中年好聲音 (上) 辭職參加歌唱比賽

「呢鋪如果畀我贏咗,咁就唔使再打份牛工,其實唔使贏冠軍㗎,攞第二第三都得,你睇以前啲新秀,黎明、鄭秀文、李克勤、周慧敏,仲有草蜢通通唔係冠軍,有啲直情冇獎,咪一樣大紅大紫,最緊要有機會,有人識就得啦!」

講呢番說話嘅係公司一位老屎忽阿叔同事,某日做做下嘢佢突然發表偉論,心諗咩事咁亢奮呀?原來佢準備要報名參加歌唱比賽,想叫我哋陪佢去唱K練歌,因為有幾首飲歌唔知應該揀邊隻去參賽,希望大家畀啲意見。

可能你會話:「幾廿歲仲發歌星夢?」問題唔係年齡,而係佢唱歌真係好難聽,成班同事一早已經領教過,我喺疫情前入嚟呢間公司做,當時唱K唔使理咩防疫措施,以為大家柴娃娃玩下咪一齊去囉,嘩!點知道會咁鬼大鑊!

好記得第一次同呢位阿叔同事唱K嘅時候,佢點咗首《風繼續吹》,未唱之前已經話自己係再生張國榮,沿路去唱K講咗十幾次,一開口唱之後我終於明,你唱成咁,張國榮真係唔慌唔激到彈返起身,「再生」係咪咁解呀?

跟住佢就唱《每天愛你多一些》,呢個時候佢又話自己係「再生張學友」。

我:「張學友仲健在喎,點樣再生呀?」

阿叔同事:「呀……係喎,張學友未死喎,唔緊要啦!啲朋友話我唱歌似佢,總之就係再生張學友!」

如果有人聽過朱總理唱歌而又覺得難聽嘅話,我想話畀你哋知---低處未算低,呢位老屎忽唱歌係難聽過朱總理10倍,我冇心理準備所以冇拍片咋,否則佢唱《每天愛你多一些》肯定網上瘋傳,朱總理都要行埋一邊。

最癲係咩呀?阿叔同事喺毫無先兆嘅情況下突然辭職,原因係要備戰……你冇睇錯,我都冇寫錯,「備戰」兩個字係出自佢把口。

阿叔同事:「頭先我口頭講之嘛,老細就問我咩事要辭職,我話要參加歌唱比賽追夢,老細話就算追夢都唔使辭職咁激喎!痴線!我好認真㗎,一係就唔做,一做就要做到最好,唔使備戰呀?我要養聲㗎!諗住搵個歌唱導師執一執細節位,杜麗莎係咪教唱歌㗎?唔知幾錢一堂呢?Miss Chan Chan都好,我本身都鍾意Miss Chan Chan同張國榮嗰首《誰令我心痴》,你可唔可以幫我上網搵下杜麗莎有冇教唱歌呀?」

你唱成咁,巴伐洛堤都教唔掂啦!不過一單還一單,作為同事,我係十分支持佢辭職,因為呢個老屎忽根本就係公司嘅害蟲,做嘢冇交帶,好鍾意恰新人,佢平時返工個格就係嗰種「呢單嘢唔係我跟開」,如果有個卸膊大賽一定攞硬冠軍,所以佢話辭職簡直就係一大喜訊。

我:「其實你參加咩比賽,係咪嗰啲黃大仙成人歌唱比賽?有冇獎金㗎?辭職咁冒險?」

阿叔同事:「我參加中年好聲音呀!」

我:「咩聲音話?」

阿叔同事:「中年好聲音呀!TVB㗎!你係咪嗰啲淨係睇Viu唔睇TVB嘅人呀!」

我係直情好耐冇睇電視,不過問題嘅根源同關鍵唔係TVB,都唔係ViuTV,大佬你唱成咁就算ThisAV都唔收你啦!仲要辭職去參加歌唱比賽?食咗藥未呀你?

上司聽到我哋嘅對話走咗埋嚟搭嗲:「你唔好阻住人追夢啦,中年好聲音我聽過,招募緊參賽者,講真我都好佩服,呢份勇氣好難得,真係犀利!」上司好用力咁捏咗我膊頭一下。

阿叔同事:「梗係啦,以前細個掛住搵食,錯失咗好多機會,而家我想做返啲自己鍾意嘅事,啲朋友個個都話我係再生張學友,冇理由埋沒自己啫!」

都話張學友仲在生,你再乜春嘢生呀!

上司之後私底下鬧咗我成分鐘,佢話呢度唔興炒人,呢個老屎忽又做咗咁耐,難得佢自己話走,叫我唔好再多管閒事,因為當時老屎忽只係口頭話要resign,其實封辭職信係未到手㗎!

人哋話最毒婦人心,但我上司係男人,估唔到佢都咁毒!仲衰到當晚捉晒我哋成班人去唱K,話要畀啲信心個老屎忽,叫大家記住讚到佢天上有地下無,讚到佢飄,讚到佢飲營養快線……Sorry,最後一句係我自己加。

結果我哋真係走咗去唱K,Wow!佢唱《年少多好》點止耳朵流產,直頭難產胎死腹中,老屎忽唱歌有種特別技能,就係每句歌詞都會遲兩粒音先入到,而最後又會唱得晒全句㗎喎!係咪好神奇呀?我用《每天愛你多一些》做例子:

而每過一天每一天這醉者,「過」字係第3粒音係咪?佢係一定去到個「過」字先唱第一隻「而」字,但係你唔好理,最後佢又會趕得切喺一句完結前唱埋最後嘅「醉者」,每一首歌,每一段歌詞都一定入慢,又唔知點解唱得晒,我聽咗成晚都搵唔到個邏輯喺邊?

上司拍晒手:「唱得好好呀!好難幫你揀參賽歌喎!《年少多好》嗰份滄桑係你先唱到,黃貫中唔係你嗰皮,《每天愛你多一些》就真係好似學友……」

阿叔同事:「係咪呀?啲朋友都話我係再生張學友。」DLLM一晚要重複呢句幾多次呀!究竟你係再生張國榮定再生張學友呀,學友仲生勾勾㗎!

上司:「不過咁,你呢個中年好聲音始終唔係模仿大賽,會唔會考慮下頭先隻《左右手》呀?我覺得你唱得好有味道喎!副歌又夠氣,睇唔出你係巨肺,樂壇有你得啦,阿Gem個肺都唔夠你巨!」

上司要你滅亡,必先令你瘋狂,咁嘅說話都講得出,絕對係泯滅人性,證明上司真係好想老屎忽走。

阿叔同事:「都得呀,不過都係唱多隻張學友先,你哋聽埋首《愛是永恆》再決定!」

當晚喺我哋無恥盛讚之下,老屎忽明顯已經飄到頂穿天花板,最後佢決定用《年少多好》參賽,話吻合返中年好聲音個主題,感嘆細個冇機會,而家勢要衝破年齡界限去追夢……是L但佢啦!

第二日返到公司,老屎忽正式遞信,但係個故事未進入高潮,不如你估下佢參加中年好聲音入唔入到圍先吖!(未完待續)

error: