S小姐係一間美容護膚品牌嘅前線Sales，佢表示喺爆發疫情期間，公司已經懶理員工安全同埋死活，最緊要開舖做生意。由於呢段時期冇客買嘢，老細仲要迫員工追返上年嘅target，其實大家都知道今年市道差，呢個目標簡直係天荒夜譚，所以就強迫員工拍片影相做KOL，再要佢哋出賣私人社交平台，甚至用個人WhatsApp去sell公司產品。
佢個老細成日話：「盡力冇用㗎！冇成效盡咗力都係唔得，知唔知咁樣即係差啲咩？話緊你冇執行力啊！」
如是者，老細強制性要求每間舖嘅店長先開一個fb page，然後你就會發現佢哋品牌有幾廿個page，例如XXX（荃灣店）、XXX（九龍塘店）、XXX（中環店）……等等，最大問題係員工一定要出埋樣，其實呢個牽涉埋私隱問題，等於赤裸裸將自己個名、樣、同埋喺邊個地址返工都講晒畀全世界知，基於呢行以女仔為主，各sales都會擔心個人安全。
咁都未算，老細話要每個sales都做KOL，用自己社交平台例如fb，ig，甚至走去開個小紅書，再加埋用個人WhatsApp等等去幫公司宣傳產品，唔係求其share公司啲product link，而係要影相同埋拍片，例如敷住公司面膜拍一條片：「呀，好好用呀，好水呀！」
高層會化身做mon post狗，要求員工喺私人平台sell完畀佢哋睇，如果係WhatsApp sell客，你錄咗個voice msg首先要畀上面聽，ok先send畀客。以上嘅嘢如果唔照做，基本上返工日子會好難捱。
由於S小姐同一班同事只係retail sales，要公開晒個人資料之餘，又要做埋KOL利用自己社交平台幫公司賣product，已經同最初嘅工作要求不符，所以一班前線員工都做得好唔舒服，好多人都plan緊後路，只係而家個市真係好差，其他美容護膚品牌都唔多opening，加上好多retail sales亦做咗好多年，即使想跳出嚟轉行都唔係易事，每個人都有各自嘅負擔，無可奈何之下處於兩難局面。
我呢排都頻頻收到一間名店sales嘅WhatsApp，係一段時間之前買過一個銀包，相信sales姐姐真係逐個send，呢啲msg唔係單一幫公司賣貨，有時係會講一大段嘢例如點樣保養皮革產品，retail sales真係要連marketing嘅工作都做埋。
搵食艱難，早兩日我喺隔離page先講過公司戶口得返4000蚊，名牌真係幫襯唔到住，但我都會體諒佢哋做嘢好辛苦，收到msg會禮貌回一句：「thx，唔該晒。」希望各位做前線銷售嘅朋友加油！一齊捱過難關。
註：S小姐仲做緊，想辭職之際收到風，傳公司有機會cut人，如果一定要走，希望佢有得補水走啦！