我入咗嚟呢間公司兩個幾月，角色係頂替之前嘅部門主管，雖然喺度工作嘅日子暫時仲係好短時間，但我已經發現呢間公司嘅人好注重行頭，或者係同行業有關啦，中環甲級商廈，做金融服務產品。
幾乎每個男同事都係戴Rolex、Cartier、Patek Philippe，其實我就冇乜研究，自己都係戴住Apple Watch返工，而女同事嘅手袋就更癲，牌子我都講得出係Chanel、Gucci 、Celine、Hermès，至於值幾錢就真係唔識，但你行入我哋office都會感受到爭妍鬥麗嘅氣氛。
我條team有個女仔比較平實，平時見到班同事喺度討論啲名錶名袋都冇參與，典型自己做自己嘢嗰種，我返工頭幾日就有一個下屬喺我面前講佢。
「呢餐Welcome Lunch特登唔嗌Julia出嚟㗎，咁樣我哋先可以食好啲，太貴佢唔去㗎！」
初入嚟嗰陣聽唔明，又唔肯定佢哋係咪私底下好熟，唔知係咪講笑，所以我都小心翼翼回答：「Julia係咪四眼嗰個女仔？唔緊要啦，反正太多人都係要分枱坐，我可以另外搵日同佢食飯。」
我冇特別放在心上，後來有一次放工同另一位下屬同路行去搭車，講講下公事佢又提起Julia。
「你有冇見到Julia個袋呀？頭先我哋成班同事笑咗好耐，唔知係咪淘寶淘返嚟，勁似啲幾廿蚊嘅貨色，你估仲係中學生咩！」
我：「冇留意喎，同埋我冇研究女裝手袋，對我嚟講個個袋都差唔多啫。」
「好大分別㗎，始終每日都有客上嚟office，佢個袋咁cheap，我係客見到都冇信心啦，好似話畀人聽喺度做搵唔到食咁。」
嗰次係第二次有同事喺我面前提Julia，加上當時返咗差唔多一個月喇，從觀察中見到大家並唔係太鍾意Julia，嗰啲唔食太貴嘅lunch同埋用cheap袋嘅言論明顯唔係講笑，的確有種睇唔起人嘅感覺。
雖然我係部門主管，但喺度嘅資歷仲係新，所以佢哋之間有冇咩恩怨情仇就唔清楚喇，只係單純睇工作表現的話，我覺得Julia完全冇問題，仲幾有效率添，至少我交畀佢做嘅嘢冇甩漏，有交帶，所有嘢都清清楚楚，無論作為我嘅下屬又或者係公司嘅一員，絕對合格有餘。
上星期有兩個同事叫埋我一齊食晏，食食下佢哋又講Julia，今次比之前更加進擊，因為其中一個講得好白：「其實我哋team人唔係好鍾意Julia，你feel唔feel到？」
我：「點解呢？我見大家圍埋傾計，Julia就通常自己喺個位做嘢，佢係咪有咩得罪你哋？」
「正常你都唔想同佢講嘢啦，來來去去都係嗰兩三件衫，叫佢出去食飯又話啲餐廳貴，咁你喺IFC同置地呢頭可以幾平呀？入得嚟呢度做人工都唔係好低啫，使唔使咁寒酸呀？」
同枱另一位下屬又加把嘴：「早排見到佢睇求職網，可能搵緊工喇。」
「如果佢自己走就好呀，都傾唔到計既。」
唔知點解我當時著咗，將捲起意粉嘅叉放低，對住佢兩個講：「唔鍾意佢，甚至係排斥佢，呢啲都係你哋嘅自由，但係點解嫌人哋寒酸，就要見到對方走先至安樂？你又係返工賺錢，佢又係返工賺錢，乜有高低之分㗎咩？唔鍾意佢，咪河水不犯井水囉，各自做好自己嘢就得啦！」
見到我態度變得好認真，其中一個下屬就試圖笑住打圓場：「咁又係。」
咁咩又係啫，你哋班人唔止一次喺我面前話Julia寒酸啦，明示暗示叫我加入你哋杯葛人嘅行列啦，所以我未講完：「其實每個人捨得使錢嘅地方都唔同，我有個朋友可以著十幾廿蚊一件嘅tee，但係食嘢就會食得好貴，各人有各人嘅喜好同取向啫，就算Julia喺度做嘢嘅人工唔低，都唔代表佢要將啲錢買靚衫靚袋食貴lunch去證明自己，佢可能寧願慳返啲錢供樓，資產多過你哋都唔奇，又或者Julia屋企負擔好重，要就住洗又唔出奇，請問佢邊度得罪你哋？就係因為來來去去得幾套衫，冇名牌手袋？」
下屬再試圖搭個落台階：「講笑啫，唔使咁認真，食嘢先食嘢先。」
我：「 喺職場淨係講工作能力，唔理你係新人定係老臣子，做嘢掂唔掂永遠係首要考慮條件，返工係為咗賺錢，唔係為咗識朋友或者討好同事，所以Julia鍾意著咩食咩戴咩用咩，全部係佢嘅自由，我好奇怪你哋會因為呢啲原因而希望見到佢快啲搵到工走。」
結果呢餐飯喺尷尬嘅氣氛之下食完，兩位下屬埋單後亦隨便講咗句「去買啲嘢」避開同我一齊行，佢哋亦都冇再約我食lunch喇，意料之內。
返到屋企同老婆講呢件事，老婆話我太直，同埋剛剛嚟到呢間公司冇幾耐，咁樣訓斥同事好似唔多好，其實我已經勒住㗎喇，我唔係戴名錶，西裝更加唔係名牌，如果大家睇唔起Julia，可能亦會睇唔起我，只係呢班下屬明白我係上司，杯葛唔起，某程度上咪又係欺善怕惡。
以前份工雖然都係management level，不過舊公司冇咁大名氣，又座落喺九龍灣，班同事未至於咁講究行頭，嚟咗呢度先發覺原來有啲人真係咁誇張，竟然會睇你用咩牌子同埋係咪身光頸靚，然後再決定同唔同你做朋友。
當然啦，佢哋喺背後可能唔止講Julia，或者都有嫌我寒酸，但我理得你吖，你做好你嘅份內事，我又做好我嘅工作，月尾準時出糧，唔好搞到啲嘢咁複雜，我嘅要求就係咁簡單。