根據Jeff嘅描述，前上司所謂嘅做假數，係因為佢舊公司嘅計佣制度用跳級嘅計算方法，舉個例，嗰個月生意得10萬，你就淨係收底薪，做到10萬樓上至20萬，你份佣就有5%，20萬樓上至30萬，分10%，30萬樓上至40萬，分15%，如此類推咁樣一路上。
Jeff有一個月因為差萬幾蚊就到某一個數可以跳級，然後佢就同個熟客商討，可唔可以將嚟緊嘅單提早order，仲提議個客唔使找數住，落完order hold起先，總之有單入令到佢份佣可以跳級就得。
咁最後點解會被發現呢？因為個客直頭cancel咗張單，Jeff嘅前上司打去問咩事，唔知點樣chok到Jeff同對方夾計，所以就咬實做假數呢個point唔放。
你哋聽完係咪都覺得有問題？如果以對錯同埋守則嚟講，咁樣點計都係唔啱，而Jeff都坦承自己做錯，只係我冇諗過老細聽完會話：「好小事啫，好多Sales都係咁，我後生都做過Sales，有時唔係為咗賺多啲佣嘅，條數出嚟大啲靚仔啲，公司都會重視你多啲，第日唔好咁就得啦，冇事啦，返出去做嘢。」
我又真係估唔到老細咁豁達。
返出老細房之後，Jeff嘅情緒已經好低落，佢仲向我逐一解釋喺office亂搞男女關係、大大聲講粗口、遲到早退、同同事發生過唔止一次肢體衝突等等事情嘅始末。
佢有同舊公司一位女同事拍拖，一次咁大把，但前上司認為佢喺公司溝女就唔啱；至於大大聲講粗口同埋發生肢體衝突其實係同一件事，因為佢遞完辭職信之後不堪前上司嘅語言暴力，受唔住對方每日單單打打，所以雙方差少少就喺office開拖；遲到早退都係resign之後大家搞到好唔開心，佢話自己盡量唔留喺公司，怕又會有磨擦。
Jeff嘅說話你又信唔信呢？我自己就一半半啦，不過關鍵係我著眼於佢呢一年喺公司嘅表現，四平八穩啲數都唔錯，亦都冇特別遲到早退或者唔守公司規矩，最近仲簽咗一張大單返嚟，我係咁易check過喇，個客寄埋cheque嚟，唔係咩做假數。
後來老細再另外搵我單獨傾，佢話問過行家，較早前Jeff簽返嚟張大單，正正就係爭贏咗佢間舊公司，難怪Jeff嘅前上司嚟到今時今日先忽然報寸，send完匿名email，再打嚟揭黑歷史搞咁多嘢。
老細嘅意思係「維持原判」，我哋都認為一隻手掌拍唔響，Jeff同佢前上司嘅矛盾咁深，應該唔會係單向，而且人誰無過，以前做錯嘢當係汲取經驗同教訓，老細仲話：「大家都做過Sales，少少蠱惑嘢梗有嘅，我諗佢經過咗今次，會明白咩係應該做，咩係唔應該做㗎喇，Jeff都有啲potential，畀下機會呢個後生仔啦！」
本以為呢件事就咁樣圓滿解決，點知隔咗兩日，Jeff竟然遞咗封辭職信畀我……
我：「做咩呀？因為嗰件事？我同老細都覺得過咗去嘅嘢就算，你唔使resign喎，係咪仲有其他事？」
Jeff：「多謝你哋，不過我覺得好尷尬，覺得唔好意思，考慮咗成晚喇，希望你接受我辭職啦！」
再同佢傾得深入啲，呢個傻仔原來係過唔到自己嗰關，佢覺得好瘀，我理解，但依然盡力挽留，可惜Jeff都係決定要走，唉！
無奈放人之後，其實大家係好嚟好去，佢last嗰個月並冇好似前上司所講咁樣遲到早退，亦都冇大大聲講粗口，正如我所講，好多嘢真係雙向，你對人好，人對你好，職場同生活都係一樣。
不過Jeff走咗冇幾耐，我仲收到佢嘅消息，係一位好熟嘅行家打嚟畀我，內容都幾震驚。
行家：「你係咪有個舊同事叫Jeff？早排佢去我公司見工。」
我：「係？有冇請佢呀？幾叻仔㗎！」
行家：「我想請，老細唔批，佢應該得罪咗再對上嗰間公司，人哋周圍唱佢，話要封殺到佢喺呢行冇得撈。」
咁嚴重？後來我了解返，原來又係Jeff嘅前上司所為，當然啦，如果Jeff要喺呢行撈啲唔出名嘅細公司係冇問題，不過稍為有規模嘅同行就難啲喇。
我知道呢件事之後有搵過Jeff，佢都知道有「封殺」呢回事，Jeff表示最近去見另一份工，朝早in完，晏晝就收到前上司電話，對方叫佢死咗條心，強調同佢啱啱in完嗰間公司啲人好熟，已經通知同行唔好請佢。
有時行頭窄就係有呢啲煩惱，圍內嘅公司同人際關係千絲萬縷，A又識得B，B又識得C，好多行業都係咁。
我：「搵唔到咪返嚟做囉，老細應該ok嘅，返嚟啦！」
Jeff：「唔啦，Sales賣咩都一樣啫，我轉industry囉，我冇事呀，得啦，唔使擔心。」
成件事都幾唏噓，Jeff做錯咩都好啦，大家出嚟社會做嘢，講到尾都係搵食啫，佢前上司又唔使趕盡殺絕嘅，其實職場好細，凡事留一線咪算囉， 迫到人哋無立足之地要轉行有乜謂呢，好心分手真係咁難咩？
據我所知，Jeff呢位前上司都50幾歲，或者佢喺呢行好有權力同埋影響力，但係心胸就似乎狹窄咗啲，Jeff 30歲都未夠，何必同個後生仔斤斤計較呢？畀個機會人哋啦，唔使去到咁盡追打落水狗吖！