「Claire，想問下你可唔可以做我伴娘呀？」發出呢個請求嘅係Lorraine，我哋喺公司已經做咗5年同事，friend到幾乎每日孖住食lunch，放工仲會約埋出街，又試過一齊睇演唱會，大家感情的確好好，所以佢開到聲叫我做伴娘，當然唔會托手踭啦！
我：「恭喜晒呀！真心替你高興！咁諗住幾時擺酒呀？酒席都訂埋嗱？婚紗相影得切咩？我做伴娘冇問題呀！仲有冇公司同事幫手搞個婚禮㗎？咁我都要開始減肥喎，唔係到時點著得落啲衫。」好同事兼好朋友準備出嫁，我嘅心情仲激動過準新娘本人。
Lorraine：「同事入面我會搵你做伴娘，陣間問下Fiona肯唔肯幫手做姊妹，咁你同佢都識吖嘛，到時咪唔會悶囉，另外仲有一個姊妹係我中學同學Summer，之前同你提起過佢㗎！Summer份人又係好nice，所以大家應該啱玩。」
我：「好在同Fiona都算熟，有多個同事傍住，婚禮當日會冇咁尷尬。」
Lorraine：「距離婚禮仲有9個月，遲啲約埋Summer出嚟一齊去試裙啦，想你哋畀下意見，同埋都要揀姊妹衫，嚟緊有婚紗展呀，不如陪我去吖，聽講啲餅卡會平過出面，仲有送畀賓客啲小禮物，你覺得買咩好呀？」
結婚真係好多零零碎碎嘅嘢要煩，不過都係幸福的煩惱，一來行街試裙呢啲本身係女仔喜好，二來都會幻想下將來自己結婚要點樣準備。
不過我咁耐以嚟都未見過準新郎哥，聽Lorraine講，佢男友鍾意二人世界多啲，如果平時join埋我哋女仔啲聚會，驚自己搭唔到嘴會悶親喎！
Lorraine：「佢好宅㗎，連fb都冇，平時淨係鍾意打波打機，一同佢班friend玩就忘晒形，成個大細路咁。」
我：「但係聽講兄弟姊妹喺婚禮前都要見一見㗎喎，食飯認識下之餘，又會順便傾下啲流程同分工。」
Lorraine：「係呀，提過佢㗎喇，我哋11月結婚，9月底或者10月頭食餐飯好冇？佢啲兄弟幾靚仔㗎，介紹埋畀你識吖！」
我：「你都知我有男朋友啦，兄弟就冇興趣喇，反而好想見下你未婚夫就真，同你做咗咁多年同事，聽就聽得多，不過一次都未見過，有冇相可以睇下呀？」
Lorraine：「未婚夫？哈哈，仲未習慣呢個稱呼添！佢唔鍾意影相㗎，唔知係咪個個男仔都係咁，不過都可以比你睇下我同佢嘅合照嘅。」
當時係我第一次睇佢未婚夫個樣，第二次就係結婚前一個月嘅兄弟姊妹聚會，準新郎ok吖，高高大大，講嘢仲幾風趣，唔似Lorraine所講咁宅喎，食飯嘅時候好主動咁搞氣氛，令到班兄弟姊妹初相識已經好好傾。
正當一切準備就緒，我竟然意外發現到Lorraine個未婚夫有第二條女，發現嘅過程頗為轉折，我搵唔到形容詞，究竟係世界真細小小小，定係天網恢恢呢？兩組句子似乎都唔恰當。
事緣我男朋友同佢班舊同事出去飲嘢，然後佢其中一個舊同事就喺fb post咗張大合照出嚟，tag咗我男朋友，咁我自然會睇到啦，張相裡面有條仔攬住條女，當時未有疫情，個世界仲未興一年365日戴口罩，所以我清楚認到條仔係Lorraine男友，話晒都見過真人，嗰次兄弟姊妹聚會都坐咗接近3個鐘㗎！
當時我即刻問男朋友係咪識得個男仔：「左手邊著間條衫攬住條女嗰個，好似係我同事Lorraine嘅未婚夫喎，原來你哋識㗎？仲要係舊同事？係咪叫William？」
我男朋友：「唔記得喎，當晚第一次見咋，我唔識個男仔，反而條女先係我舊同事，佢哋攜眷食飯吖嘛，叫過你去㗎，係你話要同Lorraine去金都買利是封同掛飾，咩佈置出門……」
我：「停！唔係怪你唔叫埋我去呀！而家點算呀？Lorraine個未婚夫有第二個喎！佢哋就嚟結婚喇！你肯定個舊女同事係同佢拍緊拖？」
我男朋友：「係啩，唔通問人係咪真係拍拖呀？斷估唔會帶阿哥或者細佬出嚟啦！其實係咪係認錯人呀？」
我：「冇幾耐之前先至兄弟姊妹聚會咋，應該唔會認錯啩！你可唔可以睇到佢fb account？」
我男朋友：「條仔個account？都話唔識佢，不過我同個舊女同事本身有互add，click入去睇下有冇其他相囉！」
即刻click嚟睇，雖然得幾張合照，但睇完更加肯定係同一個人，男友係咁質疑我點錯相，叫我多一事不如少一事，黐線！有懷疑咪問清楚囉！為咗Lorraine嘅幸福，我直接cap圖就send咗張相畀Lorraine確認。
我已經戴晒頭盔：「喂，勁似你未婚夫喎，佢係咪有孿生兄弟？」雖然男朋友話我咁樣問反而仲假，不過如果真係認錯，都要搭個落台階畀自己㗎嘛。
當時用WhatsApp溝通，Lorraine淨係回咗呢個emoji畀我－－－😨
其實feel到少少唔對路，不過Lorraine過咗成個鐘都冇再回任何msg，我開始好擔心，直接打去想問下咩情況，Lorraine又冇聽電話，應該係同未婚夫攤緊牌，記得嗰陣已經係夜晚11點幾，佢唔覆都冇辦法，唯有等第二日返公司再了解啦，點知去到凌晨12點幾嘅時候，Lorraine竟然打嚟鬧我，冇錯，係鬧我，超惡嗰種語氣：「你點解要話畀我聽呀？你明知我哋就嚟結婚，你點解要喺呢個時候話畀我聽呀！」
雖然冇得回emoji，但我聽到呢個電話嗰陣，自己嘅表情亦係咁樣－－－😨
我一直安慰Lorraine，亦一直以為佢只係接受唔到，所以先至會發脾氣對住我咆哮，純粹想搵個情緒嘅出口，點知第二日喺公司見到面嘅時候，Lorraine對住我咁樣講：「婚我就一定會結，不過你唔使做我伴娘喇！」
我：「嗱，我知你心情唔好，但係大家都係成年人，講嘢唔該有分寸，你咁講係咪要絕交先？我將自己見到嘅事實同你講，我做錯啲咩？已經畀你鬧咗成晚，今朝返嚟仲擔心你，而家你話照結婚，唔使我做伴娘？」
Lorraine：「係，總之唔使你做伴娘，Fiona會幫我做，麻煩你當日唔好出席。」（未完待續）