第二日我喺APM等咗老細20分鐘，初頭以為畀人老點，好在佢最後都有出現，先去買電腦，阿Sam係咁要我買部Mac機。
我：「用唔慣Mac機呀老細。」
Sam：「型好多喎！」
我：「型冇用喎，啲function key唔同晒，我唔適應。」
最後阿Sam都容許我揀另一部，不過佢好得意，唔睇部機嘅資料，淨睇價錢，佢覺得平嘢一定唔好，點都要買部貴先至信得過，由佢囉，反正係阿Sam埋單。
跟住我哋去咗附近一間樓上舖睇辦公室傢私，啲嘢貴到一個點，而且係唔需要，例如有個茶几成萬蚊，佢話有人上嚟會好睇啲，仲有嗰啲電腦椅都七、八千，使唔使呀？電腦枱就要可以升降嗰啲，總之佢樣樣都要最貴最靚，唔係想幫佢慳呀，而係有啲嘢唔一定貴就代表好用㗎嘛！
訂好晒嘢，約埋送貨，我同阿Sam就返公司，既然而家有電腦，當時又只係4點幾，我就問下有咩需要做？
Sam：「未有嘢做喎，打唔打乒乓波？」
……
都好嘅，你眼望我眼仲戇居，何況我有啲嘢想問，一路打波一路問可以扮晒不經意。
我：「係呢，我哋份工返幾點放幾點其實？」
Sam：「9至6囉，畀定條匙你先，有時我晏返就由你開門，另外個密碼係9662，係喎，聽日有幾個人上嚟見工，你同我一齊見吖。」
我：「好呀，請咩position？」估唔到我有份in人，又係既，呢度唔係我就係阿Sam，根本冇HR。
Sam：「有Account，有CS。」
我：「講開又講，問定你公司有咩福利先，例如幾多日大假，有冇醫療保險之類，同埋有冇雙糧嗰啲？」嗱，唔係想同你講錢呀，幫聽日嗰幾個求職者問咋。
Sam：「你之前份工幾多日大假？」
我：「14日。」
Sam：「咁就14日囉。」
其實我之前份工得12日🤣有啲後悔唔吹大啲。
打打下波阿Sam有電話，聽到佢話：「搞掂嗱？正！而家教我同事先！」
原來係人哋幫佢搞掂咗公司個online store，唔怪得咁興奮啦，睇真啲，屌！Wix嗰類罐頭網站咋喎，連domain都未見，網址最後係痴住 Wix.com
（編按：Wix可以整免費網站，包括online store或者website，裡面已經有晒好多模板，揀啱心水直接套上去，完全唔需要任何IT知識同技術，如果唔畀錢買domain（網域名），你website條link最後就會痴住 wix.com，要另外畀錢買domain先唔會有人哋免費網站個名。）
Sam：「我個friend幫我揼㗎，50萬，幾抵呀！」WTF 50萬！！！你肯定佢係你個friend？
善意提醒下阿Sam：「你記得叫佢買domain喎！」
Sam：「會呀，50萬包咗一年domain。」50萬你畀我好過啦，網頁加domain 加埋我個菊花都仲得呀！
當時我仲未知道Sam嘅background，但係已經99%肯定佢係二世祖之類，正常打過工或者搞過生意嘅人，係唔會一味追求奢華同方便，又冇財務上嘅控制同考量，我哋一般見到嗰啲紅褲子出身嘅老細係算到你盡，咩都要最平最抵，然後將所有嘢最大利益化。
我：「走先喇老細，約咗女朋友，聽日見。」搞搞下原來已經6點。
Sam：「叫返我阿Sam啦，擔屎。」
我：「不如你都叫我聶仔吖。」
Sam：「好呀，親切啲，聽朝10點有人嚟interview喎，係個女仔，見Account。」唔係親切啲，係你讀唔掂Dempsey啫！
我：「冇問題，我會準時返到。」
第二日9點我準時返到，不過阿Sam唔係，時間愈嚟愈接近10點，阿Sam依然唔見人，我開始有啲慌，打畀佢又冇人聽，連隨門鐘響起。
「Hello，我約咗上嚟interview。」
好靚呀條女！長髪大眼，斯斯文文，唔使in㗎喇，即刻返工得唔得？
我：「你好，入嚟吖，見Account呀呵？」
「係呀。」條女入嚟望一望周圍環境，我feel到佢有啲怯，其實好正常，我係男仔都怯啦，得張梳化同乒乓波枱，仲有啲九唔搭八嘅文件櫃，衰過街坊福利會，至弊係噚日訂嘅office傢私全部未送到。
我覺得自己好識執生㗎喇，份Account要做咩又唔知，條女嘅資料又冇，所以我主動提出：「你有冇另外拎CV嚟？」
「有呀。」佢喺個袋度拎出嚟畀我，雖然條女對個工作環境好疑惑，不過仲係好有禮貌，原來佢叫Emma。
因應住佢份CV，我係咁易問咗啲好廢嘅問題，例如叫佢講下之前間公司係做咩，平時主要工作內容係咩，盡量令到佢講嘢，我就淨係聽嘢，嚟到interview尾聲一定係問呢句啦👇👇
我：「Emma，有冇咩問題想問？」
條女：「我想問下……呢度冇辦公室枱，點做嘢？同埋你話係online store……真係唔似back office。」
我：「哦，始終係start up公司，老細想個環境friendly啲，啲設備陸續添置緊㗎喇。」睇嚟條女有offer都未必會take。
仲未搵到阿Sam，又有另一個人上嚟interview，一個同我咁上下年紀嘅男仔，佢叫Brian，四眼仔，見CS，一入嚟就讚嘆Office環境好正，問我哋平時係咪成日打乒乓波？麻煩你安份啲啦，你有啫啫㗎！傾返做嘢先好冇？
我用同一種interview手法，唯一唔同嘅係，Brian對份工好有興趣。
始終未搵到阿Sam，又有第三個人嚟見工，今次係個正正常常嘅女仔，佢最直接，表明想去有規模啲嘅公司，見到個環境有好大落差，所以唔會考慮。
去到第4個candidate，我已經完全放棄搵阿Sam，成朝就係不停in人，不過呢個女candidate似乎好鍾意我哋公司，可惜吖，目測起碼180磅，仲大隻過我，擔上山可以食幾日。
180磅：「好chill喎呢度。」超你老味咩。
我：「係呀，老細啲taste。」
180磅：「希望有機會喺度返工啦，我會好畀心機做㗎！同埋我成日都上網買嘢，online store嗰啲好熟㗎！」得啦，我係唔會叫老細請你㗎！
就係呢個時候，阿Sam返咗嚟：「Hello，見緊工呀？」
阿Sam坐埋嚟一齊in，180磅由烚熟狗頭咁嘅款，變到更加烚熟狗頭咁嘅款。
180磅：「好chill喎呢度。」你頭先講過啦肥妹！
Sam：「我最想打造到呢度個氣氛好舒服，大家喺度做嘢，又唔似係做嘢，咁咪輕鬆囉，個人輕鬆，做起嘢上嚟就順好多。」
180磅：「希望你可以畀個機會我，頭先聽Dempsey講，已經好鍾意呢間公司，同埋我真係日日都上網買嘢，全部流程都好熟㗎！」個肥妹又loop一次。
Sam：「係？咁你聽日返工得唔得？」又嚟？你請我已經好求其，請其他人可唔可以認真啲？
180磅：「冇問題呀，絕對可以，多謝你！」
唉，呢次真係馬騮玩賓周－－－－－玩撚完（猿）
阿Sam之後問我見咗另外幾個人覺得點，我照直答有條女叫Emma好索，好想請佢，另外有一條女表明唔想做，仲有一條仔叫Brian就正正常常，阿Sam叫我打畀Emma同埋Brian，問佢哋幾時返得工。
先打畀靚女Emma，一如所料，佢冇興趣，我個心沉咗一沉，然後到CS嗰個Brian……我有啲保留。
我：「想唔想見多幾個先？」
Sam：「唔使啦！而家有我，有你，有頭先個女仔Anne（即係180磅），仲有你話嗰個男仔，4個人暫時ok，擔屎你試下搵啲KOL幫我哋宣傳，另外睇下雜誌、Facebook、IG嗰啲落廣告幾多錢，搵100毛同微辣吖，我想多姐幫我哋出post呀！多姐索呀！」
之後一日，office終於齊章有4個人，個feel真係好似少林足球咁甩皮甩骨，但由於我要負責upload啲貨上網頁，Online store下星期先可以正式出到街，所以佢三個人喺office暫時冇嘢做，得閒無事就打乒乓波，上網睇劇，傾計，唔記得補充一件事，180磅同嗰條四眼仔嘅人工都唔少，兩個都係二萬幾，但佢哋之前份工一個係15000，一個係做part-time冇固定月薪，原來我係最有良心。
其實照而家呢個走勢，就算網站出到街，我哋嘅工作量都唔會好大，我純粹唔想同佢哋打乒乓波先至自己對住電腦做嘢。
突然有人撳鐘，180磅走去開門，係個男人，搵我哋老細。
Sam：「喂，阿Man，上嚟搵我吹水呀？」
「係呀，網站嗰度有個新功能睇下你要唔要？另外使唔使搞個Facebook同IG，我有窿路可以幫你買fans喎，好睇啲吖嘛，而家好多品牌嘅page都五六十萬fans。」
阿Sam：「買到梗係好啦，貴唔貴先？」
「一場朋友唔會收貴你啦，最緊要幫到你啲生意。」
我隱約又feel到一陣血腥味，正確嚟講係有人準備劏魚腩，想再鑿阿Sam一筆錢嘅氣味。
（待續）
－－－－－
其實你哋睇咗第一集未㗎？《我老細係二世祖1》https://hkofficedaily.com/?p=16500