「有為青年！啱喇，有嘢想搵你，坐停車場更亭啱唔啱呀？夜晚冇乜車出入，齋坐就得㗎喇，定係你想跟我一齊坐control room？有冷氣煲劇幾正㗎！同埋你放心呀，識英文好快有得升職，總之你識做，我識做。」自從狗仔式事件之後，阿頭就一直稱呼我做有為青年。
以前我覺得返office先會有複雜嘅人事關係，做保安相對嚟講會簡單好多，不過後來先發現咁樣諗係錯嘅，人事人事，有人嘅地方就有事，爭吵、擦鞋、巴結、獻媚、講是非，每一樣都唔會少，甚至比起我上一份文職有過之而無不及。
原來巡邊度，守邊度，好多保安同事都好在意，合理嘅，大家都係打份工，點解有啲人條路線輕鬆咁多？你話關係上冇帶嚟便利一定係呃人，另外仲有一樣嘢係大家都想爭取，就係OT，我哋呢度會講成頂更。
喺control room同阿頭涼冷氣吹水，隔日就會有同事入嚟請佢食嘢，仲會送禮物，當然唔係啲咩名貴嘢啦，可能係一盒曲奇、罐頭鮑魚、一袋不知名冬菇，因為送禮嘅人不外乎係阿叔同阿姐呢個年齡層，而佢哋嘅目的只係有一個，就係想阿頭有OT頂更記得第一時間關照。
我：「咁奇怪嘅？我以前返寫字樓冇人想OT，呢度就個個爭住OT，我見有啲人可以踩足廿幾日冇放過假。」
阿頭：「點同呢！好多人都嫌保安人工低，咁有人射波咪想頂更囉！或者可以叫買假，賺多啲錢吖嘛！」
唔知係咪間學校太大，保安多，射波嘅人都好多，幾乎日日有同事射波要搵人頂更，絕對冇誇張。
阿頭：「有為青年，我對你特別好嘅，人哋頂更就照平時返工時間，你就優待啲，頂更嘅日子可以9點幾10點先返到，錢一樣，工時少啲，算唔話得喇啩！」
其他同事因為見到我成日同阿頭坐control room傾計講笑，以為我哋friend過打band，所以對我嘅面口比起初初入嚟時好好多，雖然之前都唔係特別差，但而家就可以用熱情如火嚟形容囉，有時我都有禮物收，又請埋我飲咖啡奶茶。
不過我留意到一樣嘢，有得優先頂更嘅人除咗我一個男仔之外，其他都係女人，而且個type都係嗰種算係風韻猶存嘅阿姐……sorry，講完都打咗個冷震，因為我親身經歷過，有個阿姐以為我真係同阿頭好熟，有日喺我耳仔邊講嘢，仲請我食波餅。
嗰位阿姐叫阿梅，唔知佢幾多歲喇，40幾50啩，有日我喺另一個更亭煲緊劇，忽然耳仔邊有人講嘢，仲吹咗啲氣埋嚟，我全身毛管都戙起晒。
阿梅：「靚仔，睇緊咩劇呀？我又係好鍾意煲劇㗎喎！」佢有少少鄉音。
我：「嘩，你行路冇聲既。」
阿梅：「我瘦吖嘛，個人好輕，行路咪冇聲囉，聽朝收工要唔要一齊飲早茶呀？」
佢一路講，一路用心口挨住我手臂，因為我一直坐喺度，佢就企喺我身後斜少少手臂位，喂我廿幾歲咋，唔係唔鍾意食波餅，但一定唔係你個波餅囉！
好衰唔衰原來有個阿叔同事見到，後尾仲煞有介事走嚟同我講：「你唔好同阿梅行得咁埋呀！」
我：「幾時有呀，佢同我講嘢之嘛，咁緊張嘅，你鍾意人呀？」
阿叔：「痴線！佢同阿頭有路㗎！」
有路？不過上次狗仔式個女主角唔係阿梅喎！
我：「你唔好亂講啦！」
阿叔：「親眼見到阿頭同阿梅喺樓梯嗰邊打車輪㗎！都唔知係咪呢個姣婆搞到阿頭同阿琴分手。」
我：「等等，邊個係阿琴？」
阿叔：「阿琴咪係嗰個山東婆囉，波大大嗰個呀！以前佢哋成日卿卿我我，見過阿頭摸阿琴屎忽啦，幾廿歲人仲喺度打情罵俏。」
唔係啩！狗仔式個女主角叫慧姐，頭先嗰個叫阿梅，仲有個阿琴摸屎忽？貴圈真亂！
阿叔：「阿頭咁濫，你估佢有冇性病吖嗱？」
估佢有冇性病？你會唔會太睇小佢呀？不如估下佢有幾多種性病仲好啦，讓你球半/兩球都仲得呀！
返入control room之後，我直接問阿頭：「原來你係情聖嚟㗎？又阿梅又阿琴，食幾多女㗎喎！」冇用吖，全部肥屍大隻，真係飢不擇食。
阿頭：「你點知㗎？邊個同你講㗎？」
我：「唔講得，不過你小心啲啦，其實有好多同事知㗎，佢哋唔出聲咋！」
阿頭：「有為青年，總之有人問起，你就幫我鬧佢哋，叫佢哋唔好亂講亂估，幫我澄清返，等等先，我老婆打嚟，轉頭再傾，喺control room等我呀！」
仲有個老婆？佢啲關係七國咁亂喎！
間唔中都有好多笑料㗎，好似早幾日咁，有個50幾歲嘅阿叔辭職，有張form要填，裡面有一行係問佢點解要走，我睇完忍唔住笑咗。
我：「你寫住因為阿頭屌你老母呀？冇人咁寫㗎喎！」
個50幾歲嘅阿叔：「咩冇人咁寫呀？呢個係事實，佢屌我老母做咩呀？我要畀公司知道呀！」
Okok！率真都好難得既，不過我個阿頭的確壞事做盡，亂搞男女關係，有好嘢專益巴結佢嘅人，特別係嗰啲同佢有一腿嘅阿姐，對住男同事又第二個面口，仲要屌人老母，有時真係覺得佢踩緊鋼線。
我返工盡量唔理咁多嘢，做咗本份就算喇，唔會貪嗰啲小禮物，亦唔會濫到搵啲阿姐驅風，我求財同埋求舒服㗎啫，嗰個月想賺多啲咪頂更頂得密啲囉，呢度上咗年紀嘅人真係比較多，冇諗過自己馬馬虎虎嘅英文喺同事𥚃面已經算最勁，所以最後真係升咗職。
而家耐唔耐都有朋友或者舊同事介紹文職工作畀我，不過已經冇諗喇，暫時呢份保安返得幾開心，反而係屋企人話冇前途，叫我搵份政府工喎，其實行行出狀元，就算保安業都有佢嘅前景同學問，正當職業自給自足有咩問題？
同埋我唔鍾意用工種去標籤一個人成功定係失敗，警察究成日話除暴安良啦，咪又係耐唔耐有一單休班警偷影裙底，每個人都有唔同嘅路，途中亦有好多選擇，睇你點樣演繹㗎啫！(完）
未睇上集嘅朋友可以去呢度
《失業後，我去咗做保安》上
https://hkofficedaily.com/?p=21608