老闆態度非常唔友善，由於事出突然，我完全冇心理準備臥底身份會被揭穿，仲要係兜口兜面畀調查對象踢爆，所以一時間都唔知應該點樣反應，當時我講咗一句超級無敵廢中廢嘅老土對白：「件事唔係你想像中咁樣㗎！」
經歷過咁多次放工飲嘢，大家又傾咗咁多心事，加埋老闆喺公司畀咗咁多機會自己，某程度上我對佢嘅感覺已經亦師亦友，炒又好點都好，我只想表達成件事只係職責所在，心底裡都想佢同Stella感情好，無意作出任何對佢不利嘅事。
老闆：「啱呀，件事的確唔係我想像中咁樣，我想像唔到一個普通下屬喺背後做緊咁恐怖嘅事，竟然幫老婆查我。」
講完呢句之後，老闆一手掟咗疊A4紙落枱面，有幾張飛咗落地下，我隨手執起一張拎嚟睇，係excel report，好熟口面，又有啲陌生，熟口面係因為呢個excel format正正係我平時交畀Stella嘅格式，陌生就係因為裡面嘅內容唔係我寫。
老闆：「Laura（即係糖妹）喺Sylvia（即係蜻蜓小姐2.0）部電腦搵到嘅，呢啲咪叫天網恢恢疏而不漏囉，如果唔係Sylvia咁冇交帶又走得咁急，要勞煩其他同事開佢部電腦搵返啲資料，我諗自己呢一世都唔知老婆搵人入嚟公司查我，一個線人都未夠，仲要搵埋你。」
原來成件事係因為咁樣被揭發，呢條蜻蜓小姐2.0真係成事不足，敗事有餘，做嘢可唔可以有啲手尾呀，我知Stella炒佢炒得好急，語氣亦唔慌好，不過都專業啲吖，呢啲調查report點會save喺公司部電腦咁柒蠢㗎？一定係貪方便晚晚OT喺office打埋啦，咁你臨走都唔該del咗佢吖！
蜻蜓小姐2.0係邊一部分透露我係臥底，又或者份report點樣提及我同埋形容我，實在係無從稽考，因為我只執咗其中一張A4紙嚟睇，唔通叫老闆成份畀我過目咩，不過係糖妹搵資料揭發件事，我相信畀老闆之前已經內部幾個同事傳閱咗，咁我明白點解36E突然冷淡喇，難怪叫我唔使上佢屋企食黃金蝦球啦！
我：「既然你已經知道晒，無論作為你嘅員工又好，作為一個幫Stella做嘢嘅人都好，我都有責任交代少少先走，我企喺度講就得㗎喇，阻你兩三分鐘，講完就走。」
老闆擰歪面冇望我，肢體語言上應該係默許我解釋兩句，嬲還嬲，相信佢都想知道發生緊咩事，見佢冇出聲，我繼續講埋落去：「我本身唔識你老婆，純粹係接咗一隻job所以入嚟做，你可以當我係私家偵探或者神秘顧客嗰類工作，所以只係職責所在，希望你諒解。」
老闆選擇繼續沉默。
我：「其實我入嚟做嘅目的同埋動機好簡單，一句講晒，就係睇吓你喺公司有冇外遇，我更加唔知道原來喺公司裏面已經有另一個Stella安排嘅人。」
老闆：「你哋都幾恐怖，咁點呀，有冇查到啲乜嘢向我老婆告狀呀？」
我：「老實講，咩都查唔到，但容許我講下總結，希望你唔好怪Stella，正如之前飲嘢你同我講過，Stella性格不嬲都係多疑，呢樣你喺未結婚之前已經知道，既然你最後選擇咗同佢結婚，應該係覺得Stella其他嘅優點，足以蓋過佢呢個缺點。」
老闆：「等等先，忽然覺得我好似傻仔，上次我同你講Stella未生仔前都喺公司做，你仲要扮唔知，哈，你都幾好戲㗎喎，唔好做私家偵探啦，去考藝員訓練班吖嘛！」
我：「對唔住，都係嗰句啦，職責所在，同埋我的確唔係私家偵探，亦都冇做任何偷拍竊聽呢啲事，只係文字同埋口頭向Stella報告你喺公司同其他女同事嘅相處狀況，冇加鹽加醋，最後我想補充多少少，Stella嘅多疑比起之前升級咗，最大原因係佢對你，同埋佢對自己都冇信心，女人生完小朋友，可能會覺得自己老咗同埋冇後生嗰陣咁有吸引力，持平啲講句，office又咁多靚女，擔心同妒忌好正常，調返轉咁睇，就算一個男人知道另一半嗰間公司多靚仔，都一定會多嘢諗同呷醋，人之常情。」
