「你知唔知老細勁狗？拎完保就業就炒晒我哋，原來佢之後請過一班人工再低啲嘅人， 政府又唔check，淨係計人頭，所以老細賺完資助再賺埋新舊員工嘅差價，鬼唔望佢間公司快啲執笠！啱㗎喇，仲喺度做嗰幾個奸到出汁，真係物以類聚。」
舊同事打嚟係咁鬧係咁鬧，我唔係唔嬲，不過感覺已經冇咁大喇，因為都隔咗一段時間，當時被炒之後的確好傍偟，又撞正疫情呢，啲公司好多都work from home，招聘廣告重重複複，無計可施之下我走咗去做保安，好在之前陪個friend考咗個牌，個course都係兩日，估唔到最後救我一命。
我去咗一間學校做保安，大嘢，名就唔開喇，最初係幾唔慣，又要返通宵更，多姿多采嘅生活突然變得好頹，每晚6點幾已經要搭車返工，第二朝先收工，加上冇分星期六日同埋紅日，日光日白嘅時間用嚟瞓覺，完全冇晒正常社交。
小弟得廿幾歲，公司全部係阿叔阿姐，曾經有後生仔女嚟做㗎，都未趕得切同佢哋熟，轉個頭又話辭咗職喇，都合理嘅，聽講當中有一兩個仲要係大學生，所以睇得出係騎牛搵馬，唔似得我呢啲窮L屋邨仔冇得揀，手停口停吖嘛，咪做一排先再搵工囉！
份工對我嚟講最大嘅挑戰係巡樓打鐘，唔係驚鬼，我驚叉錯腳，因為我返夜更，打鐘嘅路線又包括學校天台，嗰度簡直危機四伏，聽講之前有個女保安就曾經中招，踩咗落一塊空心板上面然後跌親，call晒白車好大件事，自此我間保安外判公司就只會搵新人去巡呢啲路線。
呢間學校仲有好多鬼故，不過我超級大膽，完全唔驚鬼怪嘢，仲試過蛇王入課室睇恐怖片，戴埋earphone好feel過大戲院，班同事話課室夜晚最多怪聲喎，又話入去瞓覺曾經見到啲枱凳郁，又話有女人聲喺耳仔邊講嘢，是但啦！總之我就冇感覺。
基本上所有嘢我都handle得到，唯獨是有個阿叔就真係out of control，唔知點解一入嚟已經好憎我，有時經過我身邊會無啦啦講粗口……
「DLLM！」
我：「你做乜鬧我？」
「DLLM！仆街啦！」
有冇第二句呀？我初時以為佢「有啲問題」，加上自己係新人，所以就啞忍咗幾次，但係每日都畀佢問候老母，我終於忍唔住同阿頭講。
阿頭：「阿仔，唔使驚呀！阿叔精神冇問題，佢覺得係你迫走咗佢個friend啫，所以咪咁憎你囉，好小事。」
我：「邊個係佢個friend？」
阿頭：「華叔囉，其實都唔關事，因為華叔已經60幾歲，公司想佢走好耐㗎喇，年紀太大聽講買勞保好麻煩，又貴，上面一早就想年輕化，之前有幾個後生仔女唔做之嘛，如果唔係點止淘汰華叔一個吖！」
我：「因為我入嚟做所以炒咗華叔呀？」
阿頭：「又唔可以話炒嘅，我哋呢度係逐年逐年簽新約，華叔份約到期，公司選擇唔同佢續啫，總之冇事啦，你畀心機做啦，上面鍾意你呢啲後生仔呀，話咁樣有朝氣啲，你又識幾句英文呢，肯做隨時好快有得升。」
唔知點解聽完之後有啲難過，社會對年紀大嘅人特別無情，轉行轉工難，原來留住份工一樣咁難，雖然就算唔係我入嚟做，嗰個華叔都會畀其他後生仔淘汰，我事前亦唔知道咁多嘢，但係聽到華叔曾經苦苦哀求續約不果，內心點都覺得難受，今日我廿幾歲啫，將來都會老㗎，到時一樣會被社會淘汰。
不過成日用粗口鬧我嗰個阿叔冇幾耐都走埋，因為公司請咗一個30幾歲嘅男人，而粗口阿叔又約滿，呢間外判保安公司似乎真係好想keep住換血。
某一晚我巡完樓打完鐘，想搵個課室睇下Netflix煲劇，長夜漫漫都要打發下時間㗎嘛，路過某層樓某課室嘅時候，我聽到入面有聲，係啲枱枱凳凳移動發出嘅「Eat Eat」聲，聞名不如見面，終於可以感及下呢間學校有幾猛喇！打開門用電筒照一照，我簡直唔敢相信眼前嘅影像，啲「Eat Eat」聲唔係鬼，而係……我阿頭，仲有一個保安阿姐同事，兩個人條褲都除咗一半，上身整齊，狗仔式硬生生停止，我哋三個人嘅表情係一致，都係咁錯愕。
我：「對唔住！對唔住！」唔知點解自己要講對唔住，我明明巡緊樓，但係見到佢兩個喺課室連為一體做運動，我竟然好順口咁講對唔住，急步離開嗰陣覺得呢個世界好痴線，而家點收科呢？
後面一把聲喝住我，係阿頭！
阿頭：「喂！喂！」唔會殺人滅口啩。
我：「係。」已經唔知可以講咩對白。
著返褲嘅阿頭走咗上嚟搭住我膊頭，其實你頭先摸過阿姐邊度㗎？唔洗手就搭住我……
阿頭：「唔好同人講，得唔得？」佢冇任何開場白，好直接講出訴求。
我：「冇問題，放心，唔會講。」
阿頭：「唔該晒！聽日編返個靚仔路線你巡，你幫我，我幫你，好唔好？」
我：「好！」離開之後，我腦海仍不斷浮現阿頭同阿姐嘅狗仔式定格，太震撼。
我冇爆出去，阿頭亦守承諾編過新路線畀我巡，但佢可能想買個保險，自此之後對我好好，好到我覺得自己唔似做緊保安，每日返到學校都同皇帝一樣，呢個時候有朋友介紹我去佢公司做，文職，朝九晚六，仲強調完全冇OT。
我：「唔喇。」
朋友：「點解呀，你唔係一直搵緊文職咩？」
我：「但係我做得好開心。」
朋友：「返保安好開心？你明明唔鍾意返通宵㗎，又話傷身又話柒。」
狗仔式事件之前就係，但係今時唔同往日，我每日返工都好爽……（未完待續）