「老闆，謝謝你一直以來的照顧，踏入社會第一份工作就可以追隨你，絕對是本人的福氣，在此要說聲永別了，請你好好保重，一定要健健康康，長命百歲，如果來生仍然有機會，希望可以再成為你的員工，再與你共事，珍重！小張上」
呢封係老員工小張畀老闆甄生嘅遺書，其實甄生4年前已經退休並移居加拿大，喺當地由個女Alice照顧，Alice未嫁去加拿大之前都喺爸爸公司做嘢，而家就喺多倫多有自己嘅花店事業，雖然係甄生想知道小張自殺嘅原因，不過負責聯絡我嘅委託人係Alice，香港公司就交晒畀細甄生打理，即係老闆個仔。
由於甄生移居多倫多之後轉用加拿大電話號碼，老人家連WhatsApp都唔多用，淨係最親嘅人先有佢number，所以一般員工同埋舊客都搵唔到甄生。儘管冇取消到一直用開嘅公司電郵，不過甄生亦冇特別將電郵自動forward去個人email，既然退休同埋交咗間公司畀個仔就要放手，加上甄生近年身體狀況麻麻，再理唔到咁多嘢，今次返香港嘅目的只係搵相熟醫生做檢查。
甄生見難得返香港，早排就上去公司行下，順便同班員工打招呼，佢留意到好多老夥計都唔喺度喇，退休嘅退休，走嘅走，有啲做咗5,6年嘅人都識得佢同Alice，但有班後生仔女真係唔知甄生係邊個，正常嘅，甄生退休嗰陣佢哋都未入嚟做。
返到公司行個圈，同僅餘嘅老員工寒暄幾句之後，甄生就入自己間房懷緬一番，呢間房原封不動冇郁過，無聊打開電腦睇睇，電郵一如以往自動彈出，但由於已經退休4年，email數量唔會再好似以前咁排山倒海，碌下碌下畀甄生發現到一封舊電郵－－－「小張的遺書」。
據了解小張本來係開國功臣之一，喺公司有啲地位，但係細甄生接手後就完全失勢，仲指派佢去柬埔寨金邊做廠長，美其名想搵個信得過嘅人去當地睇住廠房同工人，實情就係發配邊疆，而小張自殺嘅地點係金邊，從大廈頂樓一躍而下。
我：「封遺書真係咩都冇講，主要係多謝老闆嘅照顧，咁你爸爸有冇向其他老員工打聽下？」
Alice：「有，不過講法唔一致，有人話小張同老婆感情有問題所以自殺，亦有人話係金錢問題，我爸爸當時已經去咗加拿大，身體又差咗好多，雖然覺得婉惜，但就冇乜深究，反而著眼於點樣幫小張嘅屋企人。嗰陣時畀咗6位數出嚟做帛金，畢竟呢個夥計做咗好多年，本以為成件事告一段落，點知又發現呢封email，爸爸覺得個心好唔舒服。」
我：「點解唔直接問阿哥，即係細甄生。」
Alice：「當年問過一次，阿哥話唔知，今次呢封電郵就冇同阿哥講，得我，你，同埋爸爸三個人知。」
我：「不如我講得直白啲，你爸爸係咪懷疑同哥哥有關。」
Alice：「或者係啦，始終佢退休後唔夠一年，哥哥就調到小張冇雷公咁遠，話晒都係開國功臣吖嘛，再加上去咗金邊冇幾耐就自殺，似乎有啲巧合，小張跟咗爸爸40年喇，不嬲冇事冇幹，就算唔適應新環境都未至於要自殺啩！」
的確，大不了咪辭職唔做，有乜嘢緊要過條命仔。
有啲沉重，又覺得複雜同埋有難度，唔好理喇，入去做睇下公司咩情況先。
我唔需要搞啲咩大龍鳳扮見工，退休老闆甄生叫個女Alice用自己名義，介紹我入佢公司做，咁就直接請咗我喇，識人真係好過識字，連interview都唔使，HR甚至冇問我拎CV，學歷證明等等一律冇show，第一日返工影印身份證同埋填下基本資料就搞掂。
不過方便還方便，最初冇乜人知道我係老闆個女介紹入嚟，所以第一日返工完全冇人理我，戇居居喺個位坐咗半日，隔籬左右啲人對我視而不見，臨食lunch之前終於有人發現我存在，有個不知名男人行埋嚟問我係邊個？
我：「我叫阿Tim呀，你好。」
男人：「你邊個department㗎？」
我：「唔知呀。」
男人：「咁你做咩position？」
我：「都唔知呀。」
男人：「你見工見咩position都唔知㗎咩？」
我：「我係Alice介紹入嚟做，佢事前真係冇講。」
男人：「哦，原來係小姐介紹，咁你等等吖，幫你安排下。」
過咗一陣，呢個男人又折返，跟住帶我去一個部門，介紹咗一個叫David叔嘅人畀我識。
男人：「嗱，呢位係David叔，你跟佢吖。」然後個男人手提電話響，似乎有啲緊要事做，所以匆匆轉身離開。
David叔呢個部門得兩個人，另一位冇英文名，叫其哥，佢兩個都係五十幾歲，同其他department有好大年齡差距。