老闆：「哦，咁我而家炒晒出面啲女同事好唔好呀？」
我：「你唔好講晦氣說話住，我只係正常分析，絕對冇資格教你點樣做，最後由衷講一句，不如多啲返去陪老婆，好過你晚晚OT唔願走，又或者搵同事飲嘢消磨時間，因為你留喺屋企嘅時間太少，Stella嘅疑心就愈嚟愈重，佢冇安全感，佢因為猜疑所以成日嘮叨你，你就因為佢太煩而盡量避開，呢個係惡性循環，問題只會愈嚟愈嚴重，兩公婆係要對一世，我覺得正視好過逃避，因為有冇我呢個角色存在根本唔重要，要消除Stella嘅疑慮，最終係睇你哋日常點樣相處，換個角度睇，你老婆係太愛你，我都想有個人喺屋企等我同煩我，可惜我遇唔到，有一個人成日將你擺喺心裡面，其實係福氣。」
老闆：「嘩，做埋感情顧問，好嘢喎，講完廢話未？走啦！」
我：「講完喇，同你講聲對唔住，你真係一個好好嘅老闆，多謝你一直畀咁多機會我，走先。」
唉，講完都覺得好唏噓，一行出房門成班女同事望過嚟，所有人嘅眼神都係一致，就係鄙視同厭惡，嗰一刻好慶幸自己係男仔，因為我唔使拎手袋，銀包同電話就喺褲袋，加上臥底嘅身份令我冇擺任何私人物品喺枱面，隻杯都係Ikea買返嚟，好平，所以我唔使返埋位收拾已經走得，風頭火勢無謂行過去啦，轉身就走向大門口。
落到樓冷靜咗一陣，我終於儲夠勇氣msg 36E，我同佢講對唔住：「相信你咩都知道晒，冇心呃你，真心當你係朋友，之前相處嘅日子好開心。」
36E個WhatsApp一直顯示「在線上」，但直至一個鐘之後先收到佢reply：「我好憎你，見到Sylvia（蜻蜓小姐2.0）份嘢，佢打住阿Tim認為我好大嫌疑，因為上圍豐滿，仲話你見到老細偷睇我個胸，你咁樣講嘢同我喺交友App識嗰啲男仔有咩分別，你哋都係一樣咁變態，唔好再搵我。」
我：「對唔住。」呢句已經變咗一個剔，換言之，36E講完就block咗我。
我唔清楚蜻蜓小姐2.0嘅report仲打咗啲乜嘢資料，但係未認識36E之前，我的確係咁樣形容佢，百辭莫辯。
同一晚我致電Stella，想交代返件事，不過佢冇聽電話，冇理由嬲我吖，穿煲純粹係蜻蜓小姐2.0「冇手尾」累事，我其實好被動，大約夜晚9點幾，Stella就msg我講咗句：「最後呢5萬蚊出埋畀你喇，得閒check下。」冇頭冇尾加上WhatsApp冇語氣，我猜唔透Stella目前嘅心情同狀況，係咪老闆返到屋企大吵大鬧呢？
當晚我冇晒心機，又唔想返屋企，突然收到老死Johnny嘅電話：「喂，今日太忙唔記得同你講，我哋間維吾爾族的秘密嘅銀行戶口開到喇，終於有銀行肯開畀我哋，下星期有冇時間落分行搞啲手續？」
我：「而家我大把時間啦，同埋我哋公司唔係叫維吾爾族的秘密呀！」
Johnny：「都係一句啫，呢個名響啲勁啲吖嘛，第日成功咗，我哋先話畀人聽公司原名係叫維吾爾族的秘密，只係想方便拎BR同埋開戶口先夾硬改啲大路嘅名。」
由於心情太差，我並冇同Johnny討論呢個問題，反而想返屋企同姐夫傾計。
姐夫以「非戰之罪」去形容今次嘅失敗行動，佢話會代我套Stella口風，了解件事最後係點樣發展，其次就叮囑我正正經經搵份全職：「其實我係咪間接害咗你呢？邊有人開間公司做臥底㗎？有幾多公司同埋幾多人會需要呢個服務啫，當你每次有job都5萬一個月，但係一年都唔發一次市，咁你出去打份萬幾兩萬蚊嘅工咪仲穩陣同埋搵得多，起碼個個月有工開，又唔使提心吊膽。」
