《臥底Season 2》Ep7 考驗係透支信任嘅遊戲

老闆嘅外遇唔係36E,唔係Model,唔係Dada,唔係阿Hip,搞咗咁耐原來係嗰位其貌不揚嘅HR,呢啲係咪叫爆冷?蜻蜓小姐2.0同我都查唔到個真相,冇人發現,冇人通風報信,咁Stella點解會知?因為係HR自爆,直接同正印攤牌。

Stella同姐夫講,目的係叫佢唔好再同佢老公間公司做生意,不過姐夫呢個老江湖亦相當圓滑,聽完Stella講狐狸精嘅故事,就不置可否咁表示近年已經少咗同佢老公攞貨,因為有其他supplier嘅價更加平,嚴格嚟講冇say no冇say yes,唔想捲入人哋兩公婆嘅恩怨情仇。

我:「唔好意思,我有個時序問題,當初Stella安排我入去做,係夾埋個HR幫手㗎喎,咁老闆即係一早知我係臥底,點解炒我嗰陣又咁驚訝呢?還是我走咗之後,老闆先至同個HR喺埋一齊?」

姐夫:「聽Stella講,個HR已經同佢老公喺埋一齊3年,你都係今年先去做之嘛,原來一早知你係臥底㗎喇!嗰個女人搵Stella攤牌嘅時候講,而家住緊層樓都係老闆買畀佢,仲叫Stella放手,唔好再精神折磨個老公,又話Stella成日疑神疑鬼搞到個老公好辛苦,所以個老公當初先會搵第二個女人訴苦,仲噏得出佢兩公婆已經超過3年冇做愛,得返個名份同責任喎!」

我:「以Stella嘅性格,我諗佢一定發晒癲,你有冇安慰下佢呀?」

姐夫:「佢應該係冷靜完收埋自己一輪先打畀我㗎喇,因為Stella話係上個月嘅事,打嚟都唔係想訴苦,純粹係想逐個舊客打去爆料,因愛成恨嗰種,不過佢重複講咗幾次3年冇做愛單嘢,話原來個老公呢幾年一直同嗰個女人搞嘢,覺得好嬲同埋好污糟,Stella已經接埋小朋友返娘家喇,應該唔會有咩事嘅。」

我:「仲以為老闆好正直,原來都係做戲。」

姐夫:「雖然Stella冇講得好詳細,不過重組案情都唔係太難啫,HR一早講咗畀老闆知道有臥底,包括你,老闆就刻意搵你飲嘢,借你放風畀Stella知道一切正常,點知班同事就無啦啦發現另一個臥底青蛙小姐嘅report……」

我:「唔係青蛙小姐,係蜻蜓小姐。」

姐夫:「是但啦,你明咪得囉!咁其他同事發現咗青蛙小姐嘅report再講畀老闆聽,佢都唔可以當冇事,又唔想畀其他同事覺得點解咁樣都冇事,咪順勢炒Q埋你囉,你唔使咁驚訝點解個老闆要扮驚訝喎,其實職場裡面太把戲子啦,做得老闆嘅,都有返咁上下道行,而家只不過係HR太想轉正做大婆走去攤牌,咁先爆出嚟啫!」

我:「咁你知唔知個HR仲有冇做呀?其他女同事又知唔知老闆原來同HR有路?」

姐夫:「仲問咁多咩!呢啲嘢聽完就算啦!你冇嗰班女同事contact咩?真係一個都冇再聯絡呀?」

我:「冇啦!」我都想繼續同36E聯絡,不過佢block咗我,期間有send個hi睇下自己解封未,不過都keep住得一個剔,算啦!

家姐聽完我哋嘅對話之後同姐夫講:「有冇覺得你老婆我好好,從來唔check你啲嘢。」

姐夫:「其實考驗係一場以透支信任,同埋以感情為代價嘅遊戲,你以為你考驗緊人哋,調返轉你自己都同樣被考驗緊,你以為個game係自己話事,其實你都只係一隻棋子,就好似阿Tim呢單嘢咁,佢以為自己係臥底,原來office一早有另一個臥底,Stella以為自己掌握一切,點知終極boss係個HR,阿Tim又以為自己監視緊老闆,其實老闆一直監視緊佢點樣監視自己。」

家姐:「咁深嘅,都唔知你講乜,問你係咪覺得我好好之嘛,講成篇道理做咩啫!」

姐夫:「我老婆不嬲都好㗎啦,簡單啲講,如果想試試塊玻璃有幾堅硬,就算終於試到出嚟,但係無論個結果係咪你預期,呢塊玻璃嘅下場都係會碎晒,講到尾,兩個人一齊最緊要信任,唔信任咪唔好一齊囉,要check嚟check去,試嚟試去,最後只會兩敗俱傷。」

如果老闆真係因為Stella一直以嚟疑神疑鬼,3年前先至會搵HR訴苦,最終發生感情喺埋一齊,咁可能Stella都要負責任,再搵兩個臥底入去公司,亦變咗老闆忍無可忍嘅催化劑,但若然老闆一直有玩女人,咁唔check清楚又唔通啞忍一世咩?不過真相係咪咁樣,相信都係得老闆同個HR先至知。

呢件事告一段落,開始要諗諗手頭上兩個新offer接邊單,要幫ex搵另一半嗰個男仔話自己就走,似乎時日無多,所以我優先揀呢單job,點知問清楚先至發現……佢所謂嘅「走」,係指就嚟結婚,以後嘅身份唔方便再搵個ex,妖!仲以為係有絕症嗰種「走」,原來係情聖上身。

咁唔好嘥時間啦,直接take另一個offer,即係老伙記自殺嗰單,委託人係一位女士,自稱爸爸有間公司,而家畀咗佢阿哥接手打理,而爸爸已經喺幾年前退休,本身去咗加拿大㗎喇,最近返香港無聊上公司行下,跟住先發現好多開國功臣舊伙記去蕪存菁。

不過呢樣唔係佢哋想搵臥底嘅重點,而係佢爸爸間房仲保留喺度,返公司嗰陣手多多開電腦,先發現有一封類似遺言嘅email,所以個心好唔安樂。

我:「唔好意思,即係你爸爸唔知個老伙計死咗?」

委託人:「佢知,個老伙計係喺Cambodia間廠度自殺,當時爸爸已經退咗休㗎喇,知道呢件事之後仲畀咗一筆錢呢位老伙計嘅屋企人,不過封寫咗遺言嘅email就係最近先至發現。」

我:「咁公司應該好多人議論紛紛喎,係咩原因自殺?」

委託人:「當年公司啲人話係因為健康問題,又有人話係財政問題,冇人有標準答案,而家諗返都覺得班人講得好避忌,我爸爸想知道個真正原因。」

我:「但你又話其他老伙計走得七七八八,換言之公司裡面好多人都係近年先嚟,如果你爸爸嘅身份都撬唔到人講,我怕……」

委託人:「你盡力啦!我爸爸話個心好唔舒服,本身佢要返加拿大㗎喇,而家一直唔肯走。」

我:「冒昧問一句,我可唔可以睇下封遺書寫乜?」

(未完待續)

error: