其哥飲大咗，講嘢愈嚟愈放膽，我見機不可失，所以就叫多支靚酒，反正有得claim，無所謂啦，溝酒又容易啲醉，最緊要唔好咁快清醒，不過又要就住，免得灌酒過量會搞到其哥不醒人事，到時就功虧一簣咩都問唔到。
我：「有咩唔開心即管講出嚟，今晚張單我埋，飲幾多都得，以前有小張請你，而家有我請你。」故意再講起小張個名，勾起其哥嘅傷心事，我明白係有少少殘忍，但為咗完成任務，係要狠啲㗎喇，我自己呢段時間都飲多咗酒，長遠落去都唔係辦法，係時候嚟個了結。
其哥：「老甄生呀…當年…第一間公司…大連排道…大連排道你知唔知邊度呀？」醉到開始講嘢冇連接詞。
我：「我知我知，荃灣吖嘛！」
其哥：「荃灣？葵涌呀！知知知，你啲後生咩都唔知，又唔聽人講，老甄生個仔又係咁。」
我：「你講埋大連排道先啦！」
其哥：「大連排道嗰陣…公司得7個人…7個人呀！小張嗰陣已經做緊，打江山…」
我：「然後呢？」
其哥：「然後公司咪愈做愈大…搬去爵祿街…我嗰陣時入嚟做囉…仲有David、阿昌、阿明、阿聲、威利…後來開到去九龍灣，嘩！個寫字樓幾大呀！幾靚呀！」
我：「唔係呀，咁小張做咩要自殺先得㗎？」
其哥：「話撚咗你啲後生個個一樣，唔撚聽人講嘢，我哋食鹽多過你食米啦！」
我：「係我唔啱，其哥唔好嬲，慢慢講，嚟！敬你一杯先！」
其哥：「佢話小張收回佣唔啱，黐撚線！」
我：「邊個佢？」
其哥：「仲有邊個？老甄生個仔囉！老豆一退休就揸住雞毛當令箭！」
我：「點解你覺得小張收回佣冇問題？」
其哥：「有咩問題？你話畀我聽有咩問題？做咗十幾廿年都係咁㗎啦，呢一行邊個唔係咁呀？佢話要報廉署喎！本身我朋友個仔都可以入嚟做，佢就話小張收茶錢，係咁針對小張，而家開心啦，迫死人喇！」
我：「咪住先咪住先，茶錢又係咩嚟？」
其哥：「我哋呢行，你想見工，就要畀茶錢，我當年入嚟做都有畀茶錢小張，都係靠佢先入到嚟，有咩問題呀？畀少少錢換份工，我心甘情願呀！」
講到一嚿嚿……
我：「即係你當年都有畀茶錢小張，咁先入到呢間公司做，又關你朋友個仔咩事呢？」
其哥：「阿Tim你都幾撚蠢㗎喎，公司啲嘢教極又唔識，講嘢又冇一句明，總之收茶錢介紹工啦，以前不嬲都係咁，跟住老甄生接手之後話唔得喎，我應承咗朋友個仔㗎，你知唔知搞到我幾無面呀！你咪又係甄小姐介紹嚟做。」
我：「點同呀其哥，我冇畀茶錢喎！」仲有錢收添……
全部都係歪理嚟喎，上一代咁迂腐，下一代就要繼承呢啲荒謬嘅傳統？做生意要收回佣，入嚟做又要畀茶錢，直接間接令好多公司同埋好多人受到不公平對待，你哋根本就係私相授受。
其哥：「呢個陀衰家唔識做生意㗎，以前小張會安排上面啲有錢佬同高官嘅仔女落嚟做，畀萬零蚊人工之嘛，佢哋都唔志在份人工，仲畀返錢我哋貼錢打工，求咩呀？咪求住滿唔知幾多年可以攞香港身份證囉！仲可以同上面啲有錢佬打好關係，屌！佢又話以後唔得，要炒晒呢班大陸高官啲仔女，三句唔埋兩句就報廉署，報啦報啦，小張跳樓死埋喇，做鬼都唔放過佢呀！」
如果其哥唔係亂作一通，我覺得老甄生個仔絕對冇做錯，唔知大家有冇見過一啲公司365日都出招聘廣告，send CV去又永世冇回音，可能背後就係有其他操作，表面上請人，實際上已經由個別高層內定晒，咁樣對一般求職者來講真係好唔公平。
我仲想問得清楚啲，不過其哥開始語無倫次發酒瘟，喂，你住邊呀？講清楚先啦，唔係想我托住條麻甩佬去酒店開間房瞓覺啩！我又冇辦法解鎖其哥部電話，想打畀佢屋企人又唔得，真係企咗喺度。
好在等咗一陣就有救星到，其哥電話響，我見到個caller display係「老婆」，梗係嗱嗱臨聽啦，交代咗其哥飲醉，拎埋地址就搭的士送佢返屋企，呢晚總算有著落，上單job一敗塗地，我終於都攞返少少信心。
唔知係咪飲得太醉，其哥第二日請假冇返工，David叔問我哋前一晚搞乜，我嘗試盡最後努力索多少少料，有就有，冇就冇，點知又有意外驚喜。
David叔：「你下次唔好同佢飲咁多啦，阿其份人唔飲得又怕蝕底。」
我：「係啦，嚇親我，可能講起小張，佢太感觸。」我係特登咁講。
David叔：「講起小張？佢冇亂講嘢吖嘛？」聽得出David叔有啲慌。
我：「咪講之前回佣呀，請大陸高官同有錢佬啲仔入嚟做再收著數呀，都係嗰啲啦，講咗好多。」
David叔：「有冇搞錯呀佢！阿Tim你有冇同Alice講。」
我：「未見到Alice，下次見到先講。」
David叔：「唔好呀，你千祈唔好講。」
我：「點解呀？其實嗰啲都係行規，老甄生照道理都知啦！」
David叔：「老甄生唔知㗎！你跟我入一入會議室，呢度講嘢唔方便。」
喺會議室嘅對談其實冇乜意義，我聽得David叔講最多嘅一句就係：「唔好同Alice仲有老甄生講。」
為咗想我保密，David叔不斷強調呢件事嘅嚴重性，結果將不為人知嘅部分都講埋出嚟，原來甄生個仔接手公司之後樣樣都揸正嚟做，首先有個別客人舉報回佣問題，當時已經想報ICAC，但係小張求甄生個仔唔好咁做，自己推薦自己去柬埔寨金邊睇住間廠，發誓再唔會掂回佣呢啲嘢。
甄生個仔畀面小張係開國功臣，加上爸爸正正係因為身體差咗先至退休去加拿大，唔想老父擔心，心軟之下畀多個機會小張。
小張的確係停咗手，不過由於衰嘢愈爆愈多，果然係凡事皆有痕跡，當甄生個仔知道公司有幾個「國內子女」原來唔係循正途請返嚟，而係當中收咗介紹費內定入嚟做，目的係住滿一定年期後可以拎香港身份證，甄生個仔本來熄咗嘅怒火又再燃燒，先炒晒嗰啲阿昌、阿明、阿聲、威利等等嘅舊員工，因為佢哋都有喺回佣同介紹費當中獲得利益，再召小張返香港，柬埔寨間廠唔需要佢再睇，更決心要公事公辦報廉署。
同日，小張喺柬埔寨住宅公寓嘅天台跳樓自殺。
甄生個仔係咪見到人都死咗，爸爸身體又咁差，所以決定唔將個事實講出嚟呢？小張因為呢件事輕生，甄生個仔會唔會覺得自己太鐵石心腸呢？
仲有，小張嘅遺書又應該點樣解讀呢？係內疚？係自首？以上嘅問題都冇答案，但我起碼知道事情嘅前因後果。
David叔強調自己冇參與，因為佢同其哥都係跟單呢邊，唔需要接觸客所以冇資格收回佣，公司請啲咩人亦冇得話事，不過又唔好以為David叔企喺甄生個仔呢邊，因為佢講咗句：「唉，甄生太無人情味，又樣樣嘢都要管，以前老甄生唔理我哋咁多㗎，下面搞得掂咪得囉，總之就煩啦，我過多兩年都退休，無謂搞咁多嘢，其實小張又唔係偷又唔係搶，呢啲嘢家家有求之嘛，你話係咪？記得唔好同Alice仲有老甄生講喎！」
對唔住，我係臥底……（呢句係心裡面嘅對白，我當然冇講出口啦！）
口頭上答應David叔唔講，第二日我辭職，David叔同其哥好驚訝，我求其作個藉口話自己要幫屋企人打理生意，亦都將成件事同Alice講得清清楚楚，職責所在，sorry！
任務到此，Alice好滿意，據我理解佢都冇同老甄生道出真相，一來唔想爸爸受刺激，二來小張喺老甄生心目中永遠係開國功臣，既然人都死咗，唔想再生枝節，三來係佢認為小張喺遺書裏面都冇講，可能想保留最後嘅尊嚴，所以Alice同爸爸交代一聲小張嘅死係個人原因叮囑唔需要再多疑就算，佢哋過咗冇幾耐亦都返去加拿大喇，事件劃上句號。
人真係有順境逆境，之前嗰單查狐狸精嘅job失手，我一度意志消沉，想執咗間臥底公司正正經經打份工算數，今次遺書事件我視之為成功個案，信心大增之餘，好事仲接踵而來。
WhatsApp嘅提示聲響起，竟然係36E……佢unblock咗我！
「你最近點呀？」
我秒回：「你唔嬲我嗱？」
故事未完待續，我同36E都未完待續。（此系列暫時劃上句號，但係仲有延續，敬請密切留意）