Tiffany介紹嗰單新生意我接唔到，因為對方想追債，重點係個債仔已經失咗蹤，我向佢解釋自己同人講數……應該係談判，最低限度要有對象嘅contact，例如追番酒席錢嘅對頭人係宴會部經理，Tiffany事件嘅對口就係X先生，我嘅服務唔包括尋人。
我：「不如咁啦，我有個朋友做收數，試過搵到個債仔失散咗廿幾年嘅親阿哥，追債變咗一家團聚，勁到癲，你真係需要再同我講，我朋友好似無論追返幾多都收你兩成，聽講係行規，總之呢單嘢要尋人我就做唔到喇，唔好意思。」
後來又試過有客搵我追返4隻勞力士，事緣佢10年前有間好細嘅貿易公司，當時賺到第一桶金，然後轉行搞另一啲生意，結果送咗勞力士畀4個好幫得佢手嘅員工，當係遣散費同埋答謝，點知咁多年後嘅今日，佢投資失利，而家負債累累。
「嗰幾隻勞力士升晒值，當年送畀佢哋嗰陣每隻幾萬蚊，而家升到十幾廿萬，我問佢哋可唔可以念舊情畀返我應急，唔係借錢喎，想攞返啲錶啫，點知一個話唔畀，兩個話已經賣咗，另一個就話最多畀返當年嘅價，你幫我同佢哋傾傾吖。」
其實佢意思係想我幫手兇人，喂大佬，冇point喎！你已經送咗畀人10年，唔係叫人保管，當初又冇附帶條件，同人談判都要有理據吖，何況佢自己都搵過律師，人哋話追返嘅機會好微，所以呢單生意我無能為力。
結果第三單做得成嘅生意都係由Priscilla介紹，佢有個朋友叫Louis，我哋約咗喺cafe見面。
Louis：「係咁既，我老婆辭咗職之後日日畀上司玩針對，而家只係過咗半個月，真係好難捱，好幾次佢返到屋企都匿埋喊，作為老公望見都心痛。」
辭職後被上司留難，初時我認為方法得兩個，一係捱埋佢，多咗嘢做時間可能過得仲快，再唔係就豪少少賠錢提早走，反正你都係要畀錢我啦，不如用啲錢嚟解約咪更加乾手淨腳。
Louis：「佢間公司連Junior辭職都要兩個月通知，其他人就三個月，所以我老婆仲要坐多兩個半月，老婆份糧3萬幾，唔甘心就咁賠錢早走，同埋個上司唔係安排好多嘢畀佢做，相反地，係完全唔畀嘢佢做，不過連電腦都收埋，話唔想佢辭職後再接觸公司任何文件同資料，最過份係set咗張乜都冇嘅枱仔同埋凳，要佢坐喺廁所門口。」
我：「你老婆個上司都幾仆街喎！」
Louis：「係呀，我老婆前兩晚喊住講，要佢齋坐喺廁所門口真係好難堪，佢公司又大，好多男女同事出出入入去toilet，個個見到佢畀人罰，仲要有紙牌喺張枱寫住『已離職同事』，就算小學生被老師罰企喺走廊都會難堪啦，我老婆咁大個人，又唔係做錯事，辭職啫，點解要罰佢坐廁所門口呀？連電腦同文具都唔畀佢，係咪打一份工要簽賣身契，轉工就要當佢十惡不赦吖？」
睇得出Louis好錫老婆，佢愈講愈激動，Cafe嘅人都擰晒過嚟。
我：「你想我搵你老婆上司講數？」其實佢老婆公司嘅內部情況，我喺身份上都唔知應該點介入。
Louis：「唔係，我想你同我老婆傾傾，其實我唔介意幫佢賠錢㗎，就當早走兩個月要賠6萬幾蚊，咁咪照賠囉！畀唔起咩？同埋我叫過佢返到公司玩嘢，鬥鬧之嘛！橫掂都唔做啦，使乜畀面佢上司呀？我以前公司都有個人辭職唔想坐一個月，又係畀老細留難，結果佢日日喺公司開到個收音機勁大聲，最後老細咪又係買佢怕，賠返錢畀佢早走添呀！只要唔好心軟就得啦！」
