搞掂酒席事件之後，Priscilla介紹咗同事Tiffany畀我，佢想用3萬蚊「撇仔」，其實我覺得好誇張，分手咪分手囉，使唔使用錢搵人幫手呀？個男人係有勢力人士？抑或驚對方情緒激動會斬你？為保安全，我有問清楚來龍去脈。
Tiffany：「我哋分咗手7年喇，係7年呀！勸又勸過，鬧又鬧過，不過佢仲會keep住搵我，唔怕同你講埋，因為呢個前男友不斷纏繞，我報過警，問過律師意見，睇過心理醫生，真係唔想佢再喺我生命中出現，我好怕佢。」
聽完呢番說話之後，我依然覺得好無稽，block電話WhatsApp咪得囉，有咩咁大不了呀？
Tiffany同佢前男友X先生係舊同事，當時拍拖唔夠一年就分手，因為X先生醋意好大，而且為人好小器，Tiffany同其他男同事講句嘢都會嬲，仲要氹，成日做做下嘢叫Tiffany出去公司後樓梯攬攬錫錫，又會叫Tiffany入會議室傾計擁抱，間唔中一次就話激情浪漫啫，差唔多日日都要就好大壓力，始終公司咁多人，畀同事見到就唔好啦。
合則來不合則去，但分咗手之後，前男友仲日日打一大篇msg畀佢，又去佢屋企樓下等，Tiffany勸又勸過，工又轉埋，情況都係冇變，唯一慶幸係Tiffany同家姐搬咗出去住，起碼唔使失驚無神見到X先生出現。
Tiffany：「其實我block過佢WhatsApp同電話，但係佢一搵唔到我就會搵舊同事，係咁問人知唔知我過成點，啲舊同事同返我講，個個嘅語氣都好奇怪，好似覺得我同佢有錢銀轇轕或者其他把柄，早兩日先有個舊同事call我，佢話X先生搵得我好急，問係咪有咩事？我受唔住呢種心理壓力呀，點解要騷擾埋其他唔關事嘅人呀，我都要面㗎！」
我：「X先生仲喺舊公司做？」
Tiffany：「佢都轉咗工喇。」
我：「純粹搞清楚，真係冇錢銀轇轕？」
Tiffany：「真係冇呀！」
我：「會唔會有咩閃卡裸照或者片……之類啦，大家女人唔怕講，係咪佢要脅你？」
Tiffany：「都冇呀！已經好多舊同事畀佢騷擾，連我舊老細都打嚟問我同X先生係咪有咩事，問點解X先生會搵我搵得咁急，我頂唔順喇，我都冇欠佢任何嘢，分咗手點解仲要纏住我唔放呀！」
Tiffany封鎖過X先生唔止一次，但因為X先生搞到班舊同事，又去LinkedIn刮到Tiffany喺邊間公司做，所以嗰種精神壓力真係好大，Tiffany為咗同X先生講清楚，又unblock返對方。
雖然unblock嘅原因令人無語，不過我明，因為唔想佢搵唔到自己又搞其他人，日日提心吊膽。
其實Tiffany同我講嘅時候已經有啲失控，完全體會到佢係點樣畀X先生精神折磨，係一種無形嘅心理壓力，佢冇欠X先生錢，亦冇任何不雅照片喺對方手上，當時分手唔涉及第三者，根本冇負到X先生，但仍然要受到咁嘅對待。
Tiffany 11月生日，X先生 10月已經WhatsApp話要約食飯，Tiffany畀我睇佢當時點覆。
我：「你reply有心喇，唔需要特別食飯，約晒朋友冇時間～～～Ok吖，冇問題呀，我嫌你有禮貌得滯添呀！」
Tiffany：「咁你睇下佢點覆。」
X先生回覆「得啦，預咗你份人係咁。」嘩，你問人食唔食飯，唔係option嚟㗎喎，係order喎！答唔食都要聽你講呢啲說話？
記得個時間軸未？Tiffany 11月生日，X先生 10月約食飯被拒，去到11月，X先生又好似失憶咁再send msg約Tiffany，我睇緊啲咩？又問出唔出嚟食生日飯？咪推咗囉！
我：「點解你唔鬧佢呢，太客氣喇。」
Tiffany：「你再loop前啲情人節同上年聖誕節嘅msg，我鬧過喇，然後佢鬧返我，呢幾年軟又試過，硬又試過，平時絕對唔會同佢傾計，佢msg我都會隔兩三日先覆，但係大時大節收到佢msg都會令我好唔開心，每次佢WhatsApp我，見到佢個名就心情低落，手都震晒，因為我好憎呢個人，又好怕佢搞我，佢check埋我做邊間公司。」
如是者，我叫Tiffany約X先生出嚟，但當日我單拖赴會，X先生初時表現錯愕，不得不提嘅係，呢個男人外表係好正常，斯文西裝友。
