你話《情侶座》要開個Speed Dating TG group，究竟開咗未呀？我受夠喇，阿媽啲朋友介紹咗兩個男仔同我相睇，冇個正常㗎！
自介先，本人30歲中女，唔靚但自問稱唔上樣衰，兩年冇拍拖，我阿媽好擔心，日煩夜煩，失業都冇咁大壓力，畀佢迫多幾迫，又話舊同事個親戚個仔幾好，卒之我頂唔順阿媽好似傳銷咁sell我，結果就出去同個男仔食餐飯，好好醜醜當係向阿媽交代。
嗰條仔一個字形容－－－「柒」，可能你會話我揀人，人揀我，不過佢堅柒吖嘛，最柒都唔係衣著，係佢個人，食飯食到中段，佢問我有冇拍過拖，成30歲人，話冇都呃你啦！
廢事答得咁詳細，淨係答佢：「有呀。」
阿柒仔真係咁講：「咁咪唔係處女囉！」
某程度上我都幾欣賞阿柒仔份人夠坦誠，咁我亦唔客氣喇喎：「點解你要個女朋友係處女呢？」
柒仔：「情意結。」
「你係處男？」
當時有個侍應上緊菜，佢望一望我。
柒仔：「係呀，以前拍過一次拖，但冇做過。」
侍應已經上完菜，但臨走都不忘望一望佢，我估侍應應該覺得呢枱客係痴撚線。
返到屋企同阿媽講，我阿媽係痴撚線X2，佢話：「幽默咋係咪？係咪講緊星座呀？」
我身高175，所以同柒仔相睇之前，我係有問對方身高，而柒仔的確高過我，可惜柒呢！冇幾耐，阿媽又叫我去相睇，對方係佢一隻麻雀腳個仔，呢個男仔其實正常好多，但係身高可能僅僅170左右。
當晚食完飯，我又返去同阿媽講：「你又話佢高過我既？」
阿媽：「咩呀，咪又係一七幾。」
「冇三都不成幾啦！」
阿媽：「170至179都係一七幾啦！」
我唔想再同阿媽拗喇，心很累，係咪搞個交友TG group啫？快啦！唔好畀你啲fans再受折磨喇好冇？
–
相睇真係幾攰㗎🤦🏻♂️
《相睇20次血淚史》
https://hkofficedaily.com/?p=15623