由於Louis同佢老婆講我係「朋友」，有調解員方面嘅經驗（我當然冇專業資格啦），所以我隨即就安排食飯，Louis冇去，佢話自己脾氣唔好，每次聽到老婆畀人蝦就會扯晒火好唔理智，所以決定交畀我處理，目標係獻計叫佢老婆同上司玩大佢，如果真係唔得，咁就嘗試說服佢老婆賠錢早走，唔好再拘泥於兩個月人工，錢冇咗可以再搵，最緊要保留尊嚴。
Louis老婆叫Grace，我哋約咗食晚飯。
Grace：「唔好意思，你係我老公朋友？麻煩到你唔好意思，其實我知佢想我點樣。」
我：「唔緊要，當傾下計啫，個上司真係叫你坐正廁所門口呀？電腦文具乜都冇？好過份喎！」
Grace：「係呀，佢以驚我洩露公司機密為由，唔畀我掂任何公司嘢，講到明要我齋坐三個月，其實好多朋友都叫我唔好理，佢哋話廁所門口咪廁所門口囉，冇電腦冇嘢做咪用自己手提電話上網打發時間囉，講係咁講啫，但你身處其中好難捱㗎！公司大，成日有人喺廁所出入，你又唔係同個個都熟，同事路過眼望望，有啲就竊竊私語，呢下真係好惡頂。」
我：「想問下呢，上司淨係對你咁樣，定係每逢有人辭職都會玩嘢？」
Grace：「呢個上司係早兩年空降嘅，佢嚟咗之後成個部門已經無日安寧，掟文件、粗口問候、當眾大聲喝罵同事，有幾個Junior都忍唔住走咗，所以近年流失率好高，但可能後生嗰班冇乜家庭負擔，同埋佢哋始終得萬零蚊，所以據我所知有兩個妹妹仔係賠錢走，另外有個男仔就不辭而別，reference letter都唔要，不過上司好似有追究，直頭叫公司出律師信追返人工。」
我：「咁絕玩到出律師信？」
Grace：「佢告緊人，但都有人告緊佢，之前有個女同事resign，上司日日單單打打當眾話佢，仲講咗句：啱啦！你咁鍾意著短裙返工，喺呢度做嘥晒，出面有啲工搵得仲多呀，你明我講乜啦！」
我：「可以告佢性騷擾喎！」
Grace：「告緊喇，早排之嘛，唔知而家發展到咩地步，因為我同其他人直情隔絕咗，公司又唔方便講嘢，上星期佢先迫走咗一個生完BB冇幾耐嘅同事，原因係對方未打齊三針，日日就話人自私累街坊，又係架空晒啲工作，連開會都唔畀人入去，其實個同事上年大肚，生BB唔想打疫苗住，之後都打返啦，只係未齊三針啫，每日單單打打好似當同事有傳染病咁。」
我：「未打齊針都關佢事？防疫大使呀？唔識得體諒人哋有陀B嘅考慮？」
Grace：「佢成日話未打齊針嘅同事扮清高，鍾意搞對抗，仲話有本事一世唔好打，唔好第時入唔到食肆或者去唔到旅行就死死地氣打針，又扮晒嘢話咩含淚打，總之佢講嘢好難聽好武斷。」
我：「咁應該好多人憎你上司啦！」
Grace：「其他部門咪食花生睇戲囉，自己department嘅同事就知道發生咩事，個個都唔妥佢，但呢度辭職要兩個月或者三個月通知，真心好麻煩，除非你把心一橫賠錢走。」
我：「聽講你人工成三萬幾喎，如果要賠都幾甘，而家仲要捱多兩個半月？Louis話佢唔介意畀呢嚿錢。」
Grace：「介唔介意畀，同埋值唔值得畀係兩回事，已經做得咁唔開心，仲要我倒貼幾萬蚊畀公司？同埋Louis成日教我同個上司玩大佢，叫我日日返去用粗口鬥鬧，叫我特登播大聲音樂搞事，又提議日日曠工直至公司炒我，其實佢唔係親身經歷嗰個，講就梗係易啦，我係當事人，要喺公司獨自面對，唔係咁容易做得出，同埋行頭好窄㗎咋，好似而家嚟見工啲人咁，來來去去都係行內嗰幾間公司。」
聽完Grace咁樣講，我有一個大膽嘅諗法。（未完待續）