今日打咗好多次嚟，忍唔住要聽下佢噏乜。
對方係一位帶鄉音嘅女聲：「喂，先生，你有份件畀我哋順豐扣起咗，人哋寄錢畀你，有兩萬蚊，唔寄得現金㗎，想通知你要畀返同等價值嘅錢做保證金先，收到就會放返筆錢畀你。」
乜唔係假冒銀行咩？又變咗順豐？🤷🏻♂️
「哦，咁我姓咩呀？」
鄉音女聲：「我哋唔透露得㗎！」
「我姓咩喎，你打畀我㗎喎，我係邊個呀？」
鄉音女聲：「為咗保障客戶私隱，公司唔會畀晒你哋資料我睇㗎，你知唔知有人寄現金畀你？」
「我知呀！我叫佢寄既。」
鄉音女聲：「下……」
「咁即係點呀？」
鄉音女聲：「其實咁嘅先生，你入返兩萬去我哋公司戶口做保證金就得㗎喇，確認咗就會將保證金同原本人哋寄畀你嗰兩萬，合共四萬，一次過畀返你，不如我同你對咗地址先吖，麻煩講一講地址我聽。」
「咁我唔要喇，兩萬好濕碎，費事煩，請你飲茶吖。」
鄉音女聲：「下……」
靜咗幾秒，然後佢收咗線。
大佬呀，劇本可唔可以寫好啲呀？呢啲電話騙局唔係會有人上當呀？