以佢上司平時點樣鬧人，仲有點樣用性騷擾言詞羞辱女同事等等嘅惡行，我能力上無法告狀，路過見工冇理由知咁多嘢㗎嘛，亦要盡量令Grace置身事外，唔好畀佢總公司聯想到係Grace搵人自編自導自演。
Grace：「臨尾都有少少谷氣嘢㗎，因為做Exit Interview嘅時候，我喺張form填咗離職係因為個上司以各種方式欺凌下屬，不過HR勸我重新填過，唔好寫得咁仇恨，條件係即刻出埋張reference letter畀我，大家好做。」
其實都幾搞笑，間公司想員工走嘅時候做Exit Interview，照計就係要知道啲人點解要resign，從而檢討同埋改善，點知到員工寫出真實感受之後，又要用reference letter做交易條件，脅迫人哋隱藏原因，咁呢啲Exit Interview又有咩意思呢？
Louis私底下話要畀3萬蚊我作為報酬，佢以老婆一個月人工作為基準，仲話本身諗住賠兩個月人工，而家慳咗，但我以完全冇談判過為由而拒絕，仲話未必關我事。
Louis：「點會唔關你事吖，send完匿名信過多一個禮拜就放人，Grace話從來未試過㗎，肯定係總公司畀壓力香港呢邊。」最後呢隻job收咗1萬，其實我都嫌多，因為出嘅力太少喇，有啲唔好意思。
處理完Grace呢單之後，好快又有人搵我做嘢，對方喺某電訊公司做CS，即係call center嗰啲，佢叫Amy，最近被人針對，有個同事話佢好寸，仲自稱老公係黑社會，所以畀咗兩條路Amy揀，一係當眾跪低道歉，一係就叫人搞佢。
我：「即係叫你喺call center跪低？我有冇聽錯？個同事係咪睇得古惑仔電影太多？你間電訊公司好出名㗎喎，點會容許有呢啲事發生呀？咁你想我點幫你？出去同佢講數？」Amy只係一個24歲嘅後生女，睇得出佢為咗呢件事好驚青。
Amy：「嗰個要我跪低嘅同事叫Wendy，佢知我屋企地址，因為我用緊公司個台，佢撳個掣已經check晒我個人資料，不過我唔會跪低，已經決定唔做呢份工避開佢，但驚Wendy唔放過我，而家返屋企都有啲不安，怕畀人跟。」
我：「使唔使連份工都唔要呀？定啲嚟喎小妹妹，你應該唔敢同呢個Wendy講嘢㗎啦，畀佢電話號碼我吖，同埋佢有冇send過任何msg畀你？Voice msg都得，我想知佢同你講啲恐嚇說話有冇留底。」其實我都要確認Amy唔係「報假案」，起碼要知道真有其事先。
睇完啲msg截圖，講嚟講去都係嗰幾句，總之就係話Amy得罪咗佢，又冇講點樣得罪，但的確提及到佢老公係黑社會，如果Amy唔肯道歉就後果自負。
坦白講，有呢啲證據直接報警都得啦，自稱三合會成員喎！不過我明白Amy驚乜嘢，佢驚報警會畀人尋仇，而其實我當時已經有70%肯定Wendy係無料扮四條，仲差30%就要面對面見埋真人先知。
快刀斬亂麻，問咗Amy關於Wendy嘅返工時間，就埋Amy唔使返工嗰一日，因為唔想佢尷尬（佢哋行shift，唔係星期一至五 9至6返工嗰種），等到Wendy放工前兩三個鐘先WhatsApp過去：「係咪你叫Amy跪低認錯？」
我知道做call center唔方便即刻覆電話，但一路做嘢一路睇msg應該冇問題，點知都要隔咗大半個鐘先有reply，期間我搵過Amy，確定Wendy有msg佢，想打聽我係何方神聖，吩咐咗Amy已讀不回。
Wendy終於按捺不住：「你邊位呀！」
我：「一陣你收7點吖嘛，公司樓下見啦！」
Wendy：「點解我要見你呀？你係咪帶埋Amy嚟同我道歉先？」
我：「你可以唔見我㗎，有本事咪匿喺call center唔出嚟，唔好放工喎知唔知呀？」
放心，我都係女人仔一名，冇咁大膽自己去，之前咪提過有個friend做收數嘅，我叫咗呢個朋友車我去，有個兇神惡煞嘅男人傍住點都安心啲，點知Wendy老公係九紋龍定係陳浩南呀，話唔定已經call晒山雞同蕉皮上晒架生恭候我㗎嘛！
當晚見到Wendy真人，係一個年約三十尾至四十歲左右嘅女人，皮膚好黑好瘦，江湖味就冇喇，八婆味就好濃烈，佢第一句就問：「Amy呢？」
我：「你個黑社會老公呢？」
Wendy：「我使唔使同你交代呀？你係Amy邊位呀？」
我：「特登早幾個鐘約你，黑社會老公又冇，爛仔又冇，即係冇料到啦！我係Amy邊位你唔使理。」
Wendy：「八婆你都幾L串喎！」
唉，同呢啲人講太多嘢真係會影響智商，之前個宴會部經理同埋X先生都叫做讀過下書，眼前呢個Wendy完全唔同檔次。
我：「你唔好理我串唔串啦，Amy咩事得罪你，搞到要人喺公司跪低道歉？」
Wendy：「佢嚟咗之後同我爭假，你自己問下佢，我不嬲放星期日，點解要讓畀佢呀？同埋有個客明明喺remark度打咗由我跟，Amy之後跟咗，個客同supervisor讚佢，其實我一早搞掂晒㗎喇，搶功勞呀？當我冇料到呀？」
由於個收數friend最初驚我出事，所以企埋喺司機位出面聽住，條友仔聽完Wendy講嘢之後笑咗，喂大哥，你專業啲先啦，雖然好鳩屎，但我真係做緊嘢㗎！
我：「唔想聽你講咁多嘢，Amy驚你啫，我唔驚，有晒截圖睇到你點樣恐嚇佢，自稱三合會成員吖嘛，我而家就報警，一係你而家叫個黑社會老公出嚟，我車埋你去警署又點話。」
Wendy：「你使唔使玩到咁寸呀！」
屌！簡直浪費人生！小學雞咩！Wendy根本蝦Amy係妹妹仔，遇到我呢啲不明來歷嘅人就淆晒底。
我：「你都幾廿歲人啦！仲玩呢啲嘢？講真，你老公如果撐你，一早嚟咗啦，唔好搞到我要報警咁老土，你再搞Amy我就唔客氣，同事係咪要跪嚟跪去玩恐嚇呀？打份工啫，有糧出咪得囉！」
蠢到Black and White話自己老公係黑社會，一早有70%肯定係無料扮四條，見完面之後再確定另外嗰30%係白卡，兩招收皮，冇將說話講得太盡，係想睇下Amy之後仲有冇遇到麻煩再決定點做。點知第二日Amy返工順手辭埋職……咁你叫我同個Wendy傾嚟做咩呀？
Amy：「本身已經麻麻地份工，我係驚Wendy搵人搞我，佢今朝態度變咗好多，又問你係我邊個，我唔想再對住佢喇，原來佢老公都唔係咩黑社會，我諗住返加拿大，麻麻地香港。」
Wendy老公未必唔係黑社會，但頂盡係嘍囉level，不過人各有志。聽得出Amy係有錢女，根本唔志在份工，純粹到此一遊，早知收佢多啲啦，初初以為Amy係妹妹仔，呢單job象徵性收3000咋！連我個收數friend都話：「搞咁多嘢收3000銀？好在人哋老公唔係咩大佬啫，車你去真係油錢都蝕埋。」
油錢都蝕埋又太誇張，不過自從第一單job開始，每次都係打天才波海鮮價，拎返酒席錢嗰次收萬幾蚊，擊退X先生收咗3萬，Grace就收咗1萬，Amy呢次收3000，都係時候制定收費嘅準則，因為好多人上網search到放酒店Cash Voucher單嘢之後都轉折地走嚟搵我。
另外，Grace嗰次坐廁所門口事件亦令我有所覺悟，始終而家個身份角色好模糊，如果想涉獵埋一啲商業糾紛嘅case，至少我要出師有名，所以我報咗名讀調解員嘅課程，第日依正途可以搵我，暗黑job好似面對X先生嗰種對手又可以搵我。
今日又有人向我quote價，叫ptgf叫到返屋企，而家畀人勒索，可惜隻job進行中，如果仲有人想聽故事，等我完成之後，再投稿講呢單嘢吖！
(暫完）