Headhunt撬我轉新工 佢自己in我份舊工

我遇到個headhunt真係好搞笑,其實係佢主動撩我轉工在先,初初因為聽到個brand都唔錯,咁就不妨試下啦,又冇蝕底嘅,然後呢位headhunt就安排我同佢個客嚟一次視像interview。

呢個視像interview過程順利,雙方都好滿意,不過仲未埋牙傾offer同埋package,因為要見多round,到時就要face to face上佢個客間公司見,等咗一個星期,headhunt終於有消息返,連隨幫手arrange 2nd in,見完,所有嘢都ok,係benefits 令我有啲猶豫,因為差過自己而家間公司。

照直同headhunt講,headhunt亦照直同返佢個客講,但benefits呢啲嘢始終係公司set落嚟,根本唔可以改,所以對方就叫headhunt問清楚我而家公司個package係點。

我:「21日大假,雙糧,bonus保證唔會少過1.5個月糧,醫療同強積金呢啲基本嘢就唔講喇,另外一年有兩次免費洗牙,生日有假,撞正紅日就會補返。」

Headhunt:「嘩,而家做in house HR咁好㗎咩?我做Headhunt又係請人,你份工又係請人,我就跑數跑到隻狗咁。」

我:「咁你又唔可以咁講,我哋in house請人雖然冇佣分,不過一樣要追KPI,我呢度幾辛苦㗎,唔係點會想試下轉工呢,食得鹹魚抵得渴囉,而家呢間公司仲有好多福利都未講晒,但嗰啲細微細眼就唔特別提啫。」

Headhunt:「仲有咩細微細眼福利呀?我想知喎!」

我:「唔……好似就嚟中秋咁,我哋公司每年都會派一盒傳統雙黃蓮蓉同埋一盒冰皮畀同事,每個月每個department都有$700蚊現金醒畀同事食飯,多就唔係多㗎喇,都開心嘅,近年蝕咗喇,未有疫情之前每年都搞公司旅行㗎,去過東京、北海道、首爾、新加坡,包晒機票酒店同埋三餐,咁你買嘢就梗係自費啦,其實疫情之前講過去平壤,北韓好煩一定要join團,我哋HR幫手搵埋資料添,可惜後來飛唔到咪冇得去囉!」

Headhunt:「我想去呀!」

我:「勸你短期唔好諗住,金正恩條肥仔古古怪怪,北韓啲疫情可能爆到九彩,隨時死咗好多人唔畀國際社會知。」

Headhunt:「我係話想去你公司做,你估得唔得?我未見過有咁好嘅公司福利呀!」

我:「唓,以為你講北韓,梗得㗎,我轉工咪有位畀你做囉!」

可能因為呢個原因,個Headhunt好努力咁樣幫我同佢個客傾條件,benefits就點都跟唔足㗎喇,不過對方願意喺人工方面再加,坦白講出手真係幾豪,喺我立場嚟講,想轉工係因為而家公司workload太重,而且人大咗之後,始終近身錢實際啲,既然新公司出嘅人工高咁多,咁就要取捨———要cash定係眷戀嗰啲福利。

我咁睇,大假差幾日,bonus雖然唔係保證1.5個月糧,但新公司講咗過去幾年最少都有1個月糧,至於其他嘢又唔算差太遠,不過份糧多咗25%喎,乜都補返數啦,你話公司旅行嗰啲福利,問心嗰句吖,你會唔會好enjoy旅行嘅時候身邊全部係老細上司同事?我賺多咗錢,不如同自己另一半旅行仲開心啦!所以有啲嘢真係要取捨,睇你點計條數囉!我寧願帳面份糧每個月多咗25%喇。

最後我順利轉工,份糧絕對滿意,而個Headhunt亦有去我舊公司見工,我有幫口㗎,只係……舊公司最後冇請佢🤣呢樣我控制唔到,真係唔好意思,先「轉」為敬,雖然個headhunt就搞笑啲,撬我轉工,然後想in返我原本份工,但都好多謝佢後期咁積極,份糧漲咗25%佢有好大功勞嘅。

投稿讀者:Henry


🤔 原來好多2018年嘅post仲未upload上嚟網站,以下就係其中一篇,有冇朋友仔3年前已經睇咗呢?

《部門主管懺悔:壓價累咗下屬一世》
https://hkofficedaily.com/?p=18055

error: