「嗱，你個fb page最少要買20至30萬fans啦，咁先畀到人信心，ig就可以10幾萬起步，有晒價錢㗎喇呢度，你決定咗覆我吖！」阿Sam呢個所謂「朋友」講到頭頭是道，成個專家咁。
之後阿Sam搵我哋3個員工討論，估唔到除咗老細自己之外，同事一致表示反對。
Anne：「咁肉酸，畀人見到係啲巴基斯坦人like個page，好假囉！」
Sam：「我朋友話唔係南亞account，會係台灣同香港人account。」
Brian：「好似話會退like㗎喎！」
Sam：「佢保證唔會，退咗都可以補返。」
我：「唔好啦老細，其實出面好多page都係咁樣買fans，有啲幾廿萬followers，但每次出post都係得個位數嘅like，叻極都係雙位數，你唔覺得好怪咩，幾廿萬但啲post咁少like，傻嘅都知道啲fans係假啦！」
可幸阿Sam聽完終於軟化，佢都係想多fans可以威威啫，如果唔威之餘仲好樣衰，咁做嚟都無謂啦！
阿Sam雖然係一個冇經驗，而且毫無計劃嘅老細，不過佢對員工真係好好，主要原因當然係錢多，多到唔需要計較，其次係佢完全冇老細架子，永遠同大家打成一片，一齊玩、一齊傾計、一齊食飯。講起食飯，阿Sam幾乎日日請我哋出去食lunch，放工happy hour都好多次，有時仲會食得好貴，印象中有餐omakase使成過萬蚊落樓，因為每個人嘅set都係二千幾，另外有次食西餐都要8千幾，主要係開晒酒叫晒蠔。
有時我覺得阿Sam純粹想有人陪，某程度上佢都幾寂寞。
有一晚我哋又係食飯飲嘢直落，阿Sam飲大兩杯酒後吐真言。
Sam：「祝公司業務蒸蒸日上，最開心係請到你哋幾個。」
Brian：「有冇咁誇呀？」
Sam：「知唔知好多人當我水魚㗎，身邊有啲朋友成日搵我著數，所以上次你哋喝住我唔好買fans，真係有少少感動，所有人只會慫恿我畀錢，從來冇人叫我慳錢，呀！除咗之前一個女朋友，佢係真心對我好，次次想使錢都畀佢勒住。」
我諗阿Sam有啲誤會，我哋3個同事都好狼㗎！份糧嗌高幾千至一萬，Brian係唔係都要買張幾千蚊嘅電競椅喺公司用，Anne明明唔識用Mac機都唔肯執輸，大家只係唔想老細啲錢畀其他人呃，最好將所有資源擺喺公司。
Anne：「你講到個女朋友咁好，做咩會分手？」
Sam：「佢話我離地，以為有錢大晒，話我做人冇plan，plan咩啫？靜靜雞同你哋講，我屋企啲生意大到癲，全部係政府項目，我daddy喺九龍灣有幾層工廈單位一早買落，嗰度都值過億，其實佢而家退休唔做，啲錢已經夠我下半世慢慢搣，你仲想我plan咩？有咩好plan？」
我：「女仔有好多種，有啲只要你疊水就腿張開，有啲會覺得夠用就得，寧願你有目標有計劃，唔使下下問屋企攞錢，可以自己想做乜就做乜。」
Sam：「咁我daddy有錢，屋企有幾層樓又有舖，我做仔唔通唔要呀？」
又啱，駁唔到。
當我哋幾個做滿三個月之後，阿Sam唔單止兌現承諾加人工，仲一人送咗一部最新iPhone做禮物，我人生第一次收到咁貴重嘅禮物，另外兩個同事都係。
Run下Run下，喺呢間公司已經度過第五個月，其實online store生意根本就唔好，淨係計人工、入貨、燈油火蠟，仲有其他雜費，我當阿Sam自己唔出糧，每月支出都超過6位數，作為員工都有不安感，但係Brian同Anne話：「我哋覺得十幾萬好多啫，對阿Sam嚟講其實好少，就好似我哋使十幾蚊一樣。」
本身的確係咁，不過某一個朝頭早，阿Sam突然講咗句：「聶仔呀，原來今個月條數……連你哋其中一個人份糧都唔夠畀。」
其實我想講～～～老細，唔係今個月，係個個月……但我唔敢，亦唔識畀反應。
Sam：「唔……」
嗱，你冷靜啲，諗清楚先好講呀！
－－－－－
《我老細係二世祖》1
觀塘Office乜都冇，得張波枱離晒譜
https://hkofficedaily.com/?p=16500
《我老細係二世祖》2
錢多事少冇嘢跟，返工玩樂過日辰
https://hkofficedaily.com/?p=16510