我同上司講咗無數次，係無數次，Sophia呢條八婆勁卸膊，冇責任感，賴皮又唔做嘢，不過上司一直採取鴕鳥政策，過得一日就一日，仲將條八婆應該做嘅嘢交晒畀我同埋另一個同事，忍咗足足兩年，而家佢哋終於受返晒。
Media公司，我個部門有4條友，大家每日嘅工作就係狂出social media post，幫公司賺流量，唔似你《辦公室日報》每日出一篇文，我哋起碼要8篇至10篇，都係嗰啲炒城中熱話嘅post，豬肉檔阿威又寫，撞跌天線得得B又寫，總之以量取勝，因為公司要養好多人吖嘛。
每日8至10篇稿，一個星期就係70篇左右，搵料寫野已經唔輕鬆，唔計上司，照道理3個同事每日各自負責3篇左右就啱數，不過Sophia條八婆係可以懶到一日交一篇，有時甚至一篇都冇，佢話自己寫嘅主題難啲喎。
佢本身已經係左抄抄右抄抄，抄你個page啲稿都好多次，搬字過紙，加返個credit畀你就當做咗一個post，之前佢仲鬧你個website唔畀人copy & paste，要佢自己照住打一次好麻煩，幾好笑，不如成份原稿word檔畀埋佢好唔好？
由於Sophia賴皮，三日唔埋兩日就請假，我同另外一位同事Jessica就要食埋佢嘅工作，每日嘅工作量double，有時佢唔返工冇晒影，workload就再多啲，同埋我哋間中都要去做訪問，Sophia可以約完嘉賓然後自己甩底，我同Jessica要臨時臨急頂上幫你完成，所以條八婆係極不負責任。
我哋同上司反映過好多次，得到嘅回覆係：「我知，所以交嘢畀佢真係唔放心，我知道你兩個穩陣吖嘛，拍硬檔啦！」
咁你唔放心交工作畀佢，就要我同Jessica食晒呀？但無論點講都好，上司都係選擇容忍Sophia，總之愈廢嘅人愈輕鬆，愈肯做同埋愈有責任感，就畀多啲嘢你做囉！
我係上年年尾走，因為搵到工，上司加$1000挽留，但我每日做埋Sophia嗰份，忙到連廁所都去唔到，因為出post要夾時間，要同出面鬥快，不如我畀返$1000你，你受返晒Sophia啲蘇州屎吖！
喺我走咗之後，公司請咗個新人，因為盲嘅都感受到Jessica好忙，而Sophia就數手指齋上網，拖慢啲嘢嚟做，所以新人有問題就嘗試請教Sophia，見佢得閒吖嘛。
Jessica：「勁搞笑，新人問Sophia入稿程序，條八婆直接話唔識，唔好問佢，唔得閒，啲態度仆街到呢！」
呢位新人可能發現唔對路，返唔唔夠一個星期就resign，其實好正常吖，條team得4個人，但已經有一個係咁唔友善，同埋佢返得幾日工，Sophia有兩日都請假，新人都未搞得掂就要食埋舊人個workload，平時問嘢仲要畀條八婆西面，而家唔走等幾時？
Jessica過多陣都轉team，佢自己申請內部調去做Sales，一來處心積慮啦，二來佢同Sales Team個阿head係幾熟，因為工作上幫過忙出啲廣告稿，上司當時已經知道大鑊，新人走咗，Jessica又轉team，咁咪得返佢同Sophia你眼望我眼囉！
上司好似氹女咁樣想留Jessica，不過公司係Sales Team獨大，而且特別惡，唔使旨意同Sales爭人啦，如是者上司就急急腳請返另一個新人，係一個叫Ivana嘅女仔，簡直係經典中嘅經典，佢嘅卸膊程度係Sophia嘅兩倍，真係高手過招。
因為Jessica只不過轉咗部門，佢仲喺公司目睹一切，Sales Team亦都喺舊部門隔籬，Jessica親眼見到Sophia發脾氣，大大聲同Ivana講：「有冇搞錯呀，你返成日工淨係寫咗一篇稿，我哋每日要出8至10篇㗎！」
Ivana：「咩呀，我見你都係交一篇之嘛，前日你請咗假，一篇都冇。」
Sophia：「點同呀？」
Ivana：「咩唔同？」
Sophia：「你今日交到幾多？」
Ivana：「今日冇呀，都冇咩爆料。」
Sophia：「點會冇呀，冇咪抄囉，出面幾千幾百個page！」
Ivana：「咁你抄啦，我睇緊另外一單。」
Sophia：「聽日開始，一人4篇，mark返數。」
第二日，Ivana請假，佢話自己上年中過肺炎，而家仲keep住有啲唔舒服，懷疑係長新冠喎！最正我同Jessica走咗之後，公司淨係請返一個人拍住Sophia，好似係cut budget，而高層同時又詐型話稿量太少，流量急跌，訂咗每日最低限度要出10個post。
然後Sophia一個人要孭10段稿，講緊每日10段，Jessica話好耐冇見過Sophia請假喇，連上司都要幫手寫幾段。
後來Jessica又聽到Sophia同Ivana嘈。
Sophia：「明明講咗一人4段，而家公司加到一日10個post，我都寫咗6段啦，你仲係得一段？」
Ivana：「幾時講過？可能我中過招之後有腦霧，記性差咗。」
Sophia：「有腦霧都要做㗎，我而家咪話畀你聽每日最少交4段稿囉！」
聽返Jessica講，Ivana之後真係有交4段稿，不過唔係照copy出面其他媒體就係錯漏百出，Sophia改佢啲錯別字花嘅時間仲多過自己重新寫一篇，條八婆仲走去同Jessica呻，Jessica當笑話咁聽，上司仲要親自落場寫稿出post，因為上面好大壓力。
更正嘅係，Ivana請假仲密過Sophia，仲好鍾意夾晒時間自制長假，大時大節前後一定請。
點解唔炒Ivana？冇得解㗎，正如上司當日都冇炒Sophia一樣，佢係佛系等人辭職，同埋上頭cut咗budget之後，上司怕個headcount會繼續縮，而家Ivana衰極都會交一段稿，或者hea住抄人啲post，如果真係炒Ivana，上司應該忙到屙尿都唔得閒。
上星期呢位前上司先至WhatsApp我，問我喺出面做得開唔開心，問我想唔想返嚟做，人工有得傾，唔好意思，我個人都係比較小器，當時除咗一口拒絕，仲好心涼，一物治一物，糯米治木蚤，終於有人收服到隻卸膊精，雖然我做唔出，但好慶幸原來有人比Sophia更無恥，竟然可以同佢鬥賴皮。
Sophia個格就唔會辭職㗎喇，佢出去都好難搵到工，慢慢受啦！