Tiffany真係一個好善良嘅女仔，聽到我話以其人之道，還治其人之身，佢第一個反應唔係拍手叫好，而係擔心X先生會諗埋一邊，繼而做出自殘嘅行為，對唔住，我份人比較直，善良還善良，但係咁樣同大愛左膠或者道德撚係冇乜分別。
由於X先生鍾意就block我，得閒又unblock，咁我唯有喺冇預警嘅情況下打去X先生公司搵佢傾計，點知佢行開咗，咁就正合心意，接電話嘅人係佢女同事，我問點稱呼，對方話自己叫Kristy，真係好高興認識你呀！
我：「你好呀Kirsty，我姓馮，請問你知唔知X先生嘅為人係點㗎？平時佢喺公司又係點㗎？」
Kristy：「呀……馮小姐係咪？唔好意思你其實搵X先生咩事？不如留低個contact先，我叫佢返嚟覆你吖！」
我：「唔係for公事㗎，其實係咁嘅，X先生一直纏住我朋友，咁佢冇理由成日蝦個女人仔㗎嘛，人哋唔鍾意你就唔鍾意啦，佢又係咁約食飯，騷擾我朋友啲舊同事，又想套我朋友新屋企地址，你都係女人，如果你遇到呢啲男人都驚啦，想同佢理性咁傾都唔得，我咪打嚟佢公司囉，講開又講，小心啲佢會睇中你，X先生係唔會理人意願㗎，你哋……唔係辦公室戀情呀呵？」
Kristy：「我哋普通同事嚟啫，一係咁吖，你留低電話，我叫佢一返嚟即刻call back你好冇？」
我：「好呀！」任務達成。
過咗10分鐘唔夠，X先生真係打嚟，火氣大到呢，Hello都冇講就狂爆一連串粗口，有迴音嘅喂，肯定去咗後樓梯啦，但係唔緊要，你嘅反應全部喺我意料之內，粗口流利唔係大晒嘅，中point先有用㗎嘛！
我：「冷靜啲，大家斯文人，咁嬲做咩呢？」
X先生：「你點解知我喺邊度返工㗎？Tiffany同你講㗎？」
其實係，但我去過LinkdeIn搵，輕鬆search到X先生，仲有佢公司幾個同事嘅名同title，所以我攬咗上身。
我：「你當時點搵到Tiffany做邊間公司，我咪點搵到你做邊間公司囉，全香港得你識用LinkdeIn咩！哦，你用LinkdeIn搵人就得，我用LinkdeIn搵人就唔得呀？」
X先生：「你點解要同我個同事亂講嘢呀？你痴撚線㗎！仆你個街！」
我：「唔夠你仆街，答返你先，你搞Tiffany嘅舊同事，我咪搞你而家啲同事囉，好公平㗎，都係嗰句，你搞人就得，人搞你唔得呀？」
X先生：「唔好再畀我知道你打嚟我公司，警告你唔好再搞事呀死八婆！」
我：「你警告我就要聽？Tiffany都警告過你好多次唔好騷擾佢，你有冇聽？」
X先生：「我唔撚理，你再搞事信唔信我告你？」
我：「喂，好呀！唔怕同你講埋，Tiffany畀你騷擾咗咁耐都試過報警同搵律師，可惜冇用，如果你知道點樣告得入，麻煩單聲我知，嗱，分先後次序呀，Tiffany告咗你先，跟住再輪到你告我，因為係你騷擾人在先㗎嘛！」
然後X先生cut咗我線。
同Tiffany匯報返個情況，其實我估X先生搵過佢，但由於Tiffany block咗所以搵唔到，另外再確定嗰幾日冇異樣，起碼冇舊同事打畀Tiffany話X先生急call，咁就OK喇，同我估計嘅冇錯，X先生知道自己食得住Tiffany，但食唔住我，有咩依郁我會再打去佢公司，所以預期就算幾嬲都會克制。
不過對敵人心軟，即係對自己殘忍，講到明以其人之道還治其人之身，X先生之前點樣精神虐待Tiffany，我就點樣精神虐待返X先生，最緊要攻其不備，我估嗰幾日X先生喺公司連廁所都唔敢去，過多兩星期等佢鬆懈咗先，暴風雨嘅前夕當然要平靜啲啦！
今次我真係借助LinkedIn喇，睇睇X先生係咩title，再搵到一個人叫Michael，職位上高過X先生，I want you!