我明白，但仲係好想試一試，有BR同埋有正式公司戶口之後，曾經喺Carousell同Facebook賣過廣告，有feedback㗎，不過全部都係無米粥，又或者mission impossible……
客人A：「我想你幫我去呢間公司攞啲資料。」
我：「咩資料？」
客人A：「我要知道佢哋啲面膜係搵邊間廠做，成本價係幾多，同埋喺萬寧上架嘅條款有咩細節，抽幾多佣，賣唔晒係收返定係點，幾耐結一次數，我問唔到，因為我哋打算生產，但未開始，萬寧嗰邊唔覆我，不過最緊要係拎到面膜生產商嘅contact，最好有埋合約。」
我：「唔好意思，呢類商業間諜係犯法，我唔可以偷人哋公司內部資料同合約再披露畀你。」
客人B：「我想溝一條女，你幫我入去間公司做，起佢底，我要知佢有冇仔，平時有咩嗜好。」
我：「咁佢同你本身係咩關係？你係咪會安排好我入去做？」
客人B：「我安排？我安排到就唔使搵你啦！條女係我隔籬公司做，我唔識佢㗎，點入去做唔係你諗埋㗎咩？」
我：「咁如果你係色狼，個女仔有咩事我咪變埋幫兇？唔做！」
客人C：「你幫我入去呢間公司做，然後搵機會踢我個家姐出公司，我家姐40歲人都冇拍過拖，有仔埋身一定濕晒，你溝埋佢吖，最緊要爸爸覺得佢做唔到嘢，令佢犯錯又好，令佢發姣掛住拍拖唔做嘢都好，總之我要拉佢出公司。」
我：「雖然我唔知你同自己家人有咩問題，亦唔知邊個忠邊個奸，但係害人嘅嘢我唔會做。」
客人C：「咁巴閉呀？好清高喎！咁你公司做咩呀？淨係查嘢呀？查嘢我不如出去搵私家偵探，專業過你啦，扮L晒嘢！」
雖然呢位客人發晒爛渣，但係佢講嘅嘢的確有道理，我呢間臥底公司嘅界線好模糊，大project唔輪到我做，例如之前家姐個朋友想搵神秘顧客，但由於未聽過我公司個名，結果完全唔考慮，咁細project呢？好似上面幾單查詢咁樣，偷商業資料、溝女起底、害人，我又全部唔接，咁其實臥底嘅業務仲有乜嘢生存空間呢？
家姐同姐夫以前成日講笑咁話我係廢青，我一直都唔覺得係㗎，因為人廢心不廢，我有好多諗法同大計，不過Stella嗰次任務失敗之後，我已經7個月冇生意，長期賦閒在家，意志都磨滅殆盡，連個心都廢埋，想唔認做廢青都唔得喇。
正當我疊埋心水想搵工之際，個天唔知係畀機會我定係想玩我，忽然有兩個極具potential嘅查詢，其中一個係：「我爸爸間公司有個老伙計自殺，佢想知道真正原因，因為個老伙計用email打咗封遺書，內容係多謝咁耐以嚟嘅照顧，但係最重要嘅事偏偏隻字不提。」
另一個enquiry就係：「我想幫個ex搵男朋友，我已經冇辦法再照顧佢，但佢份人好單純，求求你幫下我，最近知道我個ex有男仔追，據了解係嗰啲傳銷定唔知基金佬，怕佢畀人呃錢，我唔係白撞㗎，可以畀我個ex嘅資料你，仲有我哋以前嘅合照，我唔係要破壞，亦唔係要再喺個ex身上拎任何嘢，我淨係想佢搵個好男仔，咁我先會放心走。」
兩隻job我都好想接，一為錢，二為對個內容有興趣，可惜時間上撞晒期，我只可以揀其中一個任務，Johnny本身都話想幫手，不過佢咁樣講完之後，我就打消咗呢個念頭……
Johnny：「嗰個男仔嘅ex正唔正㗎？係咪有圖呀？如果係掂嘅，我抵諗啲做佢個ex嘅新男友囉！」
得喇，我決定唔使Johnny幫手。
一係唔發市，一係就同時有兩個offer，夏天都等到冬天喇，我唯有安慰自己係幸福的煩惱，因為起碼可以揀job，開開心心咁樣同家姐姐夫報喜，點知突然間收到一個消息。
姐夫：「Stella離咗婚，原來佢老公真係收埋咗個女人。」
我：「下……有冇講係咪公司嘅人？」
姐夫：「係。」（未完待續）