究竟而家搵工有幾難？2021年3月quit咗上一份工，hea下hea下咁就一個月，5月開始瘋狂send CV，但係feedback用10隻手指數得晒，因為疫情關係，當中超過60%係phone interview，而結果都係100%冇下文，轉眼失業半年喇。
屋企人畀我嘅壓力愈嚟愈大，特別係我老豆，日日話我不務正業，所以有時迫不得已都會出街行下避一避，再咁落去真係唔知點算，好在11月底終於有曙光，係interview呀！仲要係香港上市嘅國企，唔理咁多啦，搵到份工先再講。
嗰日我著晒西裝去interview，老豆朝早明明仲有返笑容，係咁叫我畀心機，點知in完返嚟佢再仔細問我，成個面口即刻唔同晒，仲黑過之前量地冇嘢撈嗰陣，事關老豆聽到係國企之後極度反感，猛咁話唔好諗，更加唔好去做，積極啲再搵其他工作仲實際。
我：「你講嘢唔好成日咁火爆得唔得呀？心平氣和講唔得咩？」
老豆：「心平氣和你聽得入耳咩？我叫你唔好去做呀！」
我：「有咩問題呢？失業喺屋企又畀你鬧，而家有得見工又畀你鬧，想點呀你？」
老豆：「我而家唔畀你見工咩？我叫你唔好做啲大陸公司呀！」
我：「咩大陸公司呀？國企嚟㗎！人哋又冇話請我，起碼要面試兩次，十劃都未有一撇，你勞嘈啲咩呢？」
老豆：「仲要去第二次？警告你唔好再去呀，我寧願你喺屋企做量地官，香港啲公司執晒呀？再搵過！」
都唔明佢躁乜嘢？其實有冇得second in都成問題，更何況我自己都有少少受唔住呢間國企嘅文化，真係有得見第二輪，甚至最後有offer出到嚟先算啦！受唔住嘅原因，係當日interview嘅時候搞咗好多無謂嘢，對方HR竟然叫我開個facebook嚟睇，佢一路睇一路講：「同事嘅政治立場，公司都好重視。」
咁其實我就有另一個Facebook account嘅，主要用嚟睇咸嘢啦，所以即場開畀個HR睇都冇問題，呢個account基本上冇私人post，但係過咗呢關，佢又問我有冇打針，打科興定係復必泰，個人認為有啲問題太私人，呢個只係第一次interview咋喎，會唔會太over呀？我實在接受唔到，不過剔除以上因素，自己見工嘅表現亦唔突出，甚至係水準以下，再進一步嘅機會本身就唔大。
冇同老豆講到咁細緻，但佢成晚都keep住好好火，連阿媽都忍唔住叫佢唔使咁勞嘈，好心咪成個潮州怒漢咁啦！話時話，自從細細個未懂事見到老豆同佢細佬（亦即係我個阿叔）起爭執之後，已經好少見到佢老人家嬲到咁，同埋今次又唔係發生咩事，講到底都係去見工啫！
我：「嗱！唔係想激你，不過老豆你都係70年代先嚟香港，因咩事咁反感國企呢？仲激動過呢代啲後生仔。」
老豆：「唔係淨係憎國企，總之所有同共產黨有關嘅嘢都憎！」
我：「而家咪就係問你點解咁憎囉！」
阿媽忍唔住搭嘴：「你阿叔囉……」
老豆：「仲提嚟做咩呀？」
我：「你唔好鬧阿媽先，每次講起阿叔就係咁，細個我唔敢問，而家大個啦，當年發生咩事啫？」
老豆當年落嚟香港，而阿叔同嫲嫲就留喺鄉下，小學時跟老豆返過去探親，印象中阿叔好有錢，著得又光鮮，仲揸車去接我哋，記得當年餐餐大魚大肉，我喺香港都冇食得咁好，講行頭風光過老豆好多，最頂癮係阿叔住嗰條村個個都好有米咁，成班村民住緊啲爛鬼屋，睇上去根本係窮鄉僻壤，偏偏一個二個有車有金撈，係條村風水好吖，定係聚集隱型富豪呢？
相反地，細個我哋一家喺香港嘅生活都幾清貧，老豆同阿媽分別返兩份工，我成日自己喺屋企，呢種日子維持到讀中學先至有改善，總之同阿叔相比就係天與地啦！
阿媽：「你阿叔以前好巴閉㗎，一夜暴富。」
老豆：「佢根本係一件垃圾！」
我：「點解一夜暴富嘅？阿叔好似喺鄉下開啲類似士多嘅物體，咁發㗎咩？」
阿媽：「政府話要收鄉下嗰度啲地起車站吖嘛，住喺度嘅人全部有賠償，好似話每個人分到百幾萬人民幣，當時一九八幾年之嘛，百幾萬人民幣喺鄉下好好用㗎喇，阿叔話喺舖頭做緊嘢嘅時候，收到消息會畀人買起成條村同附近啲地，傻下傻下就變咗百萬富翁。」
唔怪得啦！印象中阿叔有落過嚟香港一次，嗰次直頭想買晒成個世界返去咁，佢咪就係香港人最憎嗰種踎喺路邊食煙嘅大陸佬look囉！所以點解有時啲自由行財大氣粗，而行徑就咁冇文化，正正係因為部分人賺嘅錢唔係通過學識或工作得嚟，而係唔知點解忽然天降橫財，荷包漲咗，自身品格並冇相應地提升，同埋八、九十年代嘅時候，中國政府的確擴展好多車站同埋鐵路，強制收地就會賠償畀原本住喺嗰啲地方嘅人。
老豆：「你阿媽講啲唔講啲！」
我：「即係老豆你唔抵得阿叔呀？如果當年你冇嚟香港，係咪都可以袋到百幾萬人民幣呀？唔係喎，記得你好似將鄉下間屋過戶埋畀阿叔定唔知嫲嫲，咁阿叔咪收double？」
阿媽：「你唔覺得你阿叔之後人間蒸發咩？」
我：「係呀，好耐冇見過，細細個知道老豆同阿叔嘈，唔敢問啦！」
老豆：「知唔知你阿叔害到我哋幾慘？雞毛鴨血呀！」
（未完待續）
《辦公室日報》IG出咗新Filter「一日食到黑」，有時間影低你食咗咩好西或者頹飯啦，我會每日upload上IG Story㗎！
https://www.instagram.com/officedailyhk/