打去總機話搵Michael，好快就駁咗去：「Hello Michael，請問X先生係咪你下屬？」
Michael：「係呀，請問你係邊位？有咩幫到你？」
我：「係咁嘅，X先生有個前女友叫Tiffany，我係佢前女友嘅best friend，想同你講講X先生呢幾年冇停止過騷擾Tiffany，又去佢舊居樓下等，又chok佢新地址，最過份係打畀佢啲舊同事，我哋諗住報警㗎，想問下X先生喺你公司係咪咁樣對其他女同事？如果有其他受害人，可以一齊去備案喎！」
Michael：「下……呢啲都係員工嘅私事，我唔方便問太多，你都係搵返佢傾啦。」
我：「明白既，或者我搵佢傾傾先，有咩事需要幫忙再打畀你吖，如果佢繼續騷擾我朋友，真係唔排除會報警同埋搵你哋老闆，我喺LinkdeIn搵到你老闆contact㗎，鬼佬嚟㗎嘛！」
的確係唔關Michael事，亦唔係佢管轄範圍，我講咁多嘢無非都係想呢個Michael知啫，唔通真係要佢查有冇其他受害人或者幫忙咩，而家你下屬唔知喺出面搞乜，隨時連累公司，又可能驚動老闆，冇理由唔捉X先生入房問清楚吖！
今次等耐咗，足足大半日先等到X先生電話，但佢並冇連珠炮發，反而係死晒狗嘅語氣。
X先生：「馮小姐我求下你唔好再搞事啦，你唔好再打嚟公司搵我啲同事得唔得呀？你仲要搵我上司，使唔使咁呀？」
我：「唔好意思，我來來去去得嗰兩句，Tiffany都求咗你幾年啦，你咪一樣搵佢班舊同事，你搵埋佢舊老細添，我都未搵你個鬼佬老細。」
X先生：「我都冇搵啦！」
我：「點知你幾時再搵呀，耐唔耐一次都唔好啦，你係未搵，唔係冇搵，所以我會keep住㗎，跟你學嘢咋！係呢，可唔可以約你，不過想去你公司傾。」
X先生：「你係咪痴線㗎，唔得呀，總之你唔好再搞我，唔好再打嚟我公司，我唔會再搵Tiffany！」
我：「其實你點對佢，我點對你咋，冇做多冇做少。」
X先生：「是但你點講啦，總之你唔好再搞我。」
我：「喂呀，可唔可以約你，想去你公司傾呀。」
X先生：「頭先咪同你講咗囉，唔得呀，要我講幾多次呀？」
我：「呢招都係跟你學，你問咗Tiffany可唔可以出去食飯，佢答唔出，你轉頭又問，咁我估你份人可能善忘吖嘛，咪問多次可唔可以上你公司囉！我同你做嘅嘢一模一樣，冇分別㗎！」
X先生：「你再搞事，最多我轉工㗎啫，同你玩大佢。」
我：「冇所謂㗎，你咪轉囉，你轉工但係班同事仲喺度做㗎嘛，我會keep住搵佢哋，放心。」
X先生：「我咪講咗唔再搵Tiffany囉，你仲想點呀？」
我：「想問下你係咪感受到Tiffany之前承受嘅精神同埋心理壓力喇？佢冇欠你任何嘢，但係都好驚你，人哋已經唔聽你電話，唔應約，唔想同你有任何瓜葛，但你仲去騷擾啲舊同事，你知唔知佢好尷尬，而家我騷擾你嘅同事，你先至有尷尬嘅感覺？己所不欲勿施於人，同你一齊係佢呢生人最後悔同埋最唔想提起嘅事，我惡少少你就驚，你擺明就係欺善怕惡，係唔係男人嚟㗎！一句到尾，你再騷擾Tiffany或者佢身邊嘅人，我一定會鏟上你公司，係咁！」
件事去到而家過咗半年，期間有聖誕節、新年、情人節等等，以前X先生一定會用節日祝福借頭借路搵Tiffany，不過之後真係冇喇。我唔相信自己嘅說話可以令X先生反思，因為佢份人係唔會覺得自己錯，我嘅目的只係要佢不安。
Tiffany話曾經好驚X先生會受刺激做傻事，我100％肯定唔會，因為X先生最愛嘅唔係Tiffany，而係自己。
真正鍾意一個人係會想對方過得好，點會想對方痛苦？佢一直迫Tiffany接觸、食飯、再喺埋一齊，其實都係滿足緊自己嘅欲望，而我搵佢嘅同事，影響到佢嘅名聲同工作，因為針桔到肉，影響到自己，X先生咪收手囉，但佢做同樣嘅事去傷害Tiffany嘅時候，有冇諗過高抬貴手放過人？冇！因為X先生除咗係病態之外，仲係一個極度自私嘅人。
我同Tiffany講：「佢搞人就得，我搞佢就要擔心埋佢會唔會做傻事？咁偉大我不如去非洲做義工再拯救地球……Sorry，唔係話你，激動咗，唔好意思。」
Tiffany：「唔緊要，我明白既，今次真係唔該晒你，佢好耐冇搵我喇，另外想問呢，做你談判專家呢行係咪咩糾紛都會接㗎？」
我：「談判專家？哈，我唔係專業嗰啲，唔敢當，我當同人鬧交㗎咋！點呀，仲有其他仔煩住你呀？」
Tiffany：「唔係呀，我有個friend想搵你幫手，但佢唔係好多錢，不如你聽咗個故事先決定吖。」
「談判專家」呢行有得做喎，生意一單接一單，唔通我要辭咗份正職專心發展呢門生意？（未完待續）
《談判專家》1
https://hkofficedaily.com/?p=21562
《談判專家》2
https://hkofficedaily.com/?p=21567