當我介紹完自己個名之後，David叔就叫其哥教我嘢，點知其哥第一句就同我講：「我仲有3個禮拜就走㗎喇，你學得就學啦！」
我：「走？」
David叔：「其哥遞咗信唔做喇，你呢幾個禮拜盡量跟佢學嘢啦！」
David叔冇乜嘢，係cool啲囉，其哥就keep住黑口黑面，唔止對我係咁㗎，佢對住其他同事都一樣，親眼睇住隔籬department有個後生仔走嚟問嘢：「唔好意思，想問下擺份件喺呢個tray度，通常幾時有人收㗎？」
其哥：「唔知唔知，唔好問我。」
個後生仔同事好好禮貌，就算你唔知都唔使咁嘅態度吖，但起碼我感受到其哥冇針對我，佢對個個都係咁。
搭正6點嘅時候，David叔同其哥都準時執嘢走，其哥同我講：「夠鐘就走啦，咁勤力做咩呀？」
我：「諗住執埋少少手尾之嘛，我驚啲單亂呀。」
其哥：「亂咪由得佢囉，間公司你開㗎？唔好做壞規矩添呀，我哋6點即刻打卡走嘅，你新人仲走得夜過我，一陣細甄生見到又唔知點諗喇，OT代表你無能，手腳慢，咪以為留得耐就好叻好有責任感。」
呢個其哥都幾煩，頭先叫佢教我嘢又唔肯，猛咁話廿幾年前自己入職乜都係人手，冇人教一樣無師自通喎，妖！咁你都識講廿幾年前啦，嗰陣都未有而家呢個system ，咁你教下我啲單點入電腦都得啩！
唔教都算，我可以靠自己摸索，不過佢6點鐘又趕人走，出發點仲要唔係為我好，而係驚細甄生見到個新人勤力過佢，咁你三個禮拜後都離職啦，仲洗咩死要面保持形象啫！
如是者，我喺咁樣嘅環境之下過咗幾日，因為David叔一直做自己嘢，同我唔係太多直接交流，其哥就生人勿近，所以咩都查唔到，直至當日分配我嚟呢個部門個男人再次出現，事情終於有曙光。
男人：「阿Tim係咪？有冇記錯你個名？」
我：「冇記錯呀，係喎，我都未知道點稱呼你。」
男人：「我叫Martin呀，做得慣唔慣呀？」
我：「慣呀！」
男人：「係呢，Alice點呀，你同佢好熟㗎？聽講Alice返咗香港㗎喎，但早排甄生上office坐又唔見佢嘅？」
聽到甄生兩個字，我察覺到其哥擰咗過嚟，因為我哋個座位係平排，由於意識到係一個破冰嘅機會，我唯有扮熟啦！
我：「係呀，我同Alice都幾熟㗎！佢要處理好多私人嘢，所以上次咪冇同甄生一齊返office囉！」
男人：「咁點得㗎，你幫我同Alice講，話Martin好掛住佢，叫佢走之前搵我飲茶啦！」
我：「冇問題呀，陣間就代你同Alice講。」
Martin走咗之後，成個氣氛完全唔同晒，其哥條老屎忽竟然主動同我講嘢，仲要係笑容滿面嗰隻：「原來你係太子女個朋友呀？冇聽你提過嘅。」
連cool cool地嘅David叔都撩我傾計：「Alice有冇話同甄生幾時走呀？今次佢哋其實留幾耐？」
我：「佢哋冇咁快走呀。」
其哥：「原來你都識甄老先生㗎，仲以為你係細甄生啲人……」
David叔：「喂，阿其，唔好對住啲後生亂講嘢啦！係呢阿Tim，有冇方法聯絡到甄生呀？上次佢返公司坐一陣就走，都冇機會認真問候佢，我哋想同甄生飲茶敘舊呀！」
我：「你哋都知啦，甄生唔用WhatsApp嗰啲，佢老人家近年身體又唔好，不過唔緊要，我幫你講聲吖，話David叔同其哥想搵佢飲茶。」
David叔：「好呀，唔該晒，講開飲茶，12:30喇喎，我請你飲茶啦，出去慢慢傾。」
其哥：「咁我行去攞位先，晏咗出去冇位㗎喇。」
呢兩條友真係呢，我返工第一日都冇welcome lunch，食晏丟低我一個，而家聽到我識Alice同甄生就即刻變到咁熱情，有冇咁現實呀？換言之佢哋最初咁冷淡，係誤會咗我係細甄生嘅人啦！
飲茶嘅時候我嘗試進取啲：「你哋咁關心甄生，我會同佢講㗎喇。」
其哥：「一定要啦，自從佢退休去咗加拿大之後就冇乜點見，話晒都跟咗佢廿年，David仲耐，有冇30年呀？」
David叔好自滿咁答：「咩30年呀，係35年呀！」
我：「你哋咁掛住佢，其實可以透過細甄生聯絡吖嘛。」
其哥：「細甄生？嘥氣啦！佢最睇唔起我哋班老員工，疑得我哋走呀！而家佢恨到啦！」
David叔：「收下把口啦阿其！」
我：「講起老員工，我上次同Alice仲有甄生食飯嗰陣，傾起一個叫小張嘅人，好似話又係做咗好多年，你哋應該識㗎嘛？」
一提小張，David叔同埋其哥面色一沉，但係佢兩個轉話題又轉得好生硬，明顯不願多談，究竟咩事呢？唔通小張自殺關佢哋事？（未完待續）