Anthony ok既，唔係話超級靚仔，但行出嚟都夠charm，談吐舉止淡定，月入6至7萬，由於工作太忙同埋定格咗喺一個環境，所以就嚟我公司join啲一對一嘅package結識異性。
我哋幫Anthony安排咗3次一對一嘅dating，第一次食飯係見Tracy，我同其他同事都覺得佢兩個外型好襯，男嘅180，女嘅174，坦白講Tracy選港姐應該冇問題，又高又靚女都嚟呢度識朋友，原因同Anthony差唔多。
Anyway，第二round同Anthony見面嘅係Rainie，都唔差嘅，但因為Tracy珠玉在前，係蝕章少少。
仲有一Round係Sylvia，鬼妹仔性格，之前喺美國讀書同埋做嘢，返咗香港都係兩年咁大把，硬係覺得佢落bar一定好吸鬼佬，但原來Sylvia晚晚放工都12點，所以約佢同Anthony見面搞最耐。
直接開估唔賣關子喇，最後Anthony同咗Rainie一齊，對我嚟講並唔意外，因為佢同Tracy、Rainie、Sylvia三次飯局過後，我都有follow佢嘅comment同感覺，不過對其他同事嚟講就好似爆冷，始終Tracy嗰type真係似逢出必勝，就算次熱都應該係Sylvia，結果大家走嚟問我點解？
同Tracy食飯，Anthony話自己好似上咗一堂潮流同名牌認知課，因為Tracy嘅話題就只有邊隻手袋靚，呢期興邊個牌子邊個款。其實Tracy唔止靚，仲係一個好活潑嘅女仔，但只限於講佢自己有興趣嘅話題，當然Tracy都好大方得體，其他話題一樣會面露笑容，不過你feel到佢係唔關心。
Sylvia冇呢個問題，因為Anthony除咗自我介紹下之外，完全冇乜機會搭到嘴，大部分時間都係聽Sylvia一直呻一直呻，呻到樹葉都跌晒落嚟。Anthony當晚做得最多嘅動作就係－－－點頭，佢話同Sylvia食完飯之後個人悲觀咗一日，要落街跑個步先至開心返，不過佢都話Sylvia係好有禮貌，每個話題呻完半個鐘之後都會問：「有冇悶親你呀？」嗰餐飯食咗3個鐘，之後Sylvia唔想走住，再捉住佢喺街漫無目的咁行咗一個鐘繼續抱怨公司嘢，Anthony同我講：「其實我做嘢都好多煩惱，我都想搵人傾下，不過冇機會插嘴，再要聽Sylvia呻，食完餐飯之後，我本身啲煩惱同鬱悶好似double咗。」
Rainie，三個女仔當中長相最普通，不過講嘢最貼地，Anthony有機會講自己好多嘢，Rainie都一樣，大家由工作講到屋企，甚至講下之前拍拖經歷，互相交流咗好多，未必係令人目瞪口呆嘅光怪陸離事，佢哋傾嘅話題都係好生活化，6點半去到餐廳邊食邊傾去到10點半，做咗最後一枱客，不過Anthony總係覺得傾咗一陣，所以交換咗contact之後，佢兩個每日都傾計，唔係按規律每晚要傾一個鐘嗰種，係無聊就send句嘢畀對方，有時見到得意搞笑嘢又會互相send圖。
其實兩個人一齊，有交流係好重要，樣幾靚都好，睇得多都係會厭，你靚咩？總有人靚過你，每過一年你都會老，而每過一年，都會有更多後生又火辣辣嘅靚女出現，不過溝通得到，電波接近，有傾唔完嘅話題，甚至冇嘢講都唔覺得氣氛尷尬，呢啲化學作用就唔係人人有，乎失去咗亦好難搵返同樣嘅soulmate。
做我呢行見到嘅靚仔靚女其實唔少，只可以講句，好看的皮囊千篇一律，有趣的靈魂萬裡挑一，如果係認真發展，溝通得到絕對比樣貌重要。