認識Patricia應該有8年，當時我同佢差唔多同期入公司，呢個女仔好樸素好低調，真係默默耕耘嗰種人，而且好抵得諗，有時啲嘢搞唔掂搵佢幫忙永遠唔會say no，所以好多同事都鍾意Patricia，而且評價極高。
Office相安無事咗兩年左右，公司嚟咗個疑似皇親國戚嘅女仔Renee，話「疑似」因為一直都冇證實，亦冇人敢問，只可以肯定Renee係冇經過interview直接就入嚟做，HR都話冇佢份CV，突然有朝收到老細通知，總之人事部要請呢個女仔，Junior position但出Senior嘅人工，簡單填出糧戶口同影張相做staff card就話入職。
鑑於老細係女人，如果唔係有不尋常關係，照計都係皇親國戚無誤，不過點都好啦，Renee的確唔多做嘢，就算畀嘢佢做都只會一鑊粥，更諷刺嘅係遲來先上岸，竟然升佢都未升我同Patricia，是但啦，我呢種女人仔其實冇乜鬥心，有份工穩穩定定就ok㗎喇，而Patricia亦冇乜大反應，繼續自己做自己嘢，keep住獨家村我行我素。
後來開始發覺Renee好唔妥Patricia，仲留意到每次有同事讚Patricia嘅時候，Renee就會特別嬲，係要喺側邊潑冷水講埋啲小學雞嘢，例如：「車！好易之嘛，我都做到啦！」Patricia次次都一笑置之，反而係其他同事睇唔過眼，私底下會話Renee好小器，好似一定要讚佢咁。
有次仲離譜，公司一位女同事讚Patricia件衫好靚，咁你知女人㗎啦，咪圍埋傾兩句囉，點知Renee忽然行埋嚟，伸手就掀一掀Patricia個衣領：「咩牌子呀？完全唔識㗎喎！使唔使$500？」
Patricia嘅EQ高到呢：「唔使，普通商場買之嘛，唔係名牌。」
Renee：「呢啲一睇就知洗幾次玩完啦！」
唔係啩，咁大個人仲咁幼稚，連讚下人哋件衫靚都唔抵得？
其實嗰陣時Patricia已經準備辭職㗎喇，因為有headhunt撬佢轉工，以Patricia嘅性格再加埋轉工在即，對於Renee呢啲小家種行為更加不痛不癢。
後來Patricia真係走咗，出嚟食飯聚舊佢先話畀我哋知發生過一件事，原來某次得佢兩個人喺位嘅時候，Renee曾經好挑釁咁同Patricia講：「好心你唔好買埋啲cheap衫啦，啲袋又係，唔知乜嘢雜嘜牌，來來去去著嗰幾件衫。」
我問Patricia點解唔鬧爆Renee，佢話冇需要喎，仲話唔明點解Renee咁大怨氣，不過一切都唔重要，反而覺得Renee乜都睇唔順眼嘅性格會累死自己，因為咁樣做人先至最辛苦。呢樣又真喎，Renne嘅情況一直都冇改善，每次有人提起Patricia好好，好唔捨得個好同事走，Renee就會一秒黑面，直至後來公司請咗個人人都讚靚嘅女仔，Renee就轉移咗目標喇，又好似以前咁講埋啲小學雞嘢：「車，你哋未見過靚女啫，咁都叫靚？好普通咋喎！」
係喇，我哋見識少，邊個靚都好啦，總之就冇你份啦Renee……
相處愈耐，愈了解Renee係一個妒忌心極重嘅人，唔知點解對男同事好寬容，但係對女同事就好苛刻，喺佢面前讚其他女仔就會好唔抵得好唔順氣，究竟呢種係咩心態呢？邊個「有幸」做佢男朋友或者老公，應該係上一世積落好多孽要還。
最近Patricia喺新公司又升職，title同人工已經士別三日刮目相看，仲搵我過檔幫佢手，所以有料嘅人去到邊都一樣搵到食，相反Renee幾巴閉都好，咪又係靠人事關係留喺公司，如果離開咗呢度，其實Renee甚麼都不是，終於明白Patricia當年點諗，根本唔使為呢啲人勞氣，因為妒忌心咁重嘅人，最辛苦係佢自己。