有個同事整sticker好叻，即係嗰啲WhatsApp表情包，一直以嚟已經係咁拎同事啲樣衰相嚟玩，好唔好笑就見仁見智啦，公司後生嗰班都好玩得嘅，不過佢早排唔知痴咗邊條根，走去搵返幾年前annual dinner啲相，將班高層同埋老細個樣用嚟做sticker，會出事㗎嘛！
呢啲表情包正常會揀啲樣衰或者表情誇張嘅相，佢配埋啲字仲要好抵死，例如老細個樣配「你聽日唔使返工！」、「食屎啦想加人工！」又將另外幾個高層配「我最叻就係擦鞋，吹咩～」、「淫人妻女笑呵呵！」、「柒L濛濛瀨甜筒」……
咁呢啲嘢大家收埋笑冇咩所謂嘅，點知有同事download咗，但就傻下傻下send錯咗去公司個大group，呢鋪精彩喇，個大group有齊所有高層同老細，連澳門分公司同事都喺度，平時用嚟宣布下啲行政嘢，例如WFH嘅安排之類，咩事咁失策呀！
咁嗰個sticker係咩嚟呢？係其中一個阿姐嘅樣，配咗呢幾隻字：咁多人死唔見你死？
其實個同事send完已經知衰，應該係10秒之內Del咗個sticker，不過已經好多人見到，包括sticker嘅主角，即係個阿姐。
阿姐打msg：「頭先係咩嚟？」
涉事同事覆msg：「唔好意思send錯🙏🏻🙏🏻🙏🏻」
阿姐：「我問你係咩嚟，點解係我個樣？」
涉事同事：「send錯，唔好意思。」
人哋問你咩嚟，你就keep住loop話自己send錯，阿姐已經忍唔住轉用voice msg，以近乎咆哮嘅語氣再問多次，仲揚言會追究到底。
另一邊只有同事而冇高層在內嘅WhatsApp group已經起哄，因為創作sticker嘅同事並唔係錯手send出去嗰位同事，呀「創作者」係咁話唔可以供佢出嚟，邊個send錯就邊個認咗佢，篤灰死全家之類，結果send錯嗰個同事就要硬食。
不過講真吖，都唔可以話硬食嘅，你手殘喺個公司大group度send出嚟，怪得邊個吖，自己攬上身就梗㗎啦！
阿姐介意係因為sticker張相係極樣衰，影到佢面形扭曲，仲要配埋句「咁多人死唔見你死？」而家連老細都睇到，話就話del咗啫，咁阿姐都要面㗎嘛！
呢位同事死死地氣話自己只係玩下，仲鬼拍後尾枕強調只係得一張……首先，阿姐冇問你整咗幾多張，其次係，你畀阿姐覺得淨係搞佢，咁咪仲嬲。
阿姐第二日返到公司捉咗個同事照肺，問佢係咪好好玩？仲話佢侵犯緊肖像權，如果唔del同埋再整，唔排除會搵律師告佢……
不幸中之大幸係個同事預咗畀阿姐鬧，死晒狗淨係講sorry，一句都唔還口，呢件事總算係丟淡咗，好在嗰啲「淫人妻女笑呵呵！」同埋「柒L濛濛瀨甜筒」冇畀其他高層睇到咋，否則死十次都唔掂呀！
Sticker參考照片來源：林淑敏官方影迷會 Mandy Lam Official Fans Club