我：「我姓馮，係Tiffany朋友，佢話你不斷騷擾佢，有咩事而家同我講清楚啦！」
X先生：「我唔明佢點解要搵你出嚟，我只係當Tiffany朋友，想同朋友食餐生日飯啫。」注意，佢呢句仲係好平靜。
我：「其實分咗手不如撇脫啲，唔係個個都想同前度做朋友，Tiffany表達得好清楚，各走各路，好來好去啦！」
X先生：「我知呀！Tiffany鍾意收兵吖嘛，佢身邊好多狗公狗閪，個個男人都係想同佢上床，淫賤呀！淫婦呀！姣婆遇着脂粉客！」
四個字形容X先生，就係一秒跳掣。而且X先生嬲起上嚟講嘢係語無倫次，咩淫賤呀！淫婦呀！完全冇邏輯可言。
我：「你一直以嚟就係咁樣鬧佢？點都好啦，Tiffany已經同你分咗手，唔係啱啱分手，係分咗7年，你冇權管佢嘅私事，記住，佢冇欠你任何嘢，放過人啦！我有你電話，啱啱WhatsApp同你打咗個招呼，Tiffany已經封鎖咗你，今次點都唔會再unblock，有咩事唔好搞班舊同事，直接搵我，唔好蝦人哋係女人仔，你好無恥呀知唔知呀？」
X先生嬲到起身走人，我都知件事未解決㗎喇，但估唔到同一晚就收到X先生msg。
X先生：「對唔住，頭先係我唔啱。」嘩屌，條友精神分裂咁喎！
我：「得㗎喇，唔使講對唔住，你唔好再搵Tiffany，唔好再搵你哋嘅舊同事打聽佢消息，ok？」
X先生轉而voice msg：「點解你哋啲女人咁樣嘅，人哋對你好又唔知，又唔接受人哋嘅好意，我對Tiffany好失望，你叫佢unblock返我，有嘢要同佢講，你叫佢唔好再封鎖我呀，聽唔聽到呀！」
又一秒跳掣，Tiffany咪講過自己因為不斷被纏繞要睇精神科醫生既，喂搞錯咗喎，係X先生要睇精神科先啱。
你voice msg，我咪voice msg囉：「其實你係咪覺得講嘢大聲我就會驚？」呢個voice msg仲係雙剔兼夾個mic轉咗色，即係聽咗啦，我再打多句文字msg：「喂，應機啦，我叫你唔好再騷擾Tiffany呀！」呢句變咗一個剔，第二朝起身仲係，唔知X先生係block咗我定係熄咗機。
隔多日，X先生應該係搵唔到Tiffany，又Whatsapp我……
X先生：「我買咗份生日禮物畀Tiffany呀，可唔可以叫佢畀個地址我呀，我寄過去就得㗎喇！」
我：「冇人想要呀，唔要呀，慳啲啦你！」
X先生又跳掣：「我而家想要佢地址寄禮物咋，我買咗喇，淨係收禮物點解唔得呀！」
我：「你唔好當人戇鳩啦，你想要佢個新地址，然後去伏佢係咪呀？睇穿你啦！畀個順豐櫃地址你要唔要？我代收，你都係想送啫，唔係要郵差直接送到Tiffany手吖。」
X先生冇覆我，呢條友咩事呀？好恐怖喎！一句正常，一句失常，今日扯火，聽日道歉，loop完又loop，我終於明白點解Tiffany講起佢會手都震埋。
Tiffany去差館想備案，警察話啲msg唔算好多，又冇恐嚇成份，做唔到嘢，搵律師，睇過都冇辦法去申請類似禁制令或提告，個個都話直接block咗個男人就ok，難怪Tiffany變得咁抑鬱，因為有苦自己知。
Tiffany都好想同舊同事講事情始末，但係講唔到咁多，有啲被騷擾嘅舊同事同Tiffany本身並唔熟，唔通個個都解釋咩。X先生keep住每日搵我，一時問Tiffany近況，一時要Tiffany地址，一時訴心聲，一時爆粗口，都係唔好喇，個精神科醫生不如介紹畀我睇啦好冇呀？
我搵Tiffany商量：「佢都轉咗工㗎嘛，咁佢LinkedIn搵到你而家做邊間公司，你又知唔知佢做緊邊間公司呀？」
Tiffany：「知，佢講過。」
我：「你搞返佢咪得囉！」
Tiffany：「佢搞舊同事，係因為班舊同事識我，但我都唔識佢而家啲同事。」
下欄嘢交畀我啦，以其人之道還治其人之身，等睇大報復，搞到前女友咁大精神壓力吖嘛，十倍奉還啦！（未完待續）
未睇《談判專家》 第1集可以去呢度
酒店拒延期要殺訂 「你無賴在先，唔好怪我」
https://hkofficedaily.com/?p=21562