有個同事走咗3個月，最近無啦啦打畀我求救，佢話自己啱啱見成咗一份工，offer都出埋，不過臨門一腳有啲阻滯，因為對方需要佢提供薪金證明，即係糧單，咁我當時就以為佢唔見咗，想我幫手諗辦法再print過出嚟，點知講多兩句發現唔係呢回事。
呢位已離職同事解釋，佢去interview填form嘅時候刻意報大數，即係寫上一份工嘅salary高啲，希望藉此去爭取到新工有大增長升幅，但勢估唔到人哋竟然喺出咗offer之後先至要佢補返薪金證明文件，所以而家企咗喺度。
我：「你去見工冇帶齊資料就已經出offer畀你？」
「其實見工嗰陣個HR問過我拎糧單㗎喇，咁我咪話冇帶喺身囉，見完HR再見個manager，一take pass，第二日就收到佢哋電話，出晒offer決定請我，仲話後日可以返工，但就叫我記得返工當日拎返糧單畀佢影印。」
我：「冇得唔畀？」
「如果佢唔係出晒offer，我一定唔會畀，但而家又有offer又有返工日期，唔畀咪即係放棄份工。」
其實點解佢要搵我呢，係因為糧單需要簽名同蓋印，office裡面得幾個人有公司印，一個老細，一個係HR，一個係會計個阿頭，另一個就係我呢個Admin，舊同事話唔敢勞煩前面三位仁兄，因為張糧單要配合做假，特別mark高人工。
我：「咁唔得喎，你都係搵返HR或者會計啦，我冇資格吸印落糧單度㗎！」
「HR同會計阿頭以前一年都唔會講十句嘢，你叫我點搵佢哋呀？幫幫手啦！我都係諗到冇晒辦法先搵你啫，又唔係借錢，幫我吸一吸個公司印咋喎！」
我：「唔係吸一吸個公司印咁簡單呀！我要做手腳改埋你份糧，講緊偽造文書呀！有咩事我要坐監㗎！不如咁啦，你自己去嗰啲卡片皇又好乜都好，可以print到公司信紙同整公司印㗎，總之我唔想參與。」
「你估我冇諗過咩，趕唔切吖嘛！佢哋叫我後日返工，我而家去整信紙整印仔真係趕唔切㗎！」
我：「唔好意思，我真係唔想無啦啦做埋啲犯法嘢，如果你係唔見咗糧單，我可以幫你吸公司印，如果要改埋人工填假資料就幫唔到喇，幾熟都係咁話。」
已經講到咁，但係呢位舊同事仲未罷休，最後提出一個咁嘅要求。
「得啦，你咁正直，唔使你做假，淨係借個公司印畀我得喇啩，我自己print自己親手吸印，咁咪唔關你事囉！印仔冇記認，就算出事都冇人知係你借畀我啦！」
我：「你冇嘢呀？將心比心，如果你有間公司，會唔會容許員工借個公司印出去畀人亂咁吸？我借個印畀你直頭可以出埋contract㗎！如果有啲咩損失，我點孭得起呀？」
仲未完……
「Ok，咁我退一步，你拎埋個印出嚟吸落張白紙度，我自己就返位print份糧單。」
我：「咪就係唔可以亂吸囉，同頭先個point同一道理之嘛！」
結果我哋之間嘅對話不歡而散，咁都好吖，我冇所謂呀！點估到佢隔5分鐘又再打嚟，今次打慘情牌。
「你幫我整過張糧單啦，吸個印，改個人工啫，我真係趕住要㗎，好想返呢份工呀，而且我都係作大咗$5,000啫，同原本份糧唔係差太遠，我搞唔切吖嘛，一場舊同事，我冇工返你過唔過意得去呀？大家都係打工仔，梗係想份糧叫高啲，後日冇糧單我就冇工返，係咪想睇住我失業吖？你係咪幫我找卡數先？我都話啦，唔係問你借錢，吸個印啫，對你係零成本㗎喎，舉手之勞都唔得？咁絕情？」
我：「你搵到工我好開心，你用你嘅方法爭取到好人工，我都會替你高興，但你唔可以拉埋我落水去做假嘅證明文件，無論件事會唔會揭發，我都唔可能因為要幫你修補個大話而犯法，偽造文書我要上身，你今日過到骨，幾年後唔知因為咩事被發現，我都仲要孭㗎！你識得為自己嘅前途事業打算，唔通我就唔可以諗自己嘅前途？」
「點會無啦啦有人發現呀？」
我：「無啦啦又好，有啦啦又好，我唔想擔驚受怕，總之合理嘅幫忙我會配合，要做虛假文件就點都唔得，你唔好講到係我斷你衣食，唔好情緒勒索我。」
我有將呢件事同個別同事講過，反應兩極，有人話我做得啱，但竟然有人話我衰，話我企喺啲僱主嗰邊，唔諒解一個打工仔想爭取多啲人工嘅心情……
首先，人工點先為之多係好睇個人，冇一個打工仔會嫌自己人工太多，亦都冇一個僱主會覺得自己出手太低，所以每個人都有唔同嘅角度，但無論人工呢個數點樣衡量都好，我都冇義務為咗個舊同事做犯法嘢，因為有咩事最終都會由我自己承擔，再講，你可以搵老細、HR、會計，不過唔夠膽，結果喺我身上打主意，咁即係恰我啫！