《談判專家》 1 酒店拒延期殺訂近十萬

酒店宴會部經理:「馮小姐,你咁樣我好難做㗎喎,酒店已經交咗畀律師團隊處理,你將啲Cash Voucher擺上網賣,仲要8折出售,搞到有幾個客本身想訂酒席都縮沙,佢哋話喺出面買有8折仲平過直接去婚紗展,何必做啲損人不利己嘅嘢呢?有冇需要搞到咁呀?」

我:「最尾嗰兩句對白應該我講喎,你間酒店又有冇需要咁呀?損人不利己你都講得出,我朋友因為疫情擺唔成酒,呢啲都係拜政府嘅措施所致,但係你酒店一句唔准改期,差唔多十萬話唔退就唔退,傾都冇得傾,將心比己,如果你結婚搞成咁又會點?」

事情始末係我家姐有個朋友叫Priscilla,上年佢同未婚夫諗住擺完酒註冊就去英國住,屋都買埋,點知疫情下出現咗第一個「婚宴感染群組」,然後政府就實施一連串禁令,咁你知擺酒呢啲嘢差唔多一年前就要book,佢哋開頭根本預計唔到,所以發展成咁真係企咗喺度。

Priscilla同未婚夫已經打算延遲去英國,等到疫情緩和再擺酒,點知間酒店唔畀延期唔准退錢,唯一出路就係「殺訂」,即係夾硬嚟啫!Priscilla曾經拗到可以改期,不過嗰位宴會部經理就咄咄逼人,就算改期都要另外加多20%,又要屈多一嚿錢,否則當放棄差唔多十萬嘅訂金。

呢單嘢之前我係唔識Priscilla,係家姐有一日同我講:「呀妹,你估有冇可能幫幫我個friend追返啲訂?佢哋好慘㗎,跟住又要去英國住,畀酒店殺訂會冇咗差唔多十萬,血汗錢嚟㗎!你嗌交咁叻,不如試下幫Priscilla啦!」

由細到大我嗌交都好叻,而且唔怕煩,屋苑個業主立案法團仲幫我改咗個綽號,叫做「巴辣香雞翼」,嗰啲工程佬同師父全部怕咗我,大大隻嘅紋身漢都唔驚,遇着啲八婆更加會硬碰硬,印象中我嗌交係未輸過。

喺家姐穿針引線之下,Priscilla開始同我直接對話,講晒婚宴嘅始末,酒店以合約有條款「擁有最終決定權」為由拒絕退款同延期,仲話政府嘅決定唔關佢哋事,總之冇得擺酒就要殺訂,仲聲大大叫Priscilla有本事就去搵消委會,再唔係搵《東張西望》都冇所謂。

Priscilla:「因為消委會角色唔係執法,只可以介入討論,但係用法律途徑又會搞到好複雜,仲有律師費呢樣嗰樣,酒店又不斷搬出合約條款,我見網上有其他苦主都冇晒辦法,其實我收返7折都好開心㗎喇,唔想畀佢哋沒收接近十萬呀!」

如是者我就按照Priscilla提供嘅電話,先係打去搵個宴會部經理,日日打,一日打幾次,仲親身去埋酒店,有次佢啱啱同另一對準新人睇場地,我二話不說就殺上去搞破壞,同埋想提醒其他客人有呢啲條款,如果book場地擺酒要小心。

嗰位宴會部經理唔想搞大件事,經過多輪談判作出咗咁嘅讓步:「嗱,錢就冇得退㗎喇,一係咁,全部轉晒做Cash Voucher,你可以用返喺呢間酒店,不過只可以用嚟食嘢,唔可以訂房,因為我哋兩邊唔同部門,一係就接受,一係就算,你accept要另外簽保密協議。」

我:「你間酒店如果唔擺酒,我拎住啲Cash Voucher點食到差唔多十萬呀?你畀返錢人啦!好陰公㗎,佢哋而家唔係故意毀約唔擺酒,係擺唔到吖嘛,你又唔畀佢延期,一嚟就要殺訂,佢哋唔係大富人家,賺錢好辛苦㗎,你賺錢都辛苦啦!你都係幫公司做嘢啫,點解要搞到兩個結婚嘅人咁慘呀?而家根本係冇得擺酒,大家都唔想。」

結果宴會部經理維持原判,只係肯畀返Cash Voucher,仲要有限期一年內用晒,Priscilla覺得已經好過冇,但苦惱緊點樣喺一年內約朋友食晒佢。

我:「交畀我吖,我幫你擺上網賣。」

Priscilla:「真係得咩,如果可以一次過拎返現金,咁我7折都ok呀!」

我:「8折啦!得啦,交畀我。」

跟住嘅發展,就係有客人向嗰間酒店反映,話出面有得買8折 Cash Voucher,抵過同酒店直接book場地,抵過去婚紗展,然後個宴會部經理就搵我話咁樣好難做,又揚言會搵律師團隊之類。我叫佢搵律師囉,唔緊要,轉做Cash Voucher雖然有保密協議,但呢份協議冇話唔畀網上轉售,Carousell大把呢啲coupon買啦,何況我放上網都冇講到因由吖,係你無賴在先,唔好怪我喇。

我都唔介意咁講,正所謂好佬怕爛佬,爛佬怕潑婦,宴會部經理最終收返Cash Voucher,改為現兜兜退錢畀Priscilla,仲要退十足,臨尾佢仲要攞返個彩,話酒店只係想息事寧人,但以後會blacklist Priscilla喎……幾好笑,你唔blacklist我,我都blacklist你啦,疫情冇得擺酒最初唔肯延期唔肯退錢,要日日嘈你鬥耐力,如果第日身邊有人想book你間酒店,我會叫佢哋三思添呀!

Priscilla:「多謝你呀,我本身預咗得8成或者係Cash Voucher咋,而家有十足真係賺咗,我要畀返兩成錢你當報酬,雖然唔多,兩成得萬零蚊,但你一定要收,我未婚夫都話一定要畀。」

我冇好似啲老土劇情咁推嚟推去:「咁好啦,多謝你,卻之不恭喇,家姐算唔算介紹咗單生意畀我呢,哈哈!」

Priscilla:「講起你家姐,佢話你有個綽號叫巴辣香雞翼喎,每次你嗌交都會贏,所以我覺得你似談判專家多啲。」

我:「談判專家?係咪有人跳樓要上天台勸佢落返嚟嗰啲?梗係唔得啦,談判專家要另外讀書,我何德何能吖,拗數我就叻。」

Priscilla:「唔係喎,你真係可以發展多一樣事業喎,我有個女同事畀前男友煩足7年,報警又唔受理,佢早兩日先同我講,如果有人可以幫佢同個前男友講數,令對方唔好再煩佢,多多錢都肯畀,等我問問佢先。」

我以為Priscilla講笑,點知轉頭真係打返畀我,佢話個女同事肯出3萬,想我幫手說服前男友唔好再騷擾。

3萬又唔算「多多錢都肯畀」,30萬就話啫,不過……成交!講數有錢收,呢份part-time簡直係寓興趣於工作。

但原來感情問題係難搞過酒店單嘢,收呢3萬我差啲用晒嚟睇精神科醫生。(未完待續